Isaya 50
50
1Shukulu Kalunga alinakwendeka ngwendi,
“Kuma mwayongola ngweni njashekele vanyoko,
nambe kuvalandesa mukufweta mulonga?
Ilikulijo mikanda yakumukondwesa?
Kuma mwayongola ngweni
njamilandesele ngeci vakamifuke
ngwe munalume uje alandesa vana vendi
kuvapwisa vindungo ndi?
Embwe, mwaile nakumifuka
omwo a vuvi vweni,
vamitumine kulyala omwo a milonga yeni.
2“Omwo vikajo vanu vange
vonwele kukumbulula
omo njaile kuli vakevo ngeci njivamene?
Vikajo kuvakumbulwile omo njavasanene?
Kuma kunjesi na nzili yakuvamena ndi?
Mukuluvala kwange njasa kumisa mema a kalunga,
na vindonga kuvitengulula mambo,
ngeci visi valimo vatse a mema.
3Njasa kutengulula lilu kupwa lyakuzivala,
ngwe vikeleya vije mukazala, omo mulila vatsi.”
Kwononoka kwa ngamba ya Shukulu Kalunga
4Shukulu Kalunga wa Akamwa ya Vyoshe
nanjilongesa vije vyakwendeka,
ngeci njase kutakamesa vaje vanajuka.
A mutondo na mutondo
akanjiindula ngeci njizive vije vyanjilongesa.
5Shukulu Kalunga nashokolola
matwi ange ngeci njizive,
co kunjamutengulukilile
nambe kutunda kuli ikeye.
6 #
Mat 26:67; Mak 14:65 Njavatavele ngeci vanjipupe a mwongo,
nakushuta munjezi wange,
kunjavavindikile omo vanjishawile
nakujekwila ku mesho ange.
7Oloni kunjishaula kucasa kunjizivisa shwamwa,
omwo Shukulu Kalunga
wa Akamwa ya Vyoshe anjikwasa.
Njazivuka ngeci kunjikazivi shwamwa,
8 #
Lom 8:33-34
omwo Njambi ali kuyehi nange,
co akamwesa ngeci kunjesi na mulonga.
Kuma kwali wakusimpa
uje asa kunjisompa ndi?
Ijeni tuye amo ku mbanja!
Mweceleni anene n̄anda yendi!
9Shukulu Kalunga wa Akamwa ya Vyoshe
ikeye muka-kunjimanena, iyajo anjana mulonga?
Vaka-kunjivangeya voshe vakahwa njwa,
vakanyonga ngwe nanga yakuliwa ku tunembulu.
10Yeni voshe vaje musingimika Shukulu Kalunga,
nakwononoka majwi a ngamba yendi,
ngila mulinakwenda yasa kupwa ya lisusulungu,
oloni kulaeleni nakujendamena,
ali Shukulu Kalunga Njambi yeni.
11Yeni voshe vaje vali na vutumbe
vwakunyongesa vakweni,
matumbe eni akaminyongesa yeni vavenya.
Shukulu Kalunga akamona ngeci
vyuma evi vilingiwa,
mukayanda tuyando twakama.
The Bible in Mbunda ©The Bible Society of Zambia, 2006