Isaya 54
54
Cizemo ca Shukulu Kalunga kuli Isalele
1 #
Ngala 4:27
Yelusalema, unafu ngwe munakazi
wa vana,
oloni ololo wasa kwimba
nakutambeka nakujolela.
Ololo ukakala na vana vavangi
kutuvakana munakazi uje
nashomboka simbu yakama.
2Amesa mbalaka muulinakukala!
Nungila ku mikole,
co kolesa ku vipampalingo!
3Ukambata mitambela ya mafuti eka,
vanu vove vakeluka mu lifuti
muje muli miyati yeka ololo.
Vinganda vije vyapwile vingundu
vikashula lalo na vanu.
4Kesi uzive lyova,
nambe kuziva shwamwa,
kuukashauka lalo embwe.
Ukevala kujeneka kulongwa kwove
a simbu ya vwanike vwove,
kesi uzive shwamwa akupwa ufwile.
5Ishamatanga wove
akapwa ngwe munalume wove,
ikeye Shukulu Kalunga Muka-nzili yoshe,
Njambi wakujela wa Isalele,
ikeye muka-kushika a kaye koshe,
co akakwamena.
6Isalele, yove unapu ngwe mumbanda
uje yanaseza munalume wendi,
co ali mu vusiwa vwakama.
Oloni Shukulu Kalunga akusana
wiluke kuli ikeye,
alinakwendeka ngwendi,
7“Njakusezele kasimbu kakandondo lika,
omwo a cizemo cange cakama
njikakwilwisa lalo.
8Omwo njaluvalele njakusezele
kasimbu kakandondo lika,
oloni njikakumwesa cizemo cange
ku myaka yoshe.
Ngwendi Shukulu Kalunga
uje muka-kukwamena.
9 #
Kus 9:8-17
“Njakulaesele Nowa ngwange,
nalumo lwai njikanena lalo livazi ano asi.
Ololo njikukulaesa ngwange
kunjikaluvala nove lalo embwe,
nambe kukunyanyamesa.
10Minkinda na malundu vikazimangana,
oloni cizemo cange ali yeni kucikahu,
njikanyunga cikumiiyo cange
cakumyana kwoloka ku myaka yoshe.”
Ngwendi Shukulu Kalunga uje wakuzema.
Yelusalema ije ikaija kulutwe
11 #
Kuj 21:18-21
Shukulu Kalunga alinakwendeka ngwendi,
“Yelusalema, nganda ya tuyando,
na nganda yakujeneka seo,
naumo wai akakuzembeleka,
njikatungulula luvula lwove
na mamanya a seo yakama.
12Njikatunga tuposhi twove na mamanya a lumbi,
vikolo vyove njikavitunga na mamanya
aje akuvyazima ngwe tuhya,
njikazengeleka civumbe na mamanya a seo.
13 #
Yow 6:45
“Yange vene njikalongesa vanu vove,
nakuvavezikisa na kwoloka.
14Vushunga na vuvwa vikakukolesa.
Ukakala mwamuvwa kuvakakuyandesa
nambe kukuzivisa lyova.
15Nga munu akakulwisa,
ikeye vavenya alinakucilinga,
kesi yange njinamutumu embwe.
Woshe uje akakulwisa akawa.
16“Yange njatangele muka-kufula,
uje akafulu vitwa a tuhya.
Yange lalo njatangele lishwalale,
uje muka-kupangesa vije vitwa mukutsiya.
17Oloni kukwesi citwa cikasa kukuvulumuna,
ukasa kukumbulula vaje voshe
vakendeka majwi a makuli ali yove.
Njikemanena vangamba vange nakuvahyanesa.”
Mwanendeka Shukulu Kalunga.
The Bible in Mbunda ©The Bible Society of Zambia, 2006