Isaya 45
45
Shukulu Kalunga aangula Siluse
1Shukulu Kalunga
naangula Siluse kupwa mwene!
Namwangula kufungulula mafuti,
namutumu kutundisa nzili ya vimyene,
Shukulu Kalunga akamushokolwela
vikolo vya vinganda.
Shukulu Kalunga alinakwendeka
kuli Siluse ngwendi,
2“Yange vene njikavwaesa ngila yove,
njikalambesa minkinda na malundu,
njikapokozola vikolo vya vunengu
nakutsena mikambo yavyo ya vikuvo.
3Njikakwana vufuko vwakushwekesa
vwa mu mitambela ya lisusulungu,
asinoni ukazivuka ngeci
yange Kalunga,
Njambi ya Isalele nakusana a lizina.
4Siluse njakwangula ngeci ukwase
ngamba yange Isalele,
vanu vaje vanjinaangula.
Njinakwana kasingimiko kakama
nameme kuunjizivuka.
5“Yange Kalunga,
kukwesi njambi weka lalo.
Njikakwana nzili ije iwushaka,
nameme kuunjizivuka.
6Njilinakulinga evi ngeci,
kutunda ku shongo imo ya kaye
kutwala ku shongo ikwavo,
munu woshe azivuke ngeci
yange njapwa Kalunga,
kukwesi njambi weka lalo wai.
7Yange njitanga ceke na lisusulungu,
njinena vivezikiso nakuvindama na tuyando.
Yange Kalunga, muka-kulinga vyuma evi vyoshe.
8Njikatuma vushunga kutunda mwilu ngwe nyonzi,
kaye kakalivwaesela kuvutambula,
co vushunga vukamena asi.
Yange Kalunga, njinatanga vyuma evi.”
Shukulu Kalunga ikeye watanga vyoshe
9 #
Lom 9:20
Ngongo ya munu uje alwa
na Ishamatanga yendi,
munu napu citambi
ca ku vitambi vyoshe vya ano asi!
Kuma vuma vwasa kwihula muka-kushonga
ngwavwo vika ushonga?
Nambe kwendeka ngwavwo,
eci ulinakushonga kucesi na mavoko?
10Ngongo ya mwana uje ehula visemi vendi ngwendi,
“Vikajo mwanjikitilile ngeci?”
11Shukulu Kalunga,
Njambi wakujela wa Isalele,
uje muka-kuvwaesa vyuma vya kulutwe,
alinakwendeka ngwendi,
“Kumwapandele kunjihula ali vana vange,
nambe kunjileka vinjinapande kulinga!
12Yange njatangele kaye,
nakutanga munu ngeci ayoyeleo.
Njajangumwine melu na nzili yange,
yange muka-kushika litangwa,
na ngonde, na vingongonosi.
13Yange njinaana Siluse nzili,
mukushulisa vutumbe vwange
nakuvwaesa vyuma mwamuvwa.
Njikolola ngila yoshe ije yakendela.
Akatungulula nganda yange ya Yelusalema,
nakupatula vinzinda vange.
Naumo wai namukumuna
nambe namwana lizika-kanwa
ngeci alinge evi vyuma.”
Shukulu Kalunga Muka-nzili yoshe,
ikeye nendekamo.
14Shukulu Kalunga alinakwendeka
kuli Isalele ngwendi,
“Vufuko vwa Ingito na Sundane
vukapwa vwove,
na vanalume vavalaja va ku Semba
vakapwa vindungo vove,
vakakukavangeya oku vali mu malyenge.
Vakatsikama a mavuli
nakulitavela kuli yove ngwavo,
‘Njambi ali nove,
ikeye lika napu Njambi.
15Mwa vushunga yove wapwa u Njambi,
yove muka-kulishweka,
Njambi ya Isalele muka-kwamena.
16Vaje voshe vaka-kushonga tumponya
vakapwa viyambangani,
nakuziva shwamwa.
17Oloni Shukulu Kalunga
akamena Isalele,
co akahyana ku myaka yoshe,
vanu vendi kuvakazivi shwamwa.’ ”
18Shukulu Kalunga
ikeye watangele melu,
ikeye lika Njambi!
Ikeye wamungile nakutanga kaye,
wakolesele kaye mbe, nakukala ku myaka yoshe.
Katangele kaye ngeci kapwe
ngwe mambo embwe,
oloni apwe akuyoyela vanu.
Ikeye nendeka ngwendi,
“Yange njapwa Kalunga,
kukwesi njambi weka lalo.
19Kunjendekele mu vushweke embwe,
nambe kushweka vutumbe vwange.
Kunjashakele vanu va Isalele
ngeci vanjishakezeke
mu vingundu vyangoco embwe.
Yange njapwa Kalunga,
muka-kwendeka vushunga,
njizivuka vyuma vije vinapu vya vushunga.”
Shukulu Kalunga wa kaye na tumponya twa Mbambilone
20Shukulu Kalunga alinakwendeka ngwendi,
“Likungululeni amo,
yeni vanu va mu mafuti,
voshe vaje vanasalao ku miyati
ijeni ngeci vamisompe!
Vanu vaje valemesa tumponya twavo twa viti,
co valombela kuli vinjambi
vaje kuvasa kuvovola,
vanu ava kuvesi na mana!
21Ambululeni vin̄anda vyeni ku mbanja,
vaje vashaka kulyamena valihule
umo na mukwavo.
Iya wambulwile vyuma vya ku san̄ulu
ngeci vikalingiwe?
Kuma kesi yange Kalunga,
Njambi muka-kwamena vanu vendi ndi?
Kukwesi njambi weka lalo wai.
22“Yeni voshe muli kwoshe kuje kwasikisila kaye,
tengulukileni kuli yange ngeci mwovoke.
Yange lika Njambi njiliko.
23 #
Lom 14:11; Fili 2:10-11 Cikulaeso cange capwa ca vushunga,
kucikatenguluka embwe.
Njalikumiiya omwo yange
njapwa munjapwa ngwange,
munu woshe akaija nakutsikama ku mesho ange,
co akalisinga kupwa wa kulongwa kuli yange.
24Vakendeka ngeci muli yange lika
mukemwo muli kuhyana na nzili,
oloni voshe vaje vanjizinda vakaziva shwamwa.
25Yange Kalunga,
njikapatula vatekulwila voshe va Yakomba,
co vakanjishangazala.
The Bible in Mbunda ©The Bible Society of Zambia, 2006