Isaya 64
64
1Angununa melu ushelumukile ano asi! Ngeci minkinda ijaje omo ikumona. 2Pwa ngwe tuhya tuje tutupwisa mema. Ija usholole nzili yove kuli vitozi vove, na miyati ya vanu vajaje omwo uli kuyehi navo! 3Kwakele simbu imo wezile, co walingile vyuma vyakukomokesa vije kutwayongwele, minkinda yaningangele omwo wakele muyehi. 4#1 Koli 2:9 Naumo wai wamwene nambe wazivile Njambi wakufwa ngwe yove, uje muka-kulingila vyuma vyakukomokesa kuli vaje vaaka cinyangavili cavo muli yove. 5Yove ukakwasa vaje vajolela mukwononoka na mukulinga vyuma vya vushunga, vanu vaje vanuka kuyoya muje muushaka yove ngeci vayoyemo. Yove waluvalele netu, omwo twalingile vuvi, nameme wakele na vukalu vwakama, oloni yetu tunakala nakulinga vuvi kutunda ku san̄ulu. 6Yetu voshe tunapu vaka-vuvi, nameme vilinga vyetu vyavivwa vinapu vyakujwala simbu yoshe. Omwo vuvi vwetu, yetu tunapu ngwe maputa akujujwama, co apekumuka na lihunzi. 7Naumo wai ali na kukulemesa, co naumo wai alinakumwesa kulongwa kwendi kuli yove. Yove unatukengesa nima, co unatuseze ngeci vuvi vwetu vutunyongese.
8Oloni yove Shukulu Kalunga wapwa u tatetu. Yetu tunapu ngwe vuma, co yove unapu ngwe muka-kushonga. Yove watutangele, 9kesi uluvale manene netu embwe, nambe kesi utuyongwele vuvi vwetu ku myaka yoshe. Anuka ngwove yetu tu vanu vove, tuzivileko mema ku mbunge. 10Vinganda vyove vyakujela vinafu ngwe mambo, Yelusalema inapu ngundu, 11co Njuvo yove, mwela wakujela wauvwa kuje vakukulwila vetu vakulemeselele, vanainyongesa na tuhya. Vinjuvo vyetu vyoshe vyavivwa vinasiwuka. 12Yove Shukulu Kalunga, vatijo utumbama lika kuluu akumona vyuma vyoshe evi nakutava ngeci tuyande ndi?
The Bible in Mbunda ©The Bible Society of Zambia, 2006