Maako 16
16
Samusoni ku Ngaza
1Litangwa limo Samusoni waile kuli vaFilisitiya ku nganda ya Ngaza, kuje waliwanene na cikwizi, co waile nendi ku vulili. 2Omwo vanu va ku Ngaza vazivile ngeci Samusoni ali kuje, co vazengelekele uje mutambela, vamuvandamenene vutsiki vwoshe ku cikolo ca nganda. Co volokele kuluu vutsiki vwoshe, valiyongwele vakevo vavenya ngwavo, “Tukamuvandamena noo kunaki, co tukamutsiya.” 3Oloni Samusoni wakele lika a vulili noo mukati ka vutsiki. Asinoni wendukile, co wambatele vikolo vya ku nganda na mapito, na vivuliko, na tupateso, na vyoshe. Co wavyakele a vitsili vyendi, wavyambatele nakuvitwala kulyala akamwa ya lilundu lije lyalishungama na Hevelone.
Samusoni na Ndelila
4Munima ya vyuma evi, Samusoni wazemene munakazi umo lizina lyendi Ndelila, uje wakele mu Cana ca Soleke. 5Co vimyene vatanu va vaFilisitiya vaile kuli uje munakazi vendekele nendi ngwavo, “Soka-soka Samusoni ngeci akuleke omwo vikajo wakala na nzili ya ngacije, co vatijo twasa kumufungulula, ngeci tumukute nakumuyandesa. Co yetu tukakwana vimbongo vya mavundungulu a siliva akupwa 1,100.” 6Ngecivene, Ndelila wendekele kuli Samusoni ngwendi, “Mbai, njilekeko vikajo vyakulingisa ngacije nzili. Nga munu ashaka kukukuta nakukwesesa, vatijo asa kucilinga?”
7Samusoni wamukumbulwile ngwendi, “Nga vanjikuta na mikole yakwosha itanu na ivali ya mingusha ije icitonola kanda icume, co njikazeya nakupwa ngwe munu woshe.”
8Ngecivene, vimyene va vaFilisitiya vanenelele Ndelila mikole yakwosha ya mingusha ije icitonola kanda icume, co wakutile Samusoni. 9Ndelila wakele na vanalume vamo vavandamenene mu mulili ukwavo, co watambekele ngwendi, “Samusoni! VaFilisitiya vanaija!” Oloni ikeye wavatozwele mingusha ngwe vwanda vushutozoka omo vunakwata ku tuhya. Ngecivene, vakevo kuvazivukile nzili yendi uyemana.
10Co Ndelila walekele Samusoni ngwendi, “Kenga, unanjishendumuna nakunjileka makuli, co kuwanjilekele vushunga embwe. Mbai, njilekeko vatijo munu asa kukukuta.”
11Co wamulekele ngwendi, “Nga vanjikuta na mikole yaiha ije kanda vapangese, co njikazeya nakupwa ngwe munu woshe.”
12Ngecivene, Ndelila wanonele mikole yaiha, co wamukutile. Asinoni watambekele ngwendi, “Samusoni! VaFilisitiya vanaija!” Vaje vanalume vavandamenene mu mulili ukwavo. Oloni Samusoni wavatozwele mikole ya ku mavoko endi ngwe munu avatozola vwanda.
13Ndelila wendekele kuli Samusoni ngwendi, “Anga ucili nakunjishendumuna lika nakunjileka makuli. Njileke vatijo munu asa kukukuta.”
Samusoni wamulekele ngwendi, “Nga wambata mambonge atanu na avali a vin̄ambu vya ku mutwe wange, co uwashilwisa mu cindambu, co njikazeya nakupwa ngwe munu woshe.”
14Co Ndelila wamumbumbungiiye ngeci alale, co wakwatele mambonge endi a vin̄ambu atanu na avali, co waashilwisile mu cindambu, co watambekele ngwendi, “Samusoni! VaFilisitiya vanaija!” Co wakasumukile, wakokele aje mambonge atanu na avali a vin̄ambu vyendi nakuwazitula.
15Ngecivene, ikeye wamwihwile ngwendi, “Vatijo wasa kwendeka ngwove unjizema, oku mbunge yove yaiko kuli yange? Yove unendeka kuli yange nakunjikwisa visimbu vitatu, anga vene kanda ucinjileke muyafwa nzili yove.”
16Co ikeye watwaleleo kumwihozola a litangwa na litangwa. Co wajukile manene ali uje munakazi ngwe kushaka kutsa vene, 17co akukotoka wamulekele vushunga ngwendi, “Vin̄ambu vyange kanda vaciviteule. Yange vanjikundikile kuli Njambi kupwa kaNazalite kutunda ku simbu ije njasemukile. Nga vin̄ambu vyange vaviteula, co njikajeneka nzili, njikapwa wakuzeya ngwe munu woshe.” 18Omo Ndelila wanangukile ngeci namuleka oni vushunga, co watumine lijwi kuli vaje vimyene va vaFilisitiya nakuvaleka ngwendi, “Ijeni kuno simbu imolika lalo. Ololo nanjileka vushunga.” Asinoni vanenele vimbongo kuli ikeye. 19Co Ndelila wambumbungiiye Samusoni a mendi endi lalo, ngeci aye mu tulo, co wasanene munalume ngeci akongovole mambonge a Samusoni. Co washangumukile kumuyandesa, omwo ikeye wajenekele oni nzili. 20Asinoni watambekele ngwendi, “Samusoni! VaFilisitiya vanaija!” Co ikeye wendukile wayongwele ngwendi, “Njikacakunuka nakupatuka ngwe visimbu vyoshe.” Co Samusoni kazivukile ngeci Shukulu Kalunga namuseze embwe. 21Co VaFilisitiya vamukwatele, vamutivile mesho. Vamutwalele ku Ngaza, vamukutile na malyenge a vunengu, co vamwakele ku vipangi vyakutwa ku likina mu kamenga. 22Oloni vin̄ambu vyendi vyashangumukile kukola lalo munima ya kumuteula.
Kutsa kwa Samusoni
23Co vimyene va vaFilisitiya vakungulukilile amo ku ciwano cakulisamba nakukombelela n̄ombelo yakama kuli njambi yavo Ndangone. Co vembile mwaso ngwavo, “Njambi yetu nakundika citozi cetu Samusoni ku mavoko etu!” 24Co omo vanu vamumwene, vembile nakulemesa njambi yavo, omwo vembile ngwavo, “Njambi yetu nakundika citozi cetu Samusoni ku mavoko etu, uje waviisile lifuti lyetu, nakutsiya vanu vetu vavangi nakuvalundika mitumbo-mitumbo!” 25Omo vakele nakuvwaelela, co vendekele ngwavo, “Yeni mukashake Samusoni ngeci twakumushendumune!” Omo vatuwisile Samusoni mu kamenga, co vamwimikile mukati ka vimanda, co vamushendumwine. 26Samusoni wendekele kuli uje mukwenje wamukwatele ku livoko ngwendi, “Njitave njikwate ku vimanda vije vyemika ino njuvo ngeci njijendameneo.” 27Co njuvo yashulile na vanalume na vanakazi. Co vimyene voshe vatanu va vaFilisitiya vakele muje, co akamwa ya njuvo akele vanalume na vanakazi vakupwa 3,000, vaje vakele nakukenga Samusoni omo wakele nakweha.
28Asinoni Samusoni walombelele kuli Shukulu Kalunga ngwendi, “Yove Shukulu Kalunga wa Akamwa ya Vyoshe njanuke, Shukulu Njambi, njane nzili yange lalo a simbu ino vene, ngecivene, njilinge shambandinga vaFilisitiya lumolika a mesho ange avali.” 29Co Samusoni wakwatele vimanda vivali vya mukati vije vyakolesele njuvo. Co waakele livoko a manda imo na imo, co wajendameneneo wavisindikile na nzili yendi yoshe. 30Co watambekele ngwendi, “Tava njitse amo na vaFilisitiya!” Co wasindikile na nzili yendi yoshe, co njuvo yasiwukilile asi na vaje vimyene voshe vatanu, na vanu veka lalo. Co Samusoni watsiile vanu vavangi manene a kutsa kwendi kutuvakana vaje vatsiile a simbu yakuyoya kwendi.
31Vandolome vendi na vavushoko vwendi vezile nakwambata muvila wendi. Co vamwilwisile nakumutsinda mukati ka Zola na Eshetawole mu mbumbo ya ishe Manowa. Ikeye wapwile lyaako mu Isalele myaka 20.
The Bible in Mbunda ©The Bible Society of Zambia, 2006