Isaya 49
49
Isalele wapwa ceke ku vaka-mafuti
1 #
Njele 1:5
Yeni mafuti a kulyala tolilileni kuli yange,
yeni vanu mwakala kulyala!
Omo kanda njisemuke,
Shukulu Kalunga wanjangwile,
co wanjimikile kupwa ngamba yendi.
2Ikeye walingisile majwi ange
kuvambuka ngwe moko ya mukwale,
nambe ngwe mukili wakushongomoka,
wakukalwila cimweja.
Wanjinyungile mwamuvwa
na livoko lyendi.
3Wendekele kuli yange ngwendi,
“Isalele yove unapu ngamba yange,
omwo ali yove, vanu vakanjishangazala.”
4Njendekele ngwange, “Njinapanga, oloni vipangi vyange
vinapu vyangoco!
Njapangesa nzili yange yoshe,
oloni nacimo cai cinjinamanesa.”
Oloni nameme ngoco,
vije vyanjipande vili mu mavoka a Shukulu Kalunga,
co Njambi yange akanjana cikandelela a vije njilinakulinga.
5Omo kanda njisemuke,
Shukulu Kalunga wanjangwile,
ngeci njimupangele,
nakwilwisa vanu va Isalele
vaje vanashandoka.
Shukulu Kalunga nanjana kasingimiko,
nakunjipwisa munu wa nzili.
6 #
Isa 42:6; Luk 2:32; Vil 13:47; 26:23 Shukulu Kalunga wendekele
kuli yange ngwendi,
“Njili na vipangi vyakama ali yove,
ngamba yange.
Kesi lika vipangi vyakwilwisa
vanu va Isalele vaje vanasalao embwe,
oloni njinakwaka ano ngeci upwe ceke
ku vaka-mafuti,
ngeci vaka-kaye voshe vovoke.”
7Njambi wakujela wa Isalele
na muyoyesi nendeka kuli uje uvayengula vanu,
uje ivazinda vaka-mafuti,
nakupwa ngamba ya vaka-kushwana ngwendi,
“Vimyene vakakumona omo ukapatuka,
co vakemana mukumwesa kasingimiko kavo,
na vana va vimyene lalo vakacimona,
co vakakulama nakukusingimika.”
Eci cikalingiwa omwo Shukulu Kalunga,
naangula ngamba yendi,
Njambi wakujela wa Isalele,
muka-kunyunga cikulaeso cendi.
Shukulu Kalunga elwisa vanu vendi mu Yelusalema
8 #
2 Koli 6:2
Shukulu Kalunga alinakwendeka
kuli vanu vendi ngwendi,
“Omo simbu yakumyamena yeta,
njikakumbulula malombelo eni
nakumimwesa ngozi yange,
njikamikongweya nakuminyunga,
co muli yeni njikalinga cikumiiyo na vanu voshe.
Co njikamitava mutunge lalo
mu lifuti lyeni lije ololo linapu ngundu.
9Njikendeka kuli vinzinda ngwange,
‘Yeni munapatuka!’
Njikendeka lalo kuli vaje vali mu lisusulungu ngwange,
‘Ijeni ku ceke!’
Vakafwa ngwe vimanga vaje valinakulila mwila a malundu,
10 #
Kuj 7:16-17
kuvakakala na njala nambe na lihwila.
Litanya na ntwima ya mu mambo kuvikavayandesa,
uje wavazema akavatwamenena
ku masima a tuvwelu-vwelu.
11“Njikalinga tapalo akati ka minkinda,
nakuvwaesa ngila yakwendela vanu vange.
12Vanu vange vakatunda kulyala,
vakatunda ku kunto na mu kangombe ka yambi,
na ku Aswane mu mbwela.”
13Imbeni, yeni melu, ngwe vanu,
asi, tambeka nakujolela ngwe vanu!
Minkinda ishangumuke kwimba ngwe vanu!
Shukulu Kalunga akazembeleka vanu vendi,
vanu vendi vaka-kuyanda,
akavazivila mema ku mbunge.
14Oloni vanu va mu Yelusalema vendekele ngwavo,
“Shukulu Kalunga natuseze!
Ikeye natwivala.”
15Ngecivene, Shukulu Kalunga
wakumbulwile ngwendi,
“Kuma munakazi kasa kwivala munendi
uje ajamwa ndi?
Kuma asa kuzinda munendi uje yakitile ndi?
Nameme nga vaina ya munu vevala munavo,
oloni yange kunjikamivala.
16Yelusalema, kunjasa kukwivala embwe!
Njinasoneka lizina lyove
mu mbanda ya livoko lyange.
17“Nganda yove vakuyitungulula vwasi-vwasi,
vaje vailwisile vakatenguluka nakuya,
18Kenga mesho ove noku-noku
umone vije vilinakulingiwa!
Vanu vove valinakukunguluka, veluke kwimbo!
Mwa vushunga ngwe omo njapwa Njambi wakuyoya,
ukalyalesela ali vanu vove,
ngwe mwakalyalesela shombolwa
a vuzalo vwendi vwa seo.
19“Lifuti lyove lyaviile,
co lyapwile ngundu,
oloni ololo likashula manene na vanu
vaje valinakwija nakutungamo.
Na vitozi vove voshe vakakala kulyala nove.
20Vanu vove vaje vasemukilile mu vunzinda,
litangwa limo vakendeka kuli yove ngwavo,
‘Lifuti eli lyalindondo manene,
tushaka mutambela wakama tukalemo!’
21Asinoni ukendeka mu mbunge yove ngwove,
‘Iyajo wanjikitilile vana ava voshe?
Vana vange voshe vatsile, co njakele ange lika,
ngwe munu uje ivashekele.
Yange njakele mu vunzinda,
nakunjitwala kulyala,
iyajo nalele vana ava?
Njasalele ange lika,
co vana ava vanatundu kulijo?’ ”
22Shukulu Kalunga wa Akamwa ya Vyoshe
alinakwendeka kuli vanu vendi ngwendi,
“Njikana mafuti cimweso,
co vakelwisila vana vove kwimbo.
23Vimyene vakapwa ngwe vaisho,
na vamwene vakapwa ngwe vanyoko.
Vakakutsikamena nakukusingimika,
vakalikeesa mukumwesa
kasingimiko kavo kuli yove.
Asinoni ukazivuka ngwove kuma
yange njapwa Kalunga,
vaje vanjikulaela, kuvakazivi shwamwa.”
24Kuma wasa kutambula vufuko vwanapukula
munu muka-nzili ndi?
Kuma wasa kupatula vinzinda ku vanu va muuka?
25Shukulu Kalunga akumbulula ngwendi,
“Eci cikeco cikasholoka.
Vanu va nzili vakavanyeka vinzinda vavo,
na vufuko vwa munu wa muuka vakavwambata.
Njikalwisa woshe uje akakulwisa,
co njikapatula vana vove.
26Vaje vakakuyandesa
vakalitsiya umo na mukwavo,
vakapenda nakunwa maninga avo vavenya.
Asinoni munu woshe akazivuka ngeci
yange njapwa Kalunga,
Njambi wa nzili wa Isalele,
uje muka-kumyamena nakumipatula.”
The Bible in Mbunda ©The Bible Society of Zambia, 2006