Maako 13
13
Kusemuka kwa Samusoni
1Co vaIsalele valingile lalo vuvi ku mesho a Shukulu Kalunga, co Shukulu Kalunga wavakundikile ku mavoko a vaFilisitiya ngeci vavashwane myaka 40. 2Co a simbu ije kwakele munalume umo lizina lyendi Manowa wa ku limbo lya Zola. Wapwile wa ku muyati wa Ndani. Co munakazi wendi wapwile mumba. 3Co kangelo ka Shukulu Kalunga washolokele kuli munakazi wendekele ngwendi, “Yove wapwa u mumba, oloni ololo ukemita, co ukakita mwana wa munalume. 4Ololo kenga ngeci kesi unwe vinyu, nambe kunwa vwala, nambe kulya vyakulya vimo vya cizila embwe. 5#Kul 6:1-5 Co munima yakusemuka kwa munove wa munalume, kesi ukamuteule vin̄ambu vyendi, omwo kutunda a litangwa lyakusemuka kwendi, akapwa wakukundika kuli Njambi kupwa kaNazalite.#13:5 KANAZALITE: Kanazalite wapwa munu uje nalikundika kuli Njambi akulisinga kujeneka kunwa vinyu, nambe vwala, nambe kuteula vin̄ambu vyendi, nambe kukwata vivimbi (kenga Kulava 6:1-8). Akashangumuka vipangi vyakwovola Isalele kuli vaFilisitiya.”
6Asinoni uje munakazi waile nakulekako munalume wendi ngwendi, “Munu wa Njambi naija kuli yange, omo washolokele wazivisile lyova ngwe kangelo ka Njambi. Co kunjamwihwile kuje kwatundile, co lalo kanjilekele lizina lyendi. 7Oloni nanjileka lika ngwendi njikemita, co njikakita mwana wa munalume. Nanjileka ngeci kesi njinwe vinyu nambe vwala, nambe kulya vyakulya vimo vya cizila, omwo mwanike akapwa wakukundika kuli Njambi kupwa kaNazalite matangwa oshe akuyoya kwendi.”
8Asinoni Manowa walombelele kuli Shukulu Kalunga ngwendi, “Shukulu Kalunga, tava uje munu wa Njambi iwatumine eluke lalo kuli yetu, akutuleke vije vitunapande kulinga na mwanike omo akasemuka.”
9Co Njambi wazivile kulomba kwa Manowa, co kangelo kendi welukile kuli munakazi omo vatumbamene mu lihya. Oloni Manowa kakeleko, 10ngecivene, munakazi washatukile kukaleka munalume wendi ngwendi, “Kenga! Uje munalume wanjisholokelele lije litangwa naija lalo.”
11Co Manowa wakatukile nakukava munakazi wendi. Co waile kuli uje munalume nakumwihula ngwendi, “Yove uje munalume wendekele kuli munakazi wange ndi?”
Ikeye wamukumbulwile ngwendi, “Eyo, yange vene.”
12Co Manowa wehwile ngwendi, “Ngecivene, ololo, omo majwi ove akapwa a vushunga, vatijo tukanyunga ou mwanike? Napande kukala vati mukuyoya kwendi?”
13Co kangelo ka Shukulu Kalunga wakumbulwile Manowa ngwendi, “Mwa vushunga munakazi wove napande kunyanyama mukulinga vyuma vyoshe vije vinjamulekele. 14Kapandele kulya cuma cimo cakutunda ku mukolovozi wa vushuka vwa vinyu, nambe kunwa vinyu, nambe vwala, nambe kulya vyakulya vya cizila. Anyunge vyuma vyoshe njinamushiki.”
15Co Manowa wendekele kuli kangelo ka Shukulu Kalunga ngwendi, “Njakulombo, tutave kesi uciye, ngeci tukuvwaesele muna membe.” 16Co kangelo ka Shukulu Kalunga wendekele kuli Manowa ngwendi, “Nga kumunjitavesa kuya, co kunjikali vyakulya vyeni, oloni nga mulivwaesela n̄ombelo ya kwenyeka, co ikombeleleni kuli Shukulu Kalunga.” Omwo Manowa kazivukile ngeci uje wapwile kangelo ka Shukulu Kalunga.
17Co Manowa wamwihwile ngwendi, “Tuleke lizina lyove, ngeci tukusingimike omo majwi ove akapwa a vushunga.”
18 #
Kus 32:29
Co kangelo ka Shukulu Kalunga wamwihwile ngwendi, “Omwo vikajo ushaka kuzivuka lizina lyange? Likelyo lyapwa lizina lyakukomokesa.”
19Ngecivene, Manowa wambatele muna membe na vunga vwakuseneta, co wavikombelelele a mutula wa limanya kuli Shukulu Kalunga. Co Shukulu Kalunga wapangele vyuma vyakukomokesa oku Manowa na munakazi wendi vanakengelela. 20Co omo mulangi waile mwilu kutunda a mutula, kangelo walondele mu mulangi, oku Manowa na munakazi wendi vanakengelela, co vatsikamene asi nakulemesa. 21Co kangelo ka Shukulu Kalunga kasholokele lalo kuli Manowa na munakazi wendi. Asinoni Manowa wazivukile ngeci kuma ikeye wapwile kangelo ka Shukulu Kalunga.
22Co Manowa wendekele kuli munakazi wendi ngwendi, “Mwa vushunga vene tutsa, omwo tunamono Njambi!”
23Oloni munakazi wendi wamukumbulwile ngwendi, “Nga Shukulu Kalunga nashakele kututsiya, nga katambwile n̄ombelo yetu ya muna membe, na vunga vwakuseneta, nga katusholwelele vyoshe evi, nambe kutuleka vyuma vya cifwa cangacije a simbu eyi.”
24Co munakazi wakitile munendi wa munalume, wamulukile lizina lyendi Samusoni. Mwanike wakolele, co Shukulu Kalunga wamuvezikisile. 25Co Munzinzime wa Shukulu Kalunga wezile na nzili ali ikeye omo wakele mukati ka Zola, na Eshetawole mu Cilombo ca Ndani.
The Bible in Mbunda ©The Bible Society of Zambia, 2006