Isaya 51
51
Majwi akuzembeleka Yelusalema
1Shukulu Kalunga alinakwendeka ngwendi,
“Tolilileni kuli yange,
yeni mushaka kumyamena,
yeni mwija kuli yange mukumikwasa.
Yongoleni limanya kuje kumwatundile,
na ku mbulu kuje kuvamiindile.
2Yongoleni kukulwila yeni Avilahama,
na Sala, kuje kwatunda naanga yeni.
Omo njasanene Avilahama,
kakele na vana vai,
oloni njamuvezikisile nakumwana vana,
njatumisile manene vatekulwila vendi.
3“Njikazivila mema ku mbunge Yelusalema,
na voshe vaje valinakuyoya mu ngundu yendi.
Nameme lifuti lyavo linapu mambo,
njikalipwisa ngwe citungu ca Endeni
cije cinjakunine.
Yelusalema ikajolela nakuvwaelela,
ikaimba myaso yakushangazala
nakukandelela kuli yange.
4“Vanu vange tolilileni kuli yange,
tolilileni ku vije njendeka.
Njana vilongesa vyange ku miyati ya vanu,
mashiko ange akavatwila ceke.
5Mafuti a kulyala anavandamena
na cinyangavili kwija kwange mukuvamena.
Njikaija vwasi-vwasi mukwamena nakushika mafuti.
6Kengeni kwilu, co kengeni lalo asi,
lilu likahwa vwasi ngwe vwisi,
na lifuti likasanyozoka ngwe vuzalo vwalaja,
co vanu vamwo voshe vakatsa ngwe vinzinzi.
Oloni kwamena kwange
kukapwa kwa myaka yoshe,
kuhyana kwange kukapwa kwa myaka yoshe.
7“Tolilileni kuli yange,
yeni muzivuka vije vya vushunga,
yeni vanu vange munanyungu vilongesa
vyange mu vimbunge vyeni.
Kesi muzive lyova
omo vanu vamishaula,
8vakahwa njwa ngwe vuzalo
vwakuliwa ku tunembulu!
Oloni kwamena kwange
kukapwa kwa myaka yoshe,
kuhyana kwange kukakala visimbu vyoshe.”
9Induka, Shukulu Kalunga nakutukwasa!
Pangesa nzili yove nakutwamena,
ipangese ngwe muwaipangesele
ku visimbu vya ku san̄ulu.
Yove wapunzwile cikashama Lahave#51:9 LAHAVE: Amo eli lijwi lilumbununa Ingito a simbu ije vaIsalele vatundile mu lifuti eli.
wa mu mema a kalunga vipuka-vipuka.
10Yove lalo womisile mema a kalunga cau,
nakutenda ngila mukati ka mema,
ngeci vanu vove vase kujavuka.
11Vaje vawapatwile
vaketa mu Yelusalema nakuvwaelela,
vakaimba nakutambeka nakujolela.
Vakavwaelela ku myaka yoshe,
vanapatuka ku vusiwa nakukuviilila ku myaka yoshe.
12Shukulu Kalunga nendeka ngwendi,
“Yange muka-kumitakamesa.
Omwo vikajo muzivila lyova munu,
uje ikeye oma na kutsa ngwe mwila?
13Kuma munevala Shukulu Kalunga uje wamitangele,
uje wajangumwine melu,
nakujala luvula lwa asi ndi?
Omwo vikajo mukela na lyova lya vaje
vamiluvalela nakumishaula simbu yoshe,
vaje vashaka kuminyongesa?
Vukalu vwavo kuvwasa kuminyongesa embwe.
14Vaje vanapu vinzinda ololo vakapwa vaka-kupatuka,
vakayoya myaka yaingi,
nakukala na vyakulya vyoshe
vije vanajeneka.
15“Yange Shukulu Kalunga Njambi yeni,
Muka-nzili yoshe,
njikavundula mema a kalunga,
nakulumisa mankimba amwo.
16Njajangumwine melu
nakujala luvula lwa asi,
njendeka kuli Yelusalema ngwange,
‘Yeni munapu vanu vange! Njamyana mashiko,
co njikunyunga na livoko lyange.’ ”
Mamaneselelo a tuyando twa Yelusalema
17 #
Kuj 14:10; 16:19 Yelusalema, induka!
Katuka wimane!
Unanu mu nganja ya vukalu
vwa Shukulu Kalunga
wainwile nakuyimanesa,
co wapelyangelele.
18Kukwesi akamitwamenena lalo wai,
naumo wai akati ka vanu vove
akakukwata ku livoko.
19Tuyando twakama tunaija ali yove,
nzita inashandozola lifuti lyove,
co vanu vove valinakutsa ku njala.
Naumo wai akuzivilako mema ku mbunge.
20Ku vimbango vya vitapalo vyoshe
vanu vove valinakulezumuka omwo kuzeya,
vanafu ngwe mbambi natsi mu mweto wa ciyambi.
Vanazivi nzili ya vukalu vwa Njambi.
21Yeni vanu vaka-kuyanda va mu Yelusalema
yeni vaka-kupelyangela ngwe munapende,
22Shukulu Kalunga Njambi yeni
alinakumimanena nakwendeka ngwendi,
“Njilinakutundisa ije nganja
injamyanene ya vukalu vwange.
Kumukanu vinyu ngeci mupelyangele embwe.
23Oloni nganja eyi njikayana kuli vaje vamiyandesele,
nakumilyatangela mu vitapalo ngwe mazilo.”
The Bible in Mbunda ©The Bible Society of Zambia, 2006