Isaya 40
40
Majwi a cinyangavili
1Njambi yetu alinakwendeka ngwendi,
“Zembelekeni vanu vange. Vazembelekeni!
2Takameseni vanu va ku Yelusalema.
Valekeni ngeci tuyando twavo tunahu,
na vuvi vwavo vanavusambesa.
Njavahisile manene a vuvi vwavo vwoshe.”
3 #
Mat 3:3; Mak 1:3; Yow 1:23 Lijwi lya umo muka-kutambeka ngwendi,
“Vwaeseleni Shukulu Kalunga tapalo mu mambo!
Vwaeseni tapalo yakushungama ya Njambi yetu! #Luk 3:4-6
4Ofweleni cimbongo coshe,
nyekumwiseni minkinda yoshe.
Malundu apwe cana,
co lifuti lyakunyekama
lipwe lyakulambesa.
5Asinoni vumpau vwa Shukulu Kalunga vukasholoka,
co vanu voshe vakavumona.
Shukulu Kalunga ikeye vavenya nakulaesa evi.”
6 #
Yak 1:10-11; 1 Pet 1:24-25 Lijwi lya umo muka-kutambeka ngwendi,
“Ambulula lijwi!” Njehwile ngwange,
“Lijwi mukajo njinapande kwambulula?”
“Ambulula ngwove vanu voshe
vanafu ngwe mwila,
myonyo yetu ya kasimbu kakandondo lika,
ngwe vishani vya mu shwata.
7Mwila ujujwama, na vishani vyuma
akushika kwa Shukulu Kalunga.
Mwa vushunga vanu vanapu mwila.
8Eyo, mwila ujujwama, na vishani vyuma,
oloni lijwi lya Njambi yetu
likakala simbu yoshe.”
9Yelusalema,
lamata a munkinda waulaja,
ambulula vin̄anda vyavivwa!
Siyone, tambeka na lijwi lyakama,
ambulula vin̄anda vyavivwa!
Ambulula, kesi uzive lyova.
Leka membo a Yunda ngwove,
Njambi yeni ali kuno!
10 #
Isa 62:11; Kuj 22:12 Kengeni Shukulu Kalunga
wa Akamwa ya Vyoshe
aija nakushwana na nzili,
alinakwija na cikandelela
ca vanu vendi.
11 #
Ezek 34:15; Yow 10:11 Akanyunga vutanga vwendi mwamuvwa ngwe kanyungi,
akakungulwila amolika vana va vimanga,
nakuvambata mu mavoko endi,
co akatwamenena vainavo
kamandondo-kamandondo.
Naumo wai alyeseka na Njambi ya Isalele
12Iyajo neseka kuseteka mema a kalunga
nambe kujangumuna lilu na mavoko endi?
Iyajo naaka likungu mu mutonga,
nambe kupeselesa minkinda na malundu a cipeseleso?
13 #
Lom 11:34; 1 Koli 2:16 Iyajo asa kuleka Shukulu Kalunga
vyanapande kulinga?
Nambe kumulongesa nambe kumunangula?
14Njambi wehwile iyajo
ngeci amulongese mana na vushunga?
Nambe kumulongesa muvinapande kupwa vyuma?
15Miyati ya vanu inapu yangoco
kuli Shukulu Kalunga,
inapu ngwe limbase lya mema mu lilonga,
na man̄anda aje ali alyala
anapu ngwe likungu.
16Tusitu voshe va mu shwata ya Lembanone,
kuvapwilemo mukuvakombelela
kuli Njambi yetu,
na miti yamwo yaindondo manene
kuyivwekesa tuhya.
17Miyati ya vanu inapu yangoco kuli ikeye.
18 #
Vil 17:29
Iyajo alyeseka na Njambi?
Cifwa mukajo mukamusetekesa naco?
19Ikeye kafwile ngwe kamponya
kakushonga kuli vanu,
kaje kavanafwiki na ngolinde vaka-kushonga,
nakukatumbika a citumbikilo ca siliva.
20Munu uje kasa kuwana siliva nambe ngolinde
aangula citi cije kucesi kusukuwa.
Ashakezeka mutongwe ngeci a shonge kamponya
kaje kukasa kuwila asi.
21Kuma kumuzivuka ndi?
Kuma kuvamilekele ku san̄ulu ndi?
Kuma kumwazivukile tunde a simbu
yakutanga kaye?
22Njambi ikeye muka-kushwana kaye koshe
vanu voshe valinakuyoyao,
vanapu lika ngwe mishwa.
Ikeye wajangumwine lilu, ngwe nanga,
ngwe mbalaka yakushokolola.
23Njambi akakeesa vaka-kushwana vakama,
nakuvapwisa vangoco.
24Vanapu ngwe vimena vya njovolwezi,
vije vilinakukola,
oloni omo Shukulu Kalunga ahwiminao,
co vyuma cau nakupekumuka ngwe vishwashwa.
25Njambi wakujela
mwasa kumusetekesa neyajo?
Kuma kwali umo wakulifwa nendi ndi?
26Anduleni mesho eni kwilu!
Iyajo watangele vingongonosi
vije mulinakumona?
Uje avitwamenena ngwe mashwalale,
ikeye azivuka vungi vwavyo,
co avisana vyoshe a mazina avyo!
Nzili yendi yapwa yakama manene,
naimo ngongonosi yai yazimbalao!
27Isalele, omwo vikajo ulinyenga ngwove,
“Shukulu Kalunga kazivuka tuyando twove,
nambe kukunyunga nga uyanda
kwakujeneka mulonga?
28Kuma kumuzivuka ndi?
Kuma kuvamilekele ndi?
Shukulu Kalunga ikeye Njambi
wa ku myaka yoshe,
ikeye watangele kaye koshe.
Kesi kujuka nambe kuzeya.
Naumo wai asa kuzivisisa
viyongola vyendi.
29Shukulu Kalunga muka-kukolesa
vaje vanazeye nakujuka.
30Nameme vakwenje vakazeye,
vatanuka, co vawa.
31Oloni vaje vakulaela
kuli Shukulu Kalunga mukuvakwasa,
vakawana nzili yaiha.
Vakapulula a mambava ngwe vingonga,
vakashatuka oloni kuvakajuka,
vakenda oloni kuvakazeye.”
The Bible in Mbunda ©The Bible Society of Zambia, 2006