Isaya 65
65
Njambi akahisa vaka-kutengulukila
1 #
Lom 10:20
Shukulu Kalunga wendekele ngwendi, “Njashakele kukumbulula malombelo a vanu vange, oloni kuvalombelele. Miyati ya vanu kuvanjishakezekele, nameme njashakele ngeci vanjiwane. Kuvalombelele kuli yange, nameme njashakele kuvakumbulula ngwange, ‘Yange uno, njikamikwasa.’ 2#Lom 10:21 Simbu yoshe njilinakushaka kutambula vanu vange, vaje vanakaluwisa manene vimbunge nakulinga vyavivi, nakuya mu vingila vyavo. 3Vakanjiluvalesa nakunjiyeluwisa. Vakombelela vin̄ombelo ku tumponya mu vitungu vyavo vyakujela nakwenyeka insense a mitula yakutunga na livu. 4Ku vutsiki vaya ku manzenzengoma na ku vimbumbo mukwihula ku minzinzime ya vaka-kutsa. Valya situ ya ngulu, co vauvila musozi wa situ yakukombelela ku vin̄ombelo vya vaka-kujeneka kukulaela. 5Co vendeka kuli vakwavo ngwavo, ‘Tushondolokeni, kesi mutushwenye, yetu twalikundika kuli Njambi!’ Kunjasa kumbako mbunge ku vanu va cifwa cangacije, vukalu vwange ali vakevo vunapu ngwe tuhya twa kuzima.
6“Njinayongola laja cihiso cavo, co kusompa kwavo vanacisoneka. Kunjikoloka kuluu a vije vivanalingi, oloni njikavelwisilavwo 7vuvi vwavo na vuvi vwa vakukulwila vavo. Vanenyekela insense ku tuzangu twa a malundu twa vaka-kujeneka kukulaela nakwendeka mwamuvi kuli yange. Ngecivene, njikavahisa ngwe ku vilinga vyavo vije vivalingile simbu ya kunima.”
8Shukulu Kalunga alinakwendeka ngwendi, “Kesi munyongese mikolovozi ya vushuka vwa vinyu, vasa kulingako vinyu. Nambe kunjikanyongesa vanu vange voshe, njikaamena vaje valinakunjipangela. 9Njikavezikisa vanu va Isalele va ku muyati wa Yunda, co vatekulwila vavo, vakafuka lifuti lyange lya minkinda. Vanu vange vakwangula, vaje vanjipangela, vakakala mu lifuti muje. 10#Yos 7:24-26 Vakanjilemesa, co vakatwala vimanga vavo na vingombe vavo ku mwila ku Cana ca Shalone mu kangombe ka yambi na mu Cimbongo ca Tuyando mu ngangela.
11“Oloni kukakala kulyangunuka neni mulinakunjivyana, yeni mulimbulula Siyone, lilundu lyange lyakujela, nakulemesa Ngande na Meni, vinjambi va sande na luvinda. 12Cikapwa luvinda kutsa ku monde, omwo kumwakumbulwile omo njamisanene nambe kutolilila omo njendekele kuli yeni. Yeni kumwanjononokele, oloni mwalingile vyuma vije njazinda. 13Ngecivene, njimileka ngwange vaje vanjilemesa nakunjononoka, vakakala na vyakulya vyavingi na vyakunwa vyavingi, oloni mukakala na njala na lihwila. Vakavwaelela, oloni yeni mukakala na shwamwa. 14Vakaimba nakujolela, oloni yeni mukalila nakupokoka vimbunge. 15Vanu vange vakwangula vakapangesa lizina lyove ngwe cisingo. Yange Kalunga wa Akamwa ya Vyoshe, njikamitsiya. Oloni njikana lizina lyaliha kuli vaje vanjononoka. 16Woshe uje ali mu lifuti ashaka civezikiso, vakamuvezikisa kuli Njambi wa kulongwa. Woshe uje alisinga, alisinge a lizina lya Njambi wa kulongwa. Tuyando twa kunima tukahwa, co vakatwivala.”
Kutanga kwakuhwa
17 #
Isa 66:22; 2 Pet 3:13; Kuj 21:1 Shukulu Kalunga alinakwendeka ngwendi, “Njitanga kaye kakaha na melu amaha. Vyuma vyalaja vikahwa, co vakavivala. 18Vwaeleleni nakujolela myaka yoshe mu vyuma vyaviha vinjinatanga. Yelusalema yaiha injitanga mukakala kujolela, co vanu vamwo vakavwaelela. 19#Kuj 21:4 Nange vavenya njikajolela na Yelusalema na vanu vamwo voshe. Kumukakala kulila, nambe vusiwa. 20Vimbututu kuvakatsi mu vwanike vwavo embwe, vanu voshe vakayoya simbu yakama. Vaje vakayoya myaka 100 vakasholoka anga vene ngwe vanike. Kutsa omo kanda simbu ije icete cikapwa cimweso ngeci yange njinavahisa. 21Vanu vange vakatunga vinjuvo vyavo, co vakakuna vitungu vya mikolovozi ya vushuka vwa vinyu nakulya vushuka vwakwo. 22Kuvakatungila vakwavo veka vinjuvo, co lalo kuvakakunina vakwavo veka vitungu vya mikolovozi ya vushuka vwa vinyu ngeci valye, vanu vange vanjaangwile vakayoya simbu yakama ngwe miti nakujolela na vipangi vyavo. 23Vipangi vyavo kuvikai mwangoco, co vana vavo kuvakavindama. Njikavezikisa vana vavo amo na vatekulwila vavo simbu yoshe ya kulutwe. 24Njikakumbulula malombelo avo simbu kanda vacimanese kulombela. 25#Isa 11:6-9 Tungunga na vana va vimanga vakalya amo, vindumba na vingombe vakalya mwila, na manyoka vakalya livu. Kuvakashumu nambe kuvulumuna munu umo, a Siyone lilundu lyange lyakujela.”
The Bible in Mbunda ©The Bible Society of Zambia, 2006