Isaya 43
43
Njambi akulaesa kupatula vanu vendi
1Isalele, Shukulu Kalunga uje wamitangele
alinakwendeka ngwendi, “Kesi muzive lyova,
njikamyamena.
Njakusana a lizina lyove,
ngeci unapu u wange.
2Omo ukaita mu mema akulova, njikakala nove,
kuwakakuzuvika embwe.
Omo ukaita akati ka tuhya,
kuukenye embwe,
vyeseko vyakama vije vikaija ali yove,
kuvikakuvulumuna.
3Yange njapwa Kalunga Njambi yeni,
Njambi wakujela wa Isalele,
uje amyovola.
Njikecela Ingito ngeci vamikule,
Sundane na Semba ngeci vamiinge.
4Muli na seo na kasingimiko kuli yange,
eci cikeco canenesele ngeci
njecele mafuti na miyati ya vanu
ngeci njimyamene.
5Kesi muzive lyova, njili amo neni!
“Njikatundisa vanu vove vaje vali mu ngangela
na mu kangombe ka yambi,
nakuvelwisila kwimbo lyavo.
6Njikaleka kunto na mbwela,
kwecela vanu vange ngeci
veluke kutunda ku mafuti a kulyala
na ku mitambela yoshe ya mu kaye.
7Vakevo vanapu vanu vange,
njavatangele ngeci vanene kasingimiko
kuli yange.”
Isalele wapwa mukaleo wa Shukulu Kalunga
8Njambi alinakwendeka ngwendi,
“Neneni vanu vange amolika.
Vali na mesho, oloni vanapu tupuputwa,
vali na matwi, oloni vanapu tusinda-matwi!
9Saneni miyati ya vanu vaije kuno.
Iyajo wa ali vinjambi vavo
asa kwendeka vyuma vya kulutwe?
Iyajo umo wavo wambulwile vije
vilinakulingiwa ololo?
Vinjambi ava vanene vakaleo vavo,
mukumwesa ngeci vanendeka vushunga,
mukushulisa vushunga vwa majwi avo.
10“Vanu va Isalele,
yeni munapu mu vakaleo vange,
njakwangwile kupwa ngamba yange,
njishaka ngeci unjizivuke nakunjikulaela,
nakuzivisisa ngeci yange lika
njapwa nji Njambi.
Kukwesi weka lalo njambi,
kukwakele njambi weka lalo wai,
co kakakalako lalo.
11“Yange lika njapwa Kalunga, uje asa kumyamena.
12Njamikulaesele ngwange njimyamena,
co njanyungile cikulaeso cange.
Kukwesi njambi weka lalo
nalingi cuma eci,
yeni munapu mu vakaleo vange.
13Yange njapwa nji Njambi,
co simbu yoshe njikakalako.
Naumo wai akatambula vaje vali mu livoko lyange,
nambe kuvindika vije vinjipanga.”
Kuvomboloka kutunda mu Mbambilone
14Njambi wakujela wa Isalele,
Shukulu Kalunga uje wamipatwile,
alinakwendeka ngwendi,
“Akumyamena, njikatuma nzita
yakulwisa Mbambilone,
njikapokozola vikolo vya nganda,
co muyoyo wa vanu valimo
ukatenguluka kulila.
15Yange njapwa Kalunga,
Njambi yeni wakujela.
Yange njamitangele, Isalele,
yange njapwa mwene yeni.”
16Ku san̄ulu Shukulu Kalunga
wamangele ngila mu mema a kalunga,
mema a cingungu-muta.
17Wanyongesele mashwalale va nzita yakama,
mashwalale va matemba na tuvalu.
Voshe vawile kuvendukile lalo,
vazimine ngwe mukole wa mu ndeya!
18Oloni Shukulu Kalunga nendeka ngwendi,
“Kesi mukakateye ku vyuma vyalaja
nambe kuyongola vije vyalingiwile laja.
19Kengeni ku vyuma vyaviha
vije vinjikalinga.
Vyalingiwa laja, mwasa kuvimona ololo!
Njikamanga tapalo mu mambo,
nakwitisamo vana va vindonga vya mema.
20Nameme tusitu vakanjisingimika,
vimbanje na vankumbwa vakanjishangazala,
njiketisa vindonga vya mema mu mambo,
kwana mema ku vanu vange vaje vanjalyangwilile.
21Vakevo vanapu vanu vaje njalitangelele,
co vakaimba nakunjishangazala!”
Vuvi vwa Isalele
22Shukulu Kalunga alinakwendeka ngwendi,
“Isalele munajuka,
kesi kujuka kwakunjilemesa.
23Kumwanjinenelele vin̄ombelo vyeni
vya kwenyeka vya vimanga,
kumwanjisingimikile na vin̄ombelo vyeni.
Kunjamipesele akushaka vin̄ombelo,
nambe kumiyandesa akushaka insense.
24Kumwanjilandelele insense,
nambe kunjana litambelo lyalivwa
lya tusitu tweni va n̄ombelo.
Oloni mwanjizeyesa na vuvi vweni,
mwanjizeyesa na vivulumuna mwalingile.
25Nameme ngoco, yange njapwa Njambi
uje muka-kumisambesa ku vuvi vweni
omwo lizina lyange,
co kunjikanuka lalo vuvi vweni vuje vumunalingi.
26“Ijeni tuye ku mbanja,
neneni viyongola vyeni,
ambululeni n̄anda yeni kumwesa ngeci
munalingi mwamuvwa!
27Kukulwila yeni wakulivanga#43:27 KUKULWILA YENI WAKULIVANGA: Yakomba, uje vatumbwile lalo ngwavo Isalele.
walingile vuvi,
vantwama veni valingile vuvi
vwakunjilwisa,
28co vaka-kushwana veni#43:28 CO VAKA-KUSHWANA VENI: Vakevo vaka-kwimanena, amo lalo na vaka-kukombelela nambe vimyene. vajwalesele
mwela wange wakujela.
Ngecivene, njanenele tuyando a Isalele,
njatavele vanu vange vavazivise shwamwa.”
The Bible in Mbunda ©The Bible Society of Zambia, 2006