Isaya 48
48
Shukulu Kalunga ashungamesa vanu vendi
1Yeni vanu va Isalele tolilileni evi,
yeni mwatunda kuli Yunda,
yeni mukalisingi na lizina
lya Shukulu Kalunga,
co mulitumbula kupwa vaka-kulemesa
Njambi ya Isalele,
oloni kumwesi kulinga vije mwendeka.
2Muli na kulyalesa nakwendeka ngweni
munapu vandambo va Yelusalema, nganda yakujela,
nakukulaela kuli Njambi ya Isalele,
uje lizina lyendi lyapwa Shukulu Kalunga
Muka-nzili yoshe.
3Shukulu Kalunga alinakwendeka
ku Isalele ngwendi,
“Laja njambulwile vije vikalingiwa,
cooni vinalingiwa.
4Njazivukile ngwange yeni mwapwa
vanu vavakalu,
vanu va vimbunge vyakukola ngwe vutale.
5Ngecivene, njamilekele vyuma evi,
simbu kanda vilingiwe,
kutewa mwendeka ngweni,
tumponya tweni vamukalemesa,
vakevo valingile vyuma evi.
6“Vyoshe vinjendekele vinalingiwa,
munapande kutava ngeci vyoshe njambulwile
vinapu vya vushunga.
Njikakuleka vyuma vyaviha vije vikaija,
vyuma vije kunjajombolwele laja.
7Ololo njilinakulinga cuma caciha,
cije kanda uzive akulivanga.
Nga vyakeleko nga wendeka ngwove
wavizivukile laja vyoshe.
8Njazivukile ngeci kumwakele cikulaeso muli yeni,
simbu yoshe vamizivukile
ngeci mwapwa muvaka-kutengulukila.
Mukemwo kumwazivile evi,
kumwazivileko nambe lijwi limo.
9“Ngeci vanu vakashangazale lizina lyange,
kunjikaluvala vwasi, co kunjiminyongesa.
10Njinamyeseka mu simbu ya tuyando
twakama manene,
ngwe muvakeseka siliva
mu lutengo lwakama.
Oloni njinawana ngeci kumwesi na seo.
11Njalingile vyuma evi omwo cizango cange,
kunjikatava lizina lyange ngeci valishaule,
nambe kwana vumpau vwange
kuli njambi umo weka lalo.”
Siluse ntwama wakwangula kuli Shukulu Kalunga
12 #
Isa 44:6; Kuj 1:17; 22:13 Shukulu Kalunga alinakwendeka ngwendi,
“Njitolilileni, yeni vaIsalele,
vanu vaje vanjinasana!
Yange njapwa Njambi,
wakulivanga na mamaneselelo,
Njambi umolika!
13Njatangele kaye na mavoko ange,
nakujangumuna lilu.
Lilu na kaye vyononoka
kushika kwange kwoshe.
14“Kungulukeni yeni voshe mutolilile!
Kukwesi vinjambi vayongwele ngwavo
munu ou injinaangula
asa kulwisa Mbambilone,
nakulinga vije vinjishaka ngeci avilinge.
15Yange njamusanene,
njamutwamenenene, nakumuhyanesa.
16“Shwenyeni muyehi nange
muzive evi vinjendeka.
Kutunda ku vushangumukilo
njendekele neni citona-mesho,
co majwi ange simbu yoshe
anapu a vushunga.”
(Ololo Shukulu Kalunga wa Akamwa ya Vyoshe
nanjitumu na nzili yendi.)
Vutumbe vwa Shukulu Kalunga ali vanu vendi
17Njambi wakujela wa Isalele,
Shukulu Kalunga muka-kumyamena
alinakwendeka ngwendi,
“Yange Kalunga Njambi yeni,
uje amilongesa vyuma vyavivwa,
nakumitwamenena mu ngila
yaivwa muje mumunapande kuya.
18“Nga mwatolililile ku mashiko ange,
nga vivezikiso vyeni
vyapwile ngwe muna ndonga
uje kesi kuma cau,
nga munahyana ngwe mankimba
aa mema a kalunga.
19Nga vatekulwila veni vanatumu
ngwe vinona vya lishen̄avu,
co yange ngwe kunjatavele
ngeci vavanyongese.”
20 #
Kuj 18:4
Tundeni mu Mbambilone!
Lisambeni omo muya.
Joleleni nakutambeka
ngeci vanu voshe vazive ngwavo,
“Shukulu Kalunga namena Isalele ngamba yendi!”
21Omo Shukulu Kalunga
watwamenenene vanu vendi mu mambo
mwakushaluka mwakuma cau,
kuvakele na lihwila.
Ikeye wavatuwisilile mema mu limanya.
Watavwile limanya mukati,
co mema atuukile.
22 #
Isa 57:21
“Shukulu Kalunga alinakwendeka ngwendi,
Kukwesi kwoloka kuli vaka-vuvi.”
The Bible in Mbunda ©The Bible Society of Zambia, 2006