Isaya 47
47
Kuwa kwa Mbambilone
1 #
Isa 13:1—14:23; Njele 50:1; 51:64 Shukulu Kalunga alinakwendeka ngwendi,
“Mbambilone, shuluka a litanda lyove,
co tumbama asi mu livu.
Laja wapwile u mumbanda,
nganda ije kuvasele kufungulula,
oloni kuwesi lalo na cikonde cacivwa cakuvotsiya,
ololo unapu u ndungo!
2Tengulula n̄unju utwemo tiliku!
Shulula nanga yove yakulivuva!
Kambula cifunga cove!
Jundula vuzalo vwove ku mendi,
omo ujavuka vana va vindonga!#47:2 OMO UJAVUKA...VINDONGA: Kulumbunuka cikwavo ngwavo, omo vanu vavambata nakuvatwala mu vunzinda.
3Vanu vakamona mushelengwa wove,
vakamona kulilumbilisa kwove na shwamwa.
Co yange njikalinga shambandinga,
naumo wai asa kunjivindika.”
4Njambi wakujela wa Isalele atupatula,
lizina lyendi Shukulu Kalunga
Muka-nzili yoshe.
5Shukulu Kalunga nendeka
ku Mbambilone ngwendi,
“Tumbama kuluu mu lisusulungu,
nalumo lwai lalo vakakutumbula
vamwene wa mafuti!
6Njaluvalele na vanu vange,
njavapangesele ngwe kesi vanu vange.
Njavaakele mu mavoko ove,
oloni yove kuwavamwesele mema ku mbunge,
nameme tukulukazi vene
wavapangesele na muuka.
7Yove wayongwele ngwove ukapwa vamwene
simbu yoshe,
oloni kuwaakeleko mbunge ku vyuma vije,
nambe kuyongola ngwove vyuma evi vikahwa.
8 #
Kuj 18:7-8
“Yove washaka vyuma vya senga,
uyongola ngwove uli mwamuvwa na kwoloka.
Ulinakuliyongola ngwove
u wakama ngwe Njambi,
ngwove kukwesi weka lalo wakulifwa nove.
Wayongola ngwove nalumo lwai ukapwa u fwile,
nambe kutsisa vana vove.
9Oloni tolilila ku vyuma evi.
Litangwa lilinakwija
omo vyuma evi njinendeka vikalingiwa.
Manseno ove oshe apwa angoco,
ukapwa u fwile,
co vana vove vakatsa.
10“Wavandele mu vuvi vwove vavenya,
wayongwele ngwove naumo wai asa kukumona.
Mana ove nakuzivuka kwove vyakukwisile,
wayongwele ngwove,
‘Yange Njambi,
kukwesi weka lalo wakulifwa nange.’
11Tuyando twakama tukaija ali yove vwasi-vwasi
kujeneka yove kuzivuka,
co manseno ove oshe kuwakakukwasa.
12Manseno ove oshe na mikalo yove,
vije viwapangesele tunde ku vukwenje vwove,
amo vikakukwasa, nakuzivisa lyova vitozi vove.
13Unalijukisa yove vavenya,
akwihula vaka-kulilongesa vingongonosi,
na vaka-kwambulula vyuma vya kulutwe,
ngeci vakunangule ngonde na ngonde.
Yako ukavehule vakuleke
vije vikalingiwa ali yove.
14“Vanu vaje vakulaela mu vingongonosi
vanapu vangoco ngwe mwila,
uje wenya mu milangi ya tuhya.
Aje naumo wai asa kwikao vilya.#47:14 KWIKAO VILYA: Nambe, kwota.
15Vuje vukevwo vuvwa vwoshe
vuvakalinga kuli yove,
vaje vaka-kukunangula vawakele nakwihula
simbu yoshe yakuyoya kwove.
Voshe vakakuseza, nakuya kwoshe kuvashaka,
co naumo wai akakwamena.”
The Bible in Mbunda ©The Bible Society of Zambia, 2006