Isaya 7
7
Majwi ambulwile Isaya kuli Mwene Ahaze
1 #
2 Vim 16:5; 2 Miz 28:5-6 Omo Mwene Ahaze muna Yotame mutekulu wa Uziya washwanene mu Yunda, co kwakele nzita. Mwene Lezine wa Silya, na Peka muna Lemaliya mwene wa mu Isalele, valwisile Yelusalema oloni kuvaifungulwile.
2Omo lijwi lyetele kuli mwene wa mu Yunda ngwavo mashwalale va Silya vanete laja mu lifuti lya Isalele, ikeye na vanu vendi voshe vakele na lyova, co valijajelele ngwe miti ilinakuninganga na lihunzi.
3Shukulu Kalunga wendekele kuli Isaya ngwendi, “Ya na munove Sheyale Njashumbe,#7:3 SHEYALE NJASHUMBE: Lizina eli mu ciHevelu lilumbunuka ngwalyo, vavandondo lika vakeluka. mukaliwane na mwene Ahaze. Mukamuwana ku tapalo kuje kuvakapangela vaka-kutonga vinanga, ku shongo ya kapila kaje kali ku lishali lya ku vulamatelo. 4Mulekeni ananguke, ngeci akale mu kwoloka, co kesi azive lyova nambe kujujuka a vukalu vwakama vwa Mwene Lezine wa ku Silya, na vukalu vwa Mwene Peka vuje vunapu ngwe vimbundi vivali vya tuhya vilinakukakama vwisi. 5Silya, amo na Isalele na mwene wayo, vanalingi munga. 6Vashaka kukovelela Yunda, nakujujwisa vanu ngeci valipandakane navo, asinoni vaake muna Tambele a litanda.
7“Oloni yange Kalunga, njinendeka ngeci evi kuvikalingiwa. 8Omwo vikajo? Omwo Silya kuyesi na nzili yakutuvakana Ndamasiku nganda yayo yakama, co lalo Ndamasiku kuyesi na nzili yakutuvakana Mwene Lezine. Ngeci ali Isalele ni, omo kwita myaka makumi atanu na umo na myaka itanu, vakashandoka kuyikapu lalo muyati. 9Isalele kuyesi na nzili yakutuvakana Samaliya nganda yayo yakama, co samaliya kuyesi na nzili yakutuvakana Mwene Peka.
“Nga kukulaela kweni kucikakolesa, co kumukakolesa embwe.”
Cimweso ca Manuwele
10Shukulu Kalunga watumine lalo lijwi kuli Ahaze ngwendi, 11“Lomba kuli Shukulu Kalunga Njambi yove ngeci akwane cimweso. Cilombe casa kutunda mwa kulova mwisi ya vukalo vwa vatsi nambe mwilu ya melu.”
12Ahaze wakumbulwile ngwendi, “Kunjilombo cimweso embwe, kunjishaka kweseka Shukulu Kalunga.”
13Isaya wamukumbulwile ngwendi, “Tolilileni yeni vatekulwila va Mwene Ndaviti. Mwamuvi manene kupesa vanu, kuma mushaka lalo kupesa Njambi ndi? 14#Mat 1:23 Ngecivene, Shukulu Kalunga ikeye vavenya akamyana cimweso, kengeni mumbanda uje kanda alimone na munalume akakala na limo, co akakita mwana wa munalume, vakamuluka lizina lyendi ‘Manuwele.’#7:14 MANUWELE: Lizina eli mu ciHevelu lilumbunuka ngwalyo, Njambi ali netu. 15Akanwa mavele nakulya vuki noo nazivuka kuvyana vyavivi nakushaka vyavivwa. 16Nameme simbu ije kanda icete, mafuti a vimyene vavali vaje vamizivisa lyova, vakaanyongesa.
17“Shukulu Kalunga akanena ali yove, na ali vanu vove, na ali naanga yoshe ya vumwene, matangwa a tuyando twakama kutuvakana matangwa a tuyando aje akeleko tunde aje vwalitepesele vumwene vwa Isalele na Yunda, ikeye akanena mwene wa Asilya ngeci akumilwise.
18“A litangwa lije, Shukulu Kalunga akakumba mulozi kupwa mutambi kuli vaka-Ingito ngeci vaije ngwe vinzinzi kutunda ku vana va vindonga vya Nailo, na vaAsilya vaije kutunda ku lifuti lyavo ngwe vimuka. 19Vakaija nakutumbama mu vyana, na mu manzenzengoma a mu mamanya, na mu shwata ya mambimbo, na kwoshe-ikwoshe kuje kwakulila vimuna.
20“A litangwa lije, Shukulu Kalunga akalanya muka-kuteula wa musambwa ya Ndonga ya Yufuleti mwene wa vaAsilya! Co ikeye akamiteula minjezi yeni na vin̄ambu vya ku mitwe yeni, na maka aa mivila yeni.
21“A litangwa lije, nameme ndimi nga nakala na ngombe umolika na vimembe vavali, 22vakakala na mavele amangi, co uje ndimi akakala na vyoshe vyanashaka. Eyo, vaje vavandondo vanasalao mu lifuti vakanwa mavele nakulya vuki.
23“A litangwa lije, kwoshe kuje kwakele mikolovozi ya vushuka vwa vinyu yakupwa 1,000 ije yapandele kuyilanda na mavundungulu a siliva akupwa 1,000, ikapwa shwata muje mukamena mambimbo na mishwena. 24Vanu vakaya nakuyombelamo na mata a lusipa na mikili. Eyo, lifuti lyoshe likashula na mishwena na mambimbo. 25Ku malundu kwoshe kuje kwakele nakumena vimbuto, kukamena mambimbo ngeci naumo wai akayako lalo. Ukapwa mutambela wakulila vingombe na vimanga.”
The Bible in Mbunda ©The Bible Society of Zambia, 2006