Isaya 41
41
Cikulaeso ca Njambi ku Isalele
1Njambi alinakwendeka ngwendi,
“Olokeni kuluu nakutolilila kuli yange,
yeni muli mu mafuti a kulyala!
Pweni vanu vakusimpa,
shwenyeni kuno ngeci mwakwendeke.
Ijeni tulikungulwile amo
nakuyongola iya nashungamesa.
2“Iyajo uje wanenele Siluse
mwene wa Pelesha kutunda mu ngangela
nakumuhyanesa kwoshe kuje aya?
Iyajo alinakumwasesa
ngeci afungulule vimyene na miyati ya vanu?
Mukwale wendi uvapwisa ngwe likungu lyangoco.
Mikili yendi ivashandola
ngwe mwila ushandoka na lihunzi!
3Avasheka lumbisi manene ngeci mendi endi
kesi kulyata asi!
4Iyajo akalingisa vyuma evi?
Iyajo akendesa vyuma tunde ku san̄ulu?
Yange Shukulu Kalunga, njakeleko
avushangumukilo,
co lalo njikakalako a mamaneselelo.
5“Vanu va ku mafuti a kulyala
vamwene vije vinjalingile,
valijajelele omo vavimwene.
Co voshe valikungulwile nakwija.
6Vanu valikwase nakulitakamesa umo na mukwavo.
7Vaka-kushonga vatakamesa vaka-kufula ngolinde.
Vaka-kufula vikuvo vatakamesa
vaka-kutokeka vimbambo.
Vendeka ngwavo, ‘Vanavitokeka mwamuvwa,’
co vapameya vyuma na vimbambo
ngeci kesi vishwenye.
8 #
2 Miz 20:7; Yak 2:23 “Oloni yove, Isalele ngamba yange,
yeni mwapwa muyati uje unjaangwile,
vatekulwila va musamba wange Avilahama.
9Njamitundisile ku mamaneselelo a kaye,
njamisanene kutunda ku vimbango
vyakulyala vya kaye,
co njendekele kuli yeni ngwange,
‘Yeni munapu vangamba vange.’
Kunjamivyanene embwe,
oloni njamyangwile.
10Kesi muzive lyova,
yange njili neni amo!
Kesi mujaje, yange Njambi yeni!
Njikamitakamesa nakumikwasa,
njikaminyunga nakumyamena.
11“Voshe vaje vanamiluvalela,
vakaziva shwamwa nakukomoka.
Vaje valinakumilwisa vakanyonga,
12mukavashakezeka oloni kumukavawana,
omwo vakevo vakanyonga.
13Yange Kalunga Njambi yeni,
njikamikolesa nakumileka ngwange,
‘Kesi muzive lyova, njikamikwasa.’ ”
14Shukulu Kalunga nendeka ngwendi,
“Isalele nameme munapu muvavandondo,
kesi muzive lyova.
Yange Njambi wakujela wa Isalele,
njikamyamena nakumyovola.
15Njikamipwisa ngwe likina lyakujungwisa,
lije lili na mayo amaha akuvambuka.
Mukajungula minkinda ngwe muvakajungula
tiliku nakuyishalamesa,
co malundu akatsenoka kupwa likungu.
16Mukavombila mu mukambwila,
co lihunzi lyakama likavashandola
nakuvapekumwina kulyala.
Asinoni mukavwaelela, nakunjishangazala,
omwo yange njapwa nji Njambi yeni,
Njambi wakujela wa Isalele.
17“Omo tuutu na vaka-kujeneka
vashakezeka mema, oloni kuvakaawana,
co a milivu yavo ominina cau na lihwila,
asinoni yange Kalunga, Njambi wa Isalele
njikavakwasa, kunjikavevala embwe.
18Njiketisa vindonga vya mema
mukati ka malundu akuma,
co masima a mema a tuvwelu-vwelu
akaita mu vimbongo.
Njikatengulula mambo
kupwa mashali a mema,
na livu lyakuma likakala na masima
a mema a tuvwelu-vwelu.
19Njikamenesa miti ya kendale mu mambo,
na miti ya mingongo,
na miti ya muleta, na miti ya olive,
na miti ya tulipi, na miti ya njunipa,
na miti ya sipelese.
20Vanu vakacimona,
nakuzivuka ngeci yange Kalunga,
Njambi wakujela wa Isalele,
njavitangele vyoshe.”
Tumponya vanapu vangoco
21Shukulu Kalunga, mwene wa Isalele,
alinakwendeka ngwendi,
“Yeni vinjambi va vaka-mafuti,
ambululeni vin̄anda vyeni.
Shololeni vukaleo vwavuvwa vumulinavwo!
22Ijeni kuno,
co simutwiyeni vije vikalingiwa,
tulekeni vyuma vya kunima,
co tukaviyongola.
Tulekeni vuma vya kulutwe,
ngeci tuzivuke vika vije vikalingiwa.
23Shololeni ngeci yeni mu vinjambi,
akupwisa vyuma vije munendeka
kupwa vya vushunga.
Lingeniko cuma cimo cacivwa,
nameme cacivi,
ngeci yetu tuzive lyova
nakulikomokela!
24Yeni kesi mu vanu,
na vyoshe vimulinga
kuvyesi na seo,
vaje valinakumilemesa
valinakulilingisa vunyengwe!
25“Njinaangula mwene
uje ukatunda mu ngangela,#41:25 UJE AKATUNDA MU NGANGELA: Kenga 42:2.
njikamunena kuno
ngeci akulwile ku kunto.
Akalyatangela ali vaka-kushwana
ngwe lindova,
ngwe muka-kushonga alyatangela a vuma.
26Iyajo wa ali yeni uje watulekele vin̄anda
te kanda vicilingiwe, ngeci tuvizivuke?
Naumo wai weni wendekele lijwi,
naumo wai wamizivile mwendeka cuma!
27Yange Kalunga njapwile wakulivanga
kuleka muzimbu Siyone,
njatumine muluwa ku Yelusalema
nakukendeka ngwendi,
‘Vanu vove valinakwija kwimbo!’
28Omo njakengele mukati ka vinjambi,
naumo wai wakele na cuma cakwendeka,
naumo wai wakumbulwile vihula vinjehwile.
29Voshe vinjambi ava vanapu vangoco,
nacimo cai civasa kulinga,
vanapu vakuzeya, co kuvesi na nzili.”
The Bible in Mbunda ©The Bible Society of Zambia, 2006