Isaya 46
46
1“Awa akewo mamaneselelo
a vinjambi va Mbambilone!
Akulivanga valemesele Mbele na Nembo,
oloni ololo vanavalondeka a vimulu,
vanapu citele a myongo ya tusitu vaje vanajuka.
2Tumponya kutwasa kulyamena tuketwo vavenya,
vanatufungulula nakututwala kweka.
Awa akewo mamaneselelo
a vinjambi va Mbambilone!
3“Njitolilileni,
yeni vatekulwila va Yakomba,
yeni voshe mwasalao kuli vanu vange.
Njinamilele tunde ku simbu ije mwasemukile.
4Yange nji Njambi yeni, co njikamilela,
noo munakolo,
na vwele ku mitwe yeni.
Yange njamitangele, co njikamilela,
njikamikwasa nakumyamena.
5Shukulu Kalunga alinakwendeka ngwendi,
‘Iyajo nalyeseka nange?
Kuma kwali weka wakulifwa nange ndi?
6Vanu vafukula mu vingonga vyavo,
nakwitila kuti ngolinde,
vapeselesa siliva a vipeseleso.
Vakumuna muka-kufula ngolinde
ngeci alinge kamponya,
asinoni vamukulamena nakumulemesa.
7Uje kamponya vamwambata
a vitsili vyavo,
vamwaka mu mutambela umo,
co kemana aje vene,
kukasa kutunda aje vanakaka.
Nga munu alombela ku kamponya,
kukasa kumukumbulula,
nambe kumwamena ku tuyando.
8“ ‘Anukeni evi, yeni vaka-vuvi,
yongoleni vije vinjinalingi.
9Anukeni vije vyalingiwile ku san̄ulu,
taveni ngweni yange lika nji Njambi,
co kukwesi weka lalo wakulifwa nange wai.
10Tunde ku vushangumukilo,
njendekele vati vyuma muvikafwa,
ku san̄ulu njendekele vya
vuka-kwimanena a vyuma vije vikalingiwa.
Njendekele ngwange matumbe ange
nalumo lwai akonwa,
ngeci njasa kulinga vyuma vyoshe
vinjayongola kulinga.
11Njinasana munu kutunda mu ngangela,
akukukwavula ngwe kambembe,
co akamanesa vije vinjayongwele.
Njinendeka, co vikalingiwa.
12“ ‘Njitolilileni,
yeni vanu vaka-kukaluwisa vimbunge,
yeni muli kulyala nakwamena.
13Litangwa lyakumyamena lili muyehi,
kulyesi kulyala embwe.
Kwamena kwange kucikeshwala embwe.
Njikaamena Yelusalema,
nakunena kasingimiko ku Isalele.’ ”
The Bible in Mbunda ©The Bible Society of Zambia, 2006