Isaya 8
8
Muna Isaya napu cimweso kuli vanu
1Shukulu Kalunga wendekele kuli yange ngwendi, “Nona citale cakama usonekeo malaka akama ngwove, ‘Mahele Shalale Hashe Mbaze.’#8:1 MAHELE SHALALE HASHE MBAZE: Mu ciHevelu lizina eli lilumbunuka ngwalyo, vanatulwisa mukutunyangumuna, vanatutwala vwasi. 2Ambata vanalume vavali va kulongwa, Uliya muka-kukombelela na Zekaliya muka-kukombelela muna Njevelekiya, kupwa vakaleo.”
3Mwetile simbu yaindondo, munakazi wange wakele na limo. Omo munetu wasemukile, co Shukulu Kalunga wendekele kuli yange ngwendi, “Muluke lizina ngwove, ‘Mahele Shalale Hashe Mbaze.’ 4Simbu kanda mwanike azivuke kusana ‘Nana’ nambe ‘Tate,’ vufuko vwoshe vwa mu Ndamasiku na vyuma vya seo vyoshe vya mu Samaliya vakavyambata kuli mwene wa Asilya.”
Mwene wa Asilya alinakwija
5Shukulu Kalunga wendekele kuli yange lalo ngwendi, 6“Omwo vanu ava vanavyana mema a mu Shiloahe#8:6 SHILOAHE: Muna ndonga uje wanenele mema ku Yelusalema kutunda ku Ndonga ya Ngihone. aje enda mwamuvwa nakuziva lyova ku mesho a Mwene Lezine na Mwene Peka, 7yange Kalunga, njikanena mwene wa Asilya na mashwalale vendi voshe ngeci vakulwise Yunda. Vakaija ngwe livazi lya mema a mu Ndonga ya Yufuleti, aje ajalela ku ngenge yayo yoshe. 8Vakakovela mu lifuti lya Yunda mwoshe, ngwe livazi lyakusikisila mu mukoshi nakukupula vyuma vyoshe.”
Njambi ali amo netu! Najangumuna mambava endi mukunyunga lifuti.
9Kungulukileni amolika na lyova, yeni vanu! Tolilileni, yeni muli ku mitambela yakujela ya ano asi. Livwaeseleni cimweja kulwa nzita, oloni ziveni lyova! Eyo, livwaeseleni cimweja, oloni ziveni lyova! 10Tumbeni matumbe eni! Oloni akapwa angoco. Endekeni vyoshe vimushaka! Oloni vyoshe vikapwa vyangoco, omwo Njambi ali amo netu.
Shukulu Kalunga anangula muka-kwimanena
11Shukulu Kalunga wanjikwatele na livoko lyendi lya nzili wanjinangwile ngeci kesi njende mu ngila ije ivalinakwenda vanu. Wendekele ngwendi, 12#1 Pet 3:14-15 “Kesi ukovele ku vutumbe vwa vanu, co kesi uzive lyova lya vyuma vije vivatewa. 13Anuka ngeci yange Kalunga Muka-nzili yoshe, njapwa wakujela, yange lika imunapande kukomoka. 14Omwo Akujela kwange kwakukomokesa, njapwa ngwe limanya lyakutanukisa vanu, njapwa ngwe mweto wakukwikiya vanu va vumwene vwa Yunda na Isalele, na vanu va Yelusalema. 15#1 Pet 2:8 Vavangi vakatanuka, vakawa nakutsenuka. Co vakavafungulula nakuvakokela kulyala.”
Kunangula akwihula vaka-kutsa
16Yeni vandongisi vange, munapande kunyanyama nakunyunga majwi aje ananjana Njambi. 17#VaHe 2:13 Shukulu Kalunga nalishweke ikeye vavenya kuli vanu vendi, oloni yange njinamukulaela, co njinaka cinyangavili cange muli ikeye.
18 #
VaHe 2:13
Yange uno, na vana vaje vananjana Shukulu Kalunga. Tunapu tu vimweso mu Isalele vyakutunda kuli Shukulu Kalunga Muka-nzili yoshe uje wakala a Munkinda wa Siyone.
19Oloni vanu vakamileka kwihula majwi kuli vaka-kulukiya na kuli vaka-kwendeka na vakulu, na vaka-kuningita. Vakendeka ngwavo, “Vanu vanapandele kwihula majwi akutunda ku minzinzime nakwihula vatsi kwimanenako vaka-kuyoya.”
20Co yeni vakumbululeni ngweni, “Tolilileni ku vije vyamilongesa Shukulu Kalunga! Kesi mutolilile kuli vaka-kwendeka na vakulu mbwe, vije vivamileka kuvyasa kumikwasa.”
Simbu ya tuyando
21Vanu vakendangana mu lifuti vakamona kukaluwa na njala. Omo vakaziva njala na vukalu, co vakasinga mwene yavo na Njambi yavo. Vakakenga mwilu, 22nakukenga lalo asi, oloni vyai vakamona, vakamona lika tuyando na lisusulungu, lisusulungu lyakuzivisa lyova muje muvakavombila.
The Bible in Mbunda ©The Bible Society of Zambia, 2006