Isaya 4
4
1Omo simbu ije yeta, vanakazi vatanu na vavali vakakwata munalume umolika nakwendeka ngwavo, “Twasa kulilisa nakulizika yetu vavenya, oloni tutave lika ngeci upwe u munalume wetu, ngeci kesi tukale na shwamwa yakuyoya mu vuzike.”
Yelusalema vaitungulula lalo
2Simbu ikaija omo Shukulu Kalunga akalingisa lifuti lyendi kukala na vwilo na vumpau. Co vanu va Isalele voshe vaje vakayoya vakajolela nakuvwaelela a vije vilinakumena mu lifuti lyavo. 3Munu woshe uje nasalao mu Yelusalema, uje yanaangula Njambi ngeci ayoye vakamutumbula wakujela. 4A nzili yendi, Shukulu Kalunga akasompa nakujelesa lifuti nakukusha mulonga wa Yelusalema na maninga aje etikilile muje. 5#Kut 13:21; 24:16 Asinoni Shukulu Kalunga akatuma lishelwa akamwa ya Munkinda wa Siyone na a voshe vaje vakakungulukilao, a simbu ya mutanya, na vwisi, na mulangi wa tuhya a simbu ya vutsiki. Co vumpau vwa Njambi vukafwika nakunyunga nganda yoshe. 6Vumpau vwa Njambi vukapwa munzinze wa nganda ngeci kesi mukale ntwima ku mutanya, nakupwisa nganda mutambela wauvwa, uje wakuvanda ku nyonzi na ku lihunzi.
The Bible in Mbunda ©The Bible Society of Zambia, 2006