Maako 12
12
Njefeta na vaEfalime
1Vanalume va Efalime valivwaeselele nzita, vajavukile Ndonga ya Yondau nakuya ku Zafene, co vendekele kuli Njefeta ngwavo, “Omwo vikajo wajombokele nginga mukulwa na vaAmoni nakujeneka kutusanako kuya amo nove? Mukemwo tukakwenyekela mu njuvo!”
2Njefeta wavalekele ngwendi, “Vanu vange nange tunakele na n̄ole yakama na vaAmoni. Co omwo njamisanene, kumwanjamenene kuli vakevo. 3Omo njamwene ngeci yeni kumwanjamenene, njakundikile mwonyo wange, njajombokele nginga nakulwa navo, co Shukulu Kalunga wavakundikile ku mavoko ange. Ngecivene, omwo vikajo munaija nakunjilwisa ololo?” 4Asinoni Njefeta wakungulwile vanalume voshe va mu Ngilyande amolika, co valwisile vanu vaEfalime nakuvafungulula. (Co vaEfalime vendekele ngwavo, “Yeni vaNgilyande va mu Efalime na Manase, munatunduko ku Efalime!”) 5VaNgilyande vafungulwile myava ya ku Yondau kutewesa vaEfalime vajavukilao. Omo kaEfalime avomboloka alomba lisesa lyakujavuka, co vanalume va Ngilyande vamwihula ngwavo, “Yove u kaEfalime ndi?” Nga ikeye endeka ngwendi, “Embwe,” 6co vakevo vamuleka endeke ngwendi, “Shimbolete.” Oloni ikeye kasele kwendekamo, co endeka ngwendi, “Simbolete,” omwo ikeye kasele kwendeka kutumbula mwamuvwa. Co vakevo vamukokangeya nakumutsiila kuje vene ku Ndonga ya Yondau kwakujavukila. Co a simbu ije kwatsile vaEfalime vakupwa 42,000. 7Njefeta watwamenenene Isalele myaka itanu na umo. Co watsile, co vamutsindile mwimbo lyendi mu Ngilyande.
Embezane na Elone na Ambendone
8Co munima ya Njefeta, Imbezane wa ku Mbetelehema watwamenenene Isalele. 9Wakele na vana va vanalume vakupwa 30, na vana va vanakazi vakupwa 30. Co washombwesele vana vendi 30 kesi ku cikota cendi, co lalo wanenele vambanda 30 vaje va ku cikota ceka ngeci vashomboke kuli vana vendi va vanalume. Co Imbezane watwamenenene vaIsalele myaka 7, 10co watsile, co vamutsindile mu Mbetelehema.
11Munima ya Imbezane, Elone kaZembuloni watwamenenene Isalele myaka 10. 12Co watsile, co vamutsindile mu Ainjalone mu mutambela wa Zembuloni.
13Munima ya Elone, Ambendone muna Hilele kaPilatone watwamenenene Isalele. 14Ikeye wakele na vana va vanalume vakupwa 40, na vatekulu vakupwa 30, vaje vakele nakwendela a vimulu vakupwa 70. Co Ambendone watwamenenene Isalele myaka 8, 15co Ambendone muna Hilele kaPilatone watsile, co vamutsindile mu Pilatone mu mutambela wa Efalime mu lifuti lya malundu lya vaAmaleke.
The Bible in Mbunda ©The Bible Society of Zambia, 2006