Isaya 59
59
Muka-kwimanena ahisa vuvi vwa vanu
1Kesi muyongole ngweni Shukulu Kalunga wapwa wakuzeya manene mukumyamena, nambe wapwa kasinda-matwi manene mukuziva malombelo eni ngeci amikwase embwe! 2Oloni vuvi vweni vukevwo vunamyangununa na Njambi yeni. Njambi kesi kuziva malombelo eni omwo vuvi vweni. 3Vyendeka vyeni vinashulu na makuli na matumbe a muuka, na mavoko eni anashulu na maninga.
4Muya ku mbanja, oloni kumwesi na vushunga. Mukalingi matumbe eni akuvulumuna vakweni. 5Matumbe awa mulinakulinga anapu amavi ngwe mavunda a linyoka wa vushungu. Nga utivao limo, co mutuuka linyoka. 6Oloni matumbe eni kesi amamvwa embwe, akewo anapu angoco ngwe vwanda vwa kavuvi! 7Simbu yoshe mutumba matumbe a vyuma vya vuvi, co mukawalingi vwasi-vwasi. Mukazambula mukutsiya vanu vakujeneka mulonga. Kwoshe kumuya mukasezako vingundu nakuviisako, 8#Lom 3:15-17 kumuzivuka kukala mu kwoloka. Vyuma vyoshe mukalingi vyapwa vyakujeneka vushunga. Mukakavangeya vingila vya kupenga-penga, na voshe vaje vamikavangeya kuvesi kuwana kwoloka.
Vanu valitavela vuvi vwavo
9Vanu valinakwendeka ngwavo, “Ololo twazivuka omwo vikajo Njambi katwamenene kuli vaje valinakutuyandesa. Twakele na cinyangavili cakwendela mu ceke, oloni kuli lika lisusulungu, 10tulinakwenda nakupapateya ngwe tupuputwa. Tutanozoka mutanya mwelu, ngwe vutsiki, ngwe tuli mu lisusulungu lya vukalo vwa vatsi. 11Tuli na lyova na vusiwa. Tushaka Njambi atwamene ku tuyando na vuvi, oloni nacimo cilingiwa cai.
12“Shukulu Kalunga, milonga yetu ku mesho ove yaingi manene. Vuvi vwetu vulinakutuhisa. Twavuzivuka. 13Twakutengulukila, nakuvyana kukukava. Twayandesele vakwetu nakutunda kuli yove. Viyongola vyetu vinapu vya makuli, na majwi etu anapu a makuli. 14Kulongwa kunahu, na vushunga kuvwesiko lalo. Vushunga vunahumo mu mbanja, co kulongwa kwaiko lalo. 15Kulongwa kunapu kwakundondo. Woshe uje alikela kulinga vuvi alimona ali na mulonga.”
Shukulu Kalunga alivwaesela kupatula vanu vendi
Shukulu Kalunga namono evi, co ikeye kesi nakuvwaelela omwo kukwesi vushunga. 16#Isa 63:5 Ikeye nalikomokela manene akumona ngeci kukwesi uje akwasa vaka-kuyanda. Ngecivene, akapangesa livoko lyendi lya nzili mukuvapatula nakuhyana. 17#Efe 6:14,17; 1 Tes 5:8 Akazala kulongwa ngwe cikoveyo ca nzita ca a nulo, kwamena kupwa ngwe tepa ya nzita ya ku mutwe. Vukalu na shambandinga vikapwa ngwe vuzalo vwendi. 18Akahisa vitozi ngwe a vije vivalingile ku vanu vendi, nameme vene vitozi vaje vali ku mafuti a kulyala. 19Kutunda mu ngangela nakweta mu kangombe ka yambi, vanu voshe vakakomoka vukama vwa nzili yendi. Akaija ngwe mema a cingungu-muta, ngwe lihunzi lyakama.
20 #
Lom 11:26
Shukulu Kalunga alinakwendeka kuli vanu vendi ngwendi, “Njikaija ku Yelusalema, nakumimanena nakumyamena yeni voshe vaje vanatenguluka ku vuvi vweni. 21Njilinakulikumiiya cikumiiyo neni, njinamyana Munzinzime wange na vilongesa vyange kupwa vyeni ku myaka yoshe, co kutunda lelo nakutwala kulutwe, munapande kunjononoka nakulongesa vana veni, na vatekulwila veni kunjononoka visimbu vyoshe vikaija kulutwe.”
The Bible in Mbunda ©The Bible Society of Zambia, 2006