Yakomba 5
5
Kunangula vaka-kufuka
1Co yeni vanu vaka-kufuka, tolilileni kuli yange! Lileni nakumbolozoka a n̄avava ije ilinakwija ali yeni! 2Vufuko vweni vunavolo laja, na vuzalo vweni vunaliwa ku tunembulu. 3Ngolinde yeni na siliva yeni vinaliwa ku n̄alawe, n̄alawe eyi ikapwa vukaleo kuli yeni, co vikalya situ yeni ngwe tuhya. Yeni munalilundikila vufuko mu matangwa ano akumanesela. 4Yeni kumwafwetele vaje vaka-kumipangela mu mahya eni. Ziveni kuteta kwavo! Miteto ya vaje valinakumitejela vimbuto vyeni inete ku matwi a Njambi, Shukulu Kalunga Muka-nzili yoshe! 5Kuyoya kweni kwa ano asi kunapu kwa mbwase nakuvwaelela. Munalinunisa yeni vavenya ku litangwa lyakumitsiya. 6Munahisa nakutsiya vanu vaka-vushunga, co kuvamivyanene.#5:6 CO KUVAMIVYANENE: Nambe, kuma Njambi kakamivyana ndi?
Kusimpa nakulombela
7Ngecivene, pweni vaka-kusimpa, vasamba vange, noo Mwene akaija. Kengeni kusimpa kwa ndimi omo avandamena lihya lyendi limene vimbuto vyavivwa. Akavandamena noo na ku nyangao na ku simbu ya ndombo. 8Neni lalo pweni vaka-kusimpa! Nyungeni cinyangavili ceni ngeci ciye kulutwe, omwo litangwa lyakwija kwa Mwene lili kuyehi.
9Kesi mulinyenge umo na mukwavo, vasamba vange, ngeci Njambi kesi akamisompe. Lyaako ali kuyehi, ololo vene asholoka. 10Vasamba vange, anukeni vaka-kwimanena vaje vendekele mu lizina lya Mwene. Vakengeni nakutembunwina kusimpa kwavo kuvakele nakwo a simbu ya n̄avava. 11Tulinakuvatumbula vaka-kuvwaelela omwo vakevo vakele na lukakateya. Mwaziva laja akusimpa kwa Yombi, co mwazivuka vika Mwene waanene kuli Yombi akukotoka. Omwo Mwene muka-kutetela na mema ku mbunge.
12Oloni a vyoshe evi, vasamba vange, kesi mulisinge omo mulinga cikumiiyo. Kesi mulisinge na lilu nameme na asi nameme na cuma coshe-icoshe. Oloni, “Eyo yeni ipwe eyo omwo munatava,” nambe “Embwe embwe yeni ipwe embwe omo munavyana,” nga ngoco, co vaka-nyanyamesa kuli Njambi.
13Kwali umo akati keni alinakuyanda ndi? Napande kulomba. Kwali umo alinakuvwaelela ndi? Napande kwimba vishangazala. 14Kwali umo akati keni alinakuvinja ndi? Napande kusana vakulunu va cikungulukilo, co vamulombelele nakumuvwavesa mazi mu lizina lya Mwene. 15Co kulomba oku mukukulaela kukovola uje muka-kuvinja, co Mwene akamukangwisa, nga ikeye nalingi vuvi, co vakamusambesa. 16Ngecivene, litaveleni vivi vyeni kuli umo na mukwavo, co lilombeleleni umo na mukwavo, ngeci vamikangwise. Lilombelo lya munu muka-vushunga lili na nzili manene mukupanga. 17Elinja wapwile munu mu cifwa ngwe yetu vene. Walombelele manene ngeci nyonzi kesi inyoke, co nyonzi yalikelele kunyoka a myaka itatu na vingonde vitanu na imo. 18Walombelele lalo, co nyonzi yanyokele, co asi amenene vimbuto.
19Vasamba vange, nga umo weni ongumuka kutunda ku vushunga, co weka amwilwisa lalo, 20anukeni cuma eci ngweni, woshe uje elwisa muka-vuvi ku kupenga-penga kwendi novola mwonyo wa uje muka-vuvi#5:20 MWONYO WA UJE MUKA-VUVI: Nambe, mwonyo wendi vavenya. kutunda ku kutsa, co vuvi vwavungi vakavusambesa omwo ikeye.
The Bible in Mbunda ©The Bible Society of Zambia, 2006