Isaya 60
60
Vumpau vwa kulutwe vwa Yelusalema
1Induka, Yelusalema,
vyazima ngwe litangwa,
omwo ceke cove cinaija,
na vumpau vwa Shukulu Kalunga
vulinakuvyazima ali yove!
2Lisusulungu likafwika miyati yeka,
oloni ceke ca Shukulu Kalunga
cikavyazima ali yove,
ceke cendi cikakala amo nove.
3Miyati ya vanu vakavashwenyesa ku ceke cove,
co vimyene vakavashwenyesa
ku litangwa lyove lyaliha.
4Kenga mesho ove noku-noku,
umone vije vilinakulingiwa,
vanu vove valinakukunguluka vaije kwimbo!
Vana vove va vanalume vakatunda kulyala,
vana vove va vanakazi vakavambata
ngwe vana vavandondo.
5Ukamona vyuma evi,
co ukajolela manene,
co mbunge yove ikashula nakujolela.
Vufuko vwa miyati ya vanu veka
vakavunena kuli yove,
vukatunda musambwa ya mema a kalunga.
6Matanga akama a tumelo,
akatunda ku Mindyani na Efa.
Vanu va Shemba vakanena ngolinde,
na insense mukushangazala
Shukulu Kalunga!
7Vimanga voshe va ku Kendale
na ku Nembayote
Vakavanena kuli yove mukuvakombelela.
Vakavakombelela a mutula
mukuvwaelelesa Shukulu Kalunga.
Co njikashangazala Njuvo yange ya vumpau.
8Mato avikajo awa alinakupekumuka
ngwe mashelwa?
Ngwe tutela vaje veluka ku mashwa avo?
9Anapu mato aje atunda ku mafuti a kulyala,
ali na kwilwisa vanu va Njambi
kwimbo lyavo.
Valinakwiluka na siliva na ngolinde,
mukusingimika lizina
lya Shukulu Kalunga,
Njambi wakujela wa Isalele,
uje nalingisa miyati ya vanu voshe
ngeci vasingimike vanu vendi.
10Shukulu Kalunga alinakwendeka
ku Yelusalema ngwendi,
“Yelusalema, vaka-kwija vakatungulula
vivumbe vyove,
co vimyene vavo vakakupangela.
Njakuhisile omwo vukalu vwange,
oloni ololo njikakumwesa
kutetela kwange,
na mema ku mbunge ange.
11 #
Kuj 21:25-26
Vikolo vyove vikashokoloka
mutanya na vutsiki,
ngeci vimyene va miyati ya vanu yeka
vakunenele vufuko vwavo.
12Miyati ya vanu vaje vakavyana kukupangela
vakainyongesa njwa.
13“Viti vya tulipi, na njunipa, na sipelese,
viti vyavivwa vya mu shwata ya Lembanone,
vakavinena mukukutungulula yove Yelusalema,
mukuvwaesa vuvwa Njuvo yange,
nakulingisa vumpau nganda yange.
14 #
Kuj 3:9
Vatekulwila va vaje vakuyandesele
vakaija nakutsikama kuli yove
mukumwesa kasingimiko kavo.
Voshe vaje vakuyeluwisile
vakatsikama kuli yove, nakwendeka ngwavo,
‘Yove Siyone nganda ya Shukulu Kalunga,
Njambi wakujela wa Isalele.’
15“Nameme vakwivalele nakukuzinda,
njikakupwisa nganda yakama yaivwa,
mutambela wa kulyalesa nawo ku myaka yoshe.
16Miyati ya vanu voshe na vimyene
vakakunyunga ngwe cisemi alela munendi.
Co ukazivuka ngeci yange,
Kalunga Muka-nzili yoshe Njambi wa Isalele,
njinakwamena nakukupatula.
17“Njikakunenela ngolinde
kwingisa mu vunengu.
Njikakunenela siliva na vunengu
kwingisa mu vutale na citi,
njikakunenela vutale kwingisa mu limanya.
Vaka-kushwana kuvakakuyandesa lalo,
vakashwana na vushunga na kwoloka.
18Kukukakala lalo lipakeso
mu lifuti lyove, nambe kulitsiya
nambe kulinyongesa mu lifuti lyove embwe.
Njikakunyunga nakukwimanena ngwe civumbe,
ukanjishangazala omwo yange njinakwamena.
19 #
Kuj 21:23; 22:5 b “Litangwa kulikapu lalo ceke cove ku simbu ya mutanya,
nambe ngonde kutwa lyezi ku simbu ya vutsiki,
yange Kalunga,
njikapwa ceke cove ku myaka yoshe,
Njambi yove ikeye akapwa vumpau vwove,
20Matangwa akuviilila kwove akahwa.
Yange Kalunga,
njikapwa ceke cove ku myaka yoshe
ceke cije kucesi kuhwa
catuvakana ceke ca litangwa na ngonde.
21Vanu vove voshe vakapwa vaka-vushunga,
vakashwana lifuti ku myaka yoshe.
Njavakunine, nakuvatanga,
ngeci vasholole vukama vwange ku vanu voshe.
22Nameme naanga yove yaindondo na kulikeesa,
oloni vakapwa muyati wakama wa nzili.
Omo simbu ikaija, yange Kalunga
njikalinga vyuma evi vwasi-vwasi!”
The Bible in Mbunda ©The Bible Society of Zambia, 2006