Maako 11
11
KaNgilyande muka-nzili na muka-kusimpa
1Co Njefeta lishwalale wa cingenyenye watundile ku Ngilyande, ikeye wapwile mwana wa mu vupangala. Ishe wapwile Ngilyande, 2wakele na vana va vanalume vakwavo kuli munakazi wendi, co omo vana vaje vakolele, vashekele Njefeta hembo. Vamulekele ngwavo, “Nacimo cuma ciwushwana cakutunda kuli tatetu cai, omwo yove wapwa u mwana wa munalume wa kuli munakazi weka.” 3Co Njefeta watewele kutunda kuli vandolome vendi, wakakele mu lifuti lya Tove. Kuje wakongumukile na munga ya vanu veka vangoco, co vendele amo nendi.
4Co capwile ngeci, omo kuneti simbu, vaAmoni vezile nakulwa nzita na vaIsalele. 5Omo eci calingiwile, vantwama va Ngilyande vaile nakukashaka Njefeta uje wakele ku lifuti lya Tove. 6Co vamulekele ngwavo, “Ija ukatutwamenene ngeci tukalwe na vaAmoni.”
7Oloni Njefeta wavakumbulwile ngwendi, “Ngwetu mwanjizindile manene, nakunjisheka ku njuvo ya tate. Omwo vikajo munezila kuli yange omo muli mu vukalu?”
8Co vakumbulwile Njefeta ngwavo, “Tunaija kuli yove ololo omwo tukushaka uye amo netu tukalwe na vaAmoni, co ukapwa ntwama ya vanu voshe va mu Ngilyande.”
9Njefeta wendekele kuli vakevo ngwendi, “Nga munjiilwisila kwimbo mukulwa na vaAmoni, co nga Shukulu Kalunga akavakundika ku mavoko ange, co njikapwa ntwama yeni.”
10Co vamukumbulwile ngwavo, “Twatava. Shukulu Kalunga ikeye napu mukaleo wetu.” 11Ngecivene, Njefeta waile amo na vantwama va ku Ngilyande, co vanu vamupwisile ntwama na muka-kushika. Njefeta wendekele majwi endi oshe ku mesho a Shukulu Kalunga kuje ku Mizipa.
12Asinoni Njefeta watumine tunganda kuli mwene wa vaAmoni wendekele ngwendi, “Vimata vyove netu vinapu vika? Omwo vikajo unaija nakulwisa vanu na lifuti lyange?”
13Co uje mwene wa vaAmoni wakumbulwile tunganda va Njefeta ngwendi, “Omo vaIsalele vatundile mu lifuti lya Ingito, vatambwile lifuti lyange kutunda ku Ndonga ya Alenone, nakweta ku Ndonga ya Njavoke, na ku Ndonga ya Yondau. Co ololo munapande mwecele lifuti lyange mu kwoloka.”
14Njefeta watumineko lalo tunganda kuli mwene wa vaAmoni, 15wamulekele ngwendi, “Oco kesi ca vushunga ciwunendeka, vaIsalele kuvatambwile lifuti lya vaMowavi nambe lifuti lya vaAmoni embwe. 16Oloni omo vaIsalele valamatele kutunda mu Ingito, vendele mu mambo nakweta ku Lishali Lyakuvenga, co vetele ku Kandeshe. 17#Kul 20:14-21 Co vatumine tunganda kuli mwene wa ku Endome, vamulombele lisesa lyakwita mu lifuti lyendi. Oloni mwene wa ku Endome kavatavele kwita mu lifuti lyendi. Co lalo valombele kuli mwene wa ku Mowavi, oloni na ikeye lalo kavatavele kwita mu lifuti lyendi. Ngecivene, vaIsalele vakele ku Kandeshe. 18#Kul 21:4 Co vatuvakanene mu mambo, vaile nakulizenga mu lifuti lya Endome na mu lifuti lya Mowavi, noo vezile ku mutambela wa mu ngangela ya Mowavi, ku mutambela ukwavo wa Ndonga ya Alenone. Co vatungile cilombo cavo kuje, oloni kuvajavukile Alenone omwo ikeyo yapwile nginga ya Mowavi. 19Asinoni vaIsalele vatumine tunganda kuli Sihone, mwene wa vaAmoli wa ku Heshevone, vamulombele lisesa lyakwita mu lifuti lyendi ngeci vaye ku lifuti lyavo. 20Oloni Sihone katavele Isalele kujomboka nginga yendi. Wanenele nzita yendi yoshe amolika, vatungile cilombo cavo ku Njahaze, co valwisile Isalele. 21Oloni Shukulu Kalunga, Njambi ya Isalele, wakundikile Sihone na mashwalale vendi ku mavoko a vaIsalele. Ngecivene, vaIsalele vatambwile lifuti lyoshe lya vaAmoli vaje vakele mu lifuti lije. 22#Kul 21:21-24 Co vatambwile mutambela woshe wa vaAmoli kutunda ku Alenone mu mbwela kutwala ku Njavoke ku kunto, co kutunda mu mambo mu ngangela nakutwala ku Yondau mumkangombe ka yambi. 23Ngecivene, Shukulu Kalunga, Njambi ya Isalele, ikeye washekele vaAmoli mu lifuti lyavo omwo vanu vendi vaIsalele. 24Co mushaka kutambula mutambela wavo ndi? Wasa kunyunga vyoshe vije vyanakwana njambi yove Kemoshe. Co yetu lalo tunyunga vyuma vyoshe vije vyanatwana Shukulu Kalunga Njambi yetu. 25#Kul 22:1-6 Kuma yove unatuvakana Mbalake muna Zipole, mwene wa Mowavi ndi? Nalumo lwai washungwiiye Isalele, indi walingilemo? Kuma ikeye wezile nakulwa nzita netu ndi? 26A myaka 300 vaIsalele vatambwile Heshevone, na Aloele, na membo aje avizengelekele, na vinganda vyoshe vije vyakele a ngenge ya Ndonga ya Alenone. Omwo vikajo yeni kumwavitambwile mu simbu yoshe ije? 27Embwe, yange nacimo cacivi cinjinalingi kuli yove cai. Yove ulinakulinga mwamuvi akulwa nzita nange. Shukulu Kalunga apwe lyaako. Ikeye ayongole ku litangwa lya lelo akati ka vaIsalele na vaAmoni.” 28Oloni mwene wa ku Amoni katolilile ku lijwi lya Njefeta. 29Asinoni Munzinzime wa Shukulu Kalunga wezile ali Njefeta. Co Njefeta waile ku Ngilyande na Manase, welukile lalo ku Mizipa mu Ngilyande, co waile ku Amoni. 30Co Njefeta wakulaesele Shukulu Kalunga ngwendi, “Nga yove ukakundika vaAmoni ku mavoko ange, 31co njikakombelela cuma cakuyoya kupwa n̄ombelo ya kwenyeka, cije cikatuuka mu njuvo yange nakunjishesha omo njikeluka mu kwoloka kutunda mukufungulula. Co njikacana kuli yove kupwa n̄ombelo.”
32Ngecivene, Njefeta wajavukile ndonga mukulwa na vaAmoni, Shukulu Kalunga wamuhyanesele. 33Co wavalwisile kutunda ku Aloele nakweta ku mutambela uje wazengelekele Minite, co vyoshe vyapwile vinganda makumi avali, wetele na ku Avele Kalamime. Co kuje kwakele kulitsiya kwakama, vaAmoni vavafungulwile kuli vaIsalele.
Muna Njefeta wa munakazi
34Omo Njefeta welukile kwimbo ku Mizipa, co kuje kwakele munendi wa munakazi wezile nakumushesha, nakukina nakwimba kambulumbumba. Wapwile munendi umolika. 35#Kul 30:2 Omo ikeye wamumwene, co watavwile vuzalo vwendi mukuviilila, wendekele ngwendi, “Ove munange! Ulinakuvavalesa mbunge yange! Omwo vikajo cuma cangacije ciija ali yove? Njinalingi laja cikulaeso kuli Shukulu Kalunga, co kunjasa kucipokola lalo mbwe!”
36Co ikeye wamulekele ngwendi, “Tate, nga yove unakulaesa laja Shukulu Kalunga, co linga kuli yange cuma cije ciwunakulaesa, omwo Shukulu Kalunga nakulingilako shambandinga vitozi vove vaAmoni.” 37Oloni ikeye walombele ishe ngwendi, “Njitave kunjilingila cuma cimo eci. Njecele a vingonde vivali tai, ngeci njiye na vasamba vange mukwendangana navo mu minkinda, nakulila ngeci njinapande kutsa njicili nji mumbanda kanda njilimone na munalume.” 38Ishe wamulekele ngeci aye, co wamutumine kulyala a vingonde vivali. Ikeye na vasamba vendi valamatele ku minkinda, nakulinyenga omwo ikeye akatsa muzike nakujeneka vana. 39Munima ya vingonde vivali, welukile kuli ishe. Co ishe walingile vije vyakulaesele Shukulu Kalunga. Co watsile acili mumbanda kanda alimone na munalume.
Eci cikeco capwile vushangumukilo vwa cilika mu Isalele, 40ngeci a mwaka na mwaka a matangwa awana, vambanda vaile mukulila muna Njefeta wa ku Ngilyande.
The Bible in Mbunda ©The Bible Society of Zambia, 2006