Yakomba 4
4
Vusamba na kaye
1Kulilwisa kwoshe na vimata vyoshe akati keni vilinakutunda kuli? Vilinakutunda ku mashungu eni aje simbu yoshe alinakulwa mu mivila yeni. 2Mushaka kukala na vyuma, oloni kumwasa kuviwana, ngecivene, mutsiya, muliveyela vyuma, oloni kumwasa kuviwana, co mulinga vimata nakulilwisa. Kumwesi kuwana vije vimushaka omwo kumwesi kuvilomba kuli Njambi. 3Co nameme munalombo kumwasa kuvitambula, omwo viyongola vyeni vyapwa vyavivi, mukalomba vyuma ngeci mulikwase ku senga yeni vavenya. 4Yeni vanu vakwonwa kulongwa! Kuma kumuzivuka ngweni vusamba na kaye vwapwa vutozi kuli Njambi ndi? Woshe uje ashaka kulipwisa musamba wa kaye nalipwisa ikeye vavenya citozi ca Njambi. 5Kesi muyongole ngweni visoneka vilinakwendeka makuli omo vyendeka ngwavyo, “Munzinzime uje yanaka Njambi muli yetu washula na mashungu a muuka.”#4:5 MUNZINZIME....MASHUNGU A MUUKA: Nambe, Njambi washula na mashungu a muuka ali Munzinzime uje yanaka muli yetu. 6Oloni kutetela kwa Njambi kwanatwana kwapwa kwa nzili manene. Ngwe muvyendeka visoneka ngwavyo, “Njambi avyana vaka-kulyalesa, oloni atetela vaka-kulikeesa.”
7Ngecivene, ononokeni kuli Njambi. Vyaneni Liyavola, co akamijejuka. 8Shwenyeni kuyehi na Njambi, co na ikeye lalo akashwenya kuyehi neni. Jweleseni mavoko yeni, yeni vaka-vuvi! Jweleseni vimbunge vyeni, yeni vaka-civembulu! 9Pweni vaka-kuviilila, tambekeni, lileni, tengulukeni kujolela kweni kupwe kulila, kujolela kweni kupwe kulisimoka! 10Likeeseni yeni vavenya ku mesho a Njambi, co ikeye akamijundula.
Kunangula a kusompa musamba wove muka-Yesu
11Vasamba vange, kesi mulizungise umo na mukwavo. Woshe uje afweya nambe asompa mukwavo muka-Yesu alinakuzungisa Lishiko nakulisompa. Nga usompa Lishiko, co yove lalo kuwapwile u munu muka-kwononoka Lishiko, oloni unapu u muka-kulisompa. 12Njambi ikeye lika muka-kwana lishiko na lyaako. Ikeye lika muka-kwamena na muka-kunyongesa. Yove iyajo ngeci usompe mukweni?
Kunangula a ngila ya kulyalesa
13Co ololo tolilileni kuli yange, yeni mulinakwendeka ngweni, “Lelo nameme imene tukaya ku nganda yacingandi, kuje tukakala mwaka woshe wa mutunu nakunganyala nakuwanako vimbongo vyavingi.” 14Yeni kumwazivukile ngweni mwonyo weni ukafwa vati ku litangwa lya imene! Omwo yeni munapu ngwe mbundu, ije isholoka kasimbu kakandondo lika, co inyonga. 15Ngecivene, munapande kwendeka ngweni, “Nga cizango ca Mwene citava, co tukayoya nakupanga eci na cije.” 16Oloni yeni mukalyalesa nakulishasha, kulyalesa kweni kwoshe kunapu kwangoco.
17Ngecivene, munu woshe uje azivuka kulinga mwamuvwa oloni kalingimo, ali na mulonga wa vuvi.
The Bible in Mbunda ©The Bible Society of Zambia, 2006