Isaya 42
42
Ngamba ya Shukulu Kalunga
1 #
Mat 3:17; 17:5; Mak 1:11; Luk 3:22; 9:35 Shukulu Kalunga alinakwendeka ngwendi,
“Kengeni ngamba yange uje injinatakamesa,
uje injinaangula,
muli ikeye njinavwaelela.
Njikaka munzinzime wange ali ikeye,
co akanena vushunga ku mafuti oshe. #Mat 12:18-21
2Ikeye kakatambeka nambe kutendeka lijwi lyendi,
nambe kwendeka majwi amangi mu vitapalo embwe.
3Kakapokola lihongo lyakutepama,
nambe kuzima mulangi wakutsitsivala wa mu ndeya.
Akamona ngeci vushunga vulinakulingiwa ku vanu voshe.
4Kakonwa nambe kujuka,
noo nanene vushunga asi.
Mafuti a kulyala akashungwiya manene vilongesa vyendi.”
5 #
Vil 17:24-25
Njambi watangele melu nakuwajangumuna,
ikeye wajalele kaye na vyoshe vije vilimo,
ikeye mukakwana mwonyo
kuli vanu voshe va mu kaye.
Co ololo Shukulu Kalunga Njambi
nendeka kuli ngamba yendi ngwendi,
6 #
Isa 49:6; Luk 2:32; Vil 13:47; 26:23 “Yange Kalunga njinakusana nakukwana nzili,
nakumona ngeci vushunga vulinakulingiwa ano asi.
Muli yove njikalinga cikumiiyo na miyati yoshe,
muli yove njikasholola ceke ku mafuti.
7Ukatonesa mesho a tupuputwa,
nakupatula vaje vali mu tumenga
twa lisusulungu.
8“Yange lika Kalunga Njambi yeni.
Kukwesi njambi weka lalo injikana vumpau vwange,
nambe kutavesa vishangazala vyange
kuvyana ku tumponya.
9Kenga, vyuma vyoshe vinasholoka
ngeci muje njendekele ngwange vikalingiwa,
co ololo njambulula vyuma vije
vikalingiwa kulutwe.”
Mwaso wakushangazala Njambi
10Imbileni Shukulu Kalunga mwaso wauha,
kaye koshe kaimbe nakumushangazala!
Mushangazaleni,
yeni vaka-kwenda a mema a kalunga,
mushangazaleni,
yeni vikashama vyoshe
vya mu mema a kalunga!
Mafuti aje alikulyala,
na voshe vaje valimo, vaimbe.
11Mambo na membo amwo vashangazale Njambi,
vanu va ku Kendale vamushangazale!
Vaje vakala mu nganda ya Sela
vatambeke nakujolela akamwa ya minkinda!
12Vaje vakala ku mafuti a kulyala
vaane cishangala na vumpau
kuli Shukulu Kalunga!
13Shukulu Kalunga aya mukulwa,
ngwe lishwalale wa vukalu
alinakutambeka na nzili yendi yoshe,
omo alinakulwisa vitozi vendi.
Njambi akulaesa kukwasa vanu vendi
14Njambi alinakwendeka ngwendi,
“Njinoloka kuluu simbu yakama,
kunjakumbulwile vanu vange.
Oloni ololo simbu yakulinga
cuma cimo inete,
njikatambeka ngwe munakazi akita.
15Njikanyongesa malundu na minkinda
nakumisa mwila cau na miti.
Vindonga njikavipwisa mambo,
co njikomisa cau mashali a mema.
16“Njikatwamenena tupuputwa twange
mu vitapalo vije kuvendele.
Njikatengulula lisusulungu lyavo kupwa ceke,
njikavavwaesela lifuti lije lya minkinda
nakulipwisa lyakulambasa.
Evi vikevyo vikulaeso vyange,
co njikavanyunga, kunjikajuka embwe.
17Voshe vaje valemesa tumponya,
kuvapwisa vinjambi vavo,
vakavelwisa munima nakuvazivisa shwamwa!”
Kwonwa kulilongesa kwa Isalele
18Shukulu Kalunga alinakwendeka ngwendi,
“Tolilileni, yeni vanu vakusinda matwi!
Kengeseseni mwamuvwa, yeni tupuputwa!
19Kwali umo kapuputwa natuvakana ngamba yange?
Nambe kasinda-matwi uje natuvakana
muluwa wange injatumu?
20Isalele, wamono vyavingi,
cooni vyalumbunuka vikajo kuli yove?
Uli na matwi akuziva lalo,
oloni vyuma mukajo viwunazivi?”
21Shukulu Kalunga wapwa Njambi
uje ashaka kwamena,
ashaka mashiko endi na vilongesa vyendi,
ngeci vanu vendi vavyononoke.
22Oloni vanu vendi vanavevila,
voshe vanawila mu viteke,
nakuvashweka mu tumenga.
Vanavevila nakuvaviisila vyavo,
oloni naumo wai naijako nakuvakwasa.
23Iyajo umo wa ali yeni akatolilila vyuma evi?
Kutunda ololo nakutwalao?
Kuma mukatolilila nakunyanyama?
24Iyajo waanene Isalele
kuli vaje vavevilile?
Shukulu Kalunga uje twaviisilile,
ikeye walingile cuma eci!
Kutwapandele kuyoya
ngwe muje mwashakele ngeci tuyoyemo,
nambe kwononoka vilongesa
vije vyatwanene.
25Ngecivene, twazivile nzili ya vukalu vwendi,
nakumona tuyando twa nzita,
vukalu vwendi vwashukumine
mu Isalele ngwe tuhya,
oloni kutwazivukile vije vyalingiwile,
nacimo cai twalilongeseleo.
The Bible in Mbunda ©The Bible Society of Zambia, 2006