Isaya 66
66
Shukulu Kalunga asompa miyati
1 #
Mat 5:34,35; 23:22 Shukulu Kalunga alinakwendeka ngwendi, “Lilu lyapwa litanda lyange, co ano asi apwa vulyatelo vwange. Njuvo ya cifwa mukajo mwasa kunjitungila? Mutambela wa cifwa mukajo munjikala yange? #Vil 7:49-50 2Yange vene njatangele vyuma vyoshe! Njivwaelela na vaje valilumbilisa nakutengulukila kuli yange, vaje vanjikomoka nakunjononoka.
3“Vanu valinakulinga ngwe mucavavwasela. Kuli vakevo vyoshe vyafwa mumo nambe vatsiya ngombe wa nkomba wa n̄ombelo nambe vakombelela munu, nambe vakombelela muna manga nambe vatukula mukoshi wa katali, nambe vaana n̄ombelo ya vimbuto vya vinona, nambe vakombelela maninga a vangulu, nambe vakombelela insense, nambe valombela ku kamponya. Vavwaelela a vingila vyavo vya vuvi vyakulemesa. 4Ngecivene, njikanena tuyando twakama ali vakevo, vyuma vivazivila lyova manene, omwo naumo wai wakumbulwile omo njasanene, nameme kutolilila omo njendekele. Co valingile vyavivi ku mesho ange, vaangwile vije kuvyanjivwaelesele.”
5Tolilileni vije vyalinakwendeka Shukulu Kalunga, yeni vaka-kumukomoka nakumwononoka ngwendi, “Vandolome veni vamizinda nakumivyana omwo munapu vaka-kulongwa kuli yange. Vamishendumuna nakwendeka ngwavo, ‘Shukulu Kalunga amwese nzili yendi nakumyamena, ngeci tumone kujolela kweni.’ Oloni ava vendeka vyuma evi vakaziva shwamwa yakama! 6Tolilileni muyoyo wakama uje uli mu nganda, na cililimo cije cili mu Njuvo ya Shukulu Kalunga, cinapu cililimo ca Shukulu Kalunga ahisa vitozi vendi!
7 #
Kuj 12:5
“Nganda yange yakujela inalifu ngwe munakazi uje akita mbututu vwasi-vwasi kujeneka kuziva mushongo. 8Kwali munu umo wamonao laja cuma eci nambe kuziva cuma ca cifwa cangacije ndi? Kuma muyati wa vanu wasemukile litangwa limolika ndi? Siyone kuyikasa kuyanda lalo simbu yakama embwe, omo kanda muyati wa vanu usemuke. 9Shukulu Kalunga ikeye muka-kwasiwisa kusemuka.” Mukemwo mwanendeka Shukulu Kalunga.
10Yeni voshe mwazema nganda eyi,
joleleni na Yelusalema,
nakuvwaelela nayo!
Yeni voshe mwakele nakuyililila,
ololo joleleni amo nayo!
11Mukavwaelela akuvezika kwayo,
ngwe mwanike avwaelela ku mavele a vaina.
12Shukulu Kalunga alinakwendeka ngwendi, “Njikamihwimisa ku myaka yoshe, vufuko vwa mafuti vukaita ngwe ndonga ya muta uje kuwesi kuma. Mukapwa ngwe mwanike uje ivajamwesa vaina mwamuvwa, nakumwambata mu shivu, nakumwongozola na cizemo. 13Njikamizembeleka mu Yelusalema, ngwe cisemi azembeleka munendi. 14Omo mukamona vyuma evi vilingiwa, co mukavwaelela, cikamilingisa kukala na nzili na vuvwa. Asinoni mukazivuka ngweni yange Kalunga, njikwasa vaje vaka-kunjononoka, co njikamwesa vukalu vwange kuli vitozi vange.”
15Shukulu Kalunga akaija na tuhya, co matemba endi akapwa ngwe kankumba. Akaluvala manene, akahisa vitozi vendi na tuhya. 16Mukwale wendi wa tuhya ukanena vushunga kwoshe-ikwoshe ano asi nakutsiya vanu vavangi.
17Shukulu Kalunga alinakwendeka ngwendi, “Vaje vaka-kulijelesa vakevo vavenya nakuya mu mahya akujela nakulya situ ya vingulu, na vimuku na vyuma vyeka vya vunyengwe, vakavanyongesa. 18Njizivuka viyongola vyavo na vilinga vyavo. Njilinakwija nakukungulula vanu va miyati yoshe. Omo vakakungulukila amo, vakamona nzili yange muyafwa, 19co vakazivuka ngeci yange muka-kuvahisa.
“Oloni ali vakevo njikasezao vamo, co njikavatuma ku miyati ya ku mafuti a kulyala vaje kuvazivile lutsimo lwange nambe kumona vukama vwange na nzili, ku Sipeini, Limbiya, na Lindiya, na vanalume vamwo vaka-vutongwe vwakwasha na mikili, na ku Tuvale, na ku Ngelese. Akati ka miyati ije vakambulula vukama vwange. 20Vakelwisa vavushoko vweni vaje vali mu mafuti oshe ku lilundu lyange lyakujela mu Yelusalema a tuvalu, na vimulu, na tumelo, na mu matemba na mu makalu, cikafwa ngwe vaIsalele vanena mulambu wa vimbuto vya vinona ku Njuvo yange a malonga akujela. 21Vamo njikavapwisa vaka-kukombelela na vaLevi.
22 #
Isa 65:17; 2 Pet 3:13; Kuj 21:1 “Ngwe kaye kakaha na melu amaha vikeshwala simbu yakama, ngecivene, vatekulwila vove na lizina lyove vikeshwala. 23A ngonde yoshe yakulivanga na a Ciwano ca Kutenama kwa Ngonde na a Litangwa Lyakuhwima, vanu va miyati yoshe vakaija nakunjilemesa muno mu Yelusalema.” Mukemwo mwanendeka Shukulu Kalunga. 24#Mak 9:48 “Omo vatuuka, co vakamona mivila ya vaje vanjitengulukilile nakunjilwisa. Mainyo kuvakatsi embwe, co tuhya kutukazimi. Vanu voshe vakaziva shwamwa akumona vyuma evi.”
The Bible in Mbunda ©The Bible Society of Zambia, 2006