Yakomba 3
3
Ndaka
1Vasamba vange, kucapandele muvavangi mupwe mu valongisi. Omwo mwazivuka ngweni yetu valongisi vakatusompa manene na vukalu kutuvakana veka. 2Omwo yetu voshe visimbu vyavingi tukaviisa. Oloni nga munu kesi kuviisa muvyendeka vyendi, co napu munu wakujela, co asa lalo kulinyunga ikeye vavenya. 3Tukaaka vikuvo mu tunwa twa tuvalu ngeci vatwononoke, co tukavatwala kwoshe kuje kutushaka. 4Nambe yongoleni a mato akama a mu mema a kalunga, nameme apwa akama manene, oloni akongumuka na nzili yakama ya lihunzi, vakawajavwisa na cikasi cimo cacindondo cakulipasha, co uje muka-kujavula awatengulula kwoshe kwashaka kuya. 5Co na ndaka mukemwo muyafwa, nambe yapwa yaindondo, oloni yasa kulyalesa a vyuma vyakama manene.
Co yongoleni shwata yakama-kama oloni yasa kwenya na kamulangi ka tuhya kakandondo! 6Co ndaka inapu ngwe tuhya. Inapu ngwe kaye ka vuvi, kanashwana mu mivila yetu nakushandwela vuvi mukuyoya kwetu kwoshe! Ishwameka yoyesi yetu yoshe na tuhya tuje tutunda mu mbulu ya tuhya. 7Munu asa kwononwesa, co nononwesa laja vikashama vavangi, tusitu na tuzila, nevi vyakulikoka na visi. 8Oloni naumo wai asa kwononwesa ndaka. Ikeyo yapwa yaivi, kuyitava kuyononwesa, yashula na vushungu vwa kutsa! 9Tuyipangesa mukukandelela kuli Mwene yetu na Tatetu, co na ikeyo lalo itukasingi nayo vakwetu vanu, vaje vavatangele mu cifwa ca Njambi! 10Majwi akukandelela nawa a cisingo oshe akatuuka mu kanwa kamolika. Vasamba vange, vyuma evi kuvyapandele kulingiwa! 11Kuma lisima lya kavwelu-vwelu limolika mukatuuka mema akulula na mema amavwa ndi? 12Vasamba vange, kuma muti wa mukuyu wasa kwima olive ndi? Nambe mukolovozi wa vushuka vwa vinyu wasa kwima mikuyu ndi? Nambe lisima lya mema a mwongwa lyasa kutuula mema akutovala ndi?
Mana akutunda kwilu
13Kuma akati keni ali muka-mana na muka-kuzivisisa ndi? Ikeye napande kuwajombolola na vukaleo vwakuyoya kwendi kwakuvwa na vilinga vyendi vya cifwa cakulikeesa na mana. 14Oloni nga mu mbunge yove mwakala lifuwa na vukalu na kulizema yove vavenya, co kesi ulwise vushunga mu kulyalesa a mana ove. 15Mana a cifwa cangacije kuwatundile mwilu embwe, awa akundama ku vya kaye, akewo kesi a ku munzinzime oloni a ku minzinzime yakujwala. 16Kuje kwoshe kwakala lifuwa nakulizema yove vavenya, co kwakala lalo kuviya na vuvi vwoshe. 17Oloni mana akutunda mwilu akulivanga apwa akujela, co apwa a kwoloka na vuvwa na vusamba, ashula na mema ku mbunge, co akasholola kuteja kwakuvwa kwa vilinga vyavivwa, co kuwakele na cizindo nameme na civembulu. 18Vaka-kwoloka vaje vakuna vimbuto mu kwoloka vakateja vimbuto vyakushungama.
The Bible in Mbunda ©The Bible Society of Zambia, 2006