Isaya 55
55
Njambi azivila vanu mema ku mbunge
1Shukulu Kalunga alinakwendeka ngwendi,
“Nga muli na lihwila,
ijeni munwe mema!
Nga kumwesi na vimbongo,
ijeni mulye vije vimushaka!
Ijeni mwakunwe vinyu na mavele,
kujeneka kuvilanda na vimbongo!
2Omwo vikajo muviisila vimbongo
a vyuma vije kuvyapwile vyakulya?
Omwo vikajo muundanganena cuma
cije kucasa kumikutisa?
Tolilileni kuli yange
nakulinga vije njendeka,
co mukavwaelela na vyakulya vyavivwa manene.
3“Yeni vanu vange tolilileni,
ijeni kuli yange,
co mukakala na mwonyo!
Njikalikumiiya neni cikumiiyo ca myaka yoshe,
nakumivezikisa vivezikiso
vije vinjakulaesele Ndaviti.
4Njamupwisile ntwama
na muka-kushika miyati ya vanu,
co wapwile mukaleo wange kuli vakevo.
5Ololo mukasana miyati yeka,
ije kumwazivukile akulivanga,
oloni vakaija lumbisi nakulipandakana neni!
Yange Kalunga, Njambi yeni,
Njambi wakujela wa Isalele,
njikalinga ngeci vyoshe evi vinapande kulingiwa,
njikamishangazala nakumyana vumpau.”
6Tengulukileni kuli Shukulu Kalunga
nakulombela kuli ikeye
omo acili muyehi.
7Vaka-vuvi vecele vilinga vyavo vya vuvi,
co vatengulule viyongola vyavo.
Vatengulukile kuli Shukulu Kalunga Njambi yetu,
ikeye muka-mema ku mbunge na muka-kusambesa vwasi.
8Shukulu Kalunga alinakwendeka ngwendi,
“Viyongola vyange kuvyafwile
ngwe viyongola vyeni embwe,
na vingila vyange vinalyangunuka
na vingila vyeni.
9Ngwe melu muwakala akamwa ya asi,
ngecivene, vingila vyange,
na viyongola vyange
vili akamwa ya vingila
na viyongola vyeni.
10 #
2 Koli 9:10
“Lijwi lyange linapu ngwe nyonzi
ya vusuku-mbundu
na nyonzi ije itunda kwilu
nakujulisa asi aje akamene vimbuto vyakukuna,
na vimbuto vya vinona vyakulya.
11Omu mukemwo muwapwa majwi ange,
majwi ange kuwakeluka kuli yange,
kujeneka kulinga vije njawatumine
ngeci awalinge.
12Mukatunda mu Mbambilone nakujolela,
vakamitwamenena mu kwoloka kutunda mu nganda.
Minkinda na malundu
vikaimba ngwe vanu omo mwita,
na miti lalo ikatambeka nakujolela ngwe vanu.
13Miti ya sipelese na cinyota
ikamena mu mutambela muje mwakele mambimbo.
Miti eyi ikapwa cizivukiso
ca vumpau vwa Shukulu Kalunga
ku myaka yoshe.”
The Bible in Mbunda ©The Bible Society of Zambia, 2006