Isaya 5
5
Mwaso wa citungu ca mikolovozi ya vushuka vwa vinyu
1Njikembila musamba wange
mwaso wendi wakutumbula citungu cendi
ca mikolovozi ya vushuka vwa vinyu.
Musamba wange wakele na citungu cendi
ca mikolovozi ya vushuka vwa vinyu
a lilundu lya vwilo.
2 #
Mat 21:33; Mak 12:1; Luk 20:9 Waliminemo nakutundisamo mamanya,
co wakunine mikolovozi ya vushuka
vwa vinyu yaivwa.
Co watungile kaposhi kakuvingilila,
wendile mbulu yakukamwinamo vinyu.
Wavandamenene vushuka vuhye,
oloni vushuka vwoshe vwapwile vwakukamata.
3Musamba wange alinakwendeka ngwendi, “Yeni vandambo va mu Yelusalema neni muli mu Yunda, sompeni akati kange na citungu cange ca mikolovozi ya vushuka vwa vinyu. 4Kuma cuma mukajo kunjalingile ku citungu cange? Cooni omwo vikajo kunemi vushuka vwakukamata, oloni kesi vushuka vwavuvwa vuje vunjayongwele?”
5“Eci cikeco cinjikalinga ku citungu cange ca mikolovozi ya vushuka vwa vinyu. Njikatundisa cipatanga cakwo, co njikasiwula civumbe cije canyungako, ngeci tusitu vakalye vushuka nakuvulyatangela. 6Njikacecelela cikule mu shaku, kunjikasalulamo minango nambe kushakwila mikolovozi ya vushuka vwa vinyu, nambe kulimamo, oloni njikecela mishwena na mambimbo icifwike. Co lalo njikavindika mashelwa kunyokelamo nyonzi.”
7Isalele napu citungu ca Shukulu Kalunga
Muka-nzili yoshe ca mikolovozi ya vushuka vwa vinyu,
vanu va mu Yunda vanapu mikolovozi
ya vushuka vwa vinyu ije yaakunine.
Ikeye wavakulaelele ngeci valinge mwamuvwa,
oloni vakevo vanapu vaka-kutsiya.
Ikeye wavakulaelele ngeci valinge vya vushunga,
oloni vanu vaje vavalinakuyandesa
vatambekele ngeci vavakwase.
Vuvi vuje vuvakalingi vanu
8Ngongo yeni! Mulinakulanda vinjuvo vyavingi na mahya ngeci muwezelele ku vije mulinavyo laja. Co kukukakala lalo mutambela wakutungila vanu, co mukakala mu lifuti eni lika. 9Njazivi Shukulu Kalunga Muka-nzili yoshe endeka ngwendi, “Vinjuvo vyoshe vije vyakama vyavivwa vikapwa vyamupulungwa. 10Ku makasha-kasha a vinyu aje alinakumena mu lihya lya mahekita likumi, kukatunda lika malita atanu na atatu a vinyu. Co ku malita makumi atanu na atatu a vimbuto kukatunda lika malita likumi na atanu na atatu a vimbuto.” 11Ngongo yeni! Yeni mumenekela kunwa vwala mutondo-tondo, co mupenda vutsiki vwoshe. 12Ku viwano vyeni kwakala tulyalya, na tumbulumbumba, na vimbendo, na vinyu. Oloni kumuzivuka vije vyalinakulinga Shukulu Kalunga, 13ngecivene, vakamitwala ku mafuti eka kupwa vinzinda. Vantwama veni vakatsa ku njala, co vanu vangoco vakatsa ku lihwila. 14Vukalo vwa vatsi vulinakuvashungwiya, vuneshama kanwa kavwo, ngeci kaleule vaka-kufuka va mu Yelusalema amo na mbunga ya muyoyo wa vanu vangoco.
15Munu woshe akaziva shwamwa, co vaka-kulyalesa voshe vakavakeesa. 16Oloni Shukulu Kalunga Muka-nzili yoshe amwesa vukama vwendi akulinga vyuma vya vushunga, asholola kujela kwendi akusompa vanu vendi. 17Co vana va vimanga vakalila mwila mu vingundu, na vana va vimembe vakawana kwakulila.
18Ngongo yeni! Yeni kumwasa kutunda ku vuvi vweni. 19Mwendeka ngweni, “Shukulu Kalunga azambule kulinga vije vyendekele, ngeci tuvimone. Njambi wa Isalele wakujela atumbe matumbe endi, ngeci tumone viyongola vyendi.”
20Ngongo yeni! Yeni mutumbula vyavivi ngweni vyavivwa, co mutumbula vyavivwa ngweni vyavivi. Mutengulula lisusulungu kulipwisa mutanya, nakutengulula mutanya kuupwisa lisusulungu. Mutumbula vyakulula ngweni vipwelelela, co mutumbula vyakupwelelela ngweni vyakulula.
21Ngongo yeni! Yeni munayongola ngweni munapu mu vaka-mana, co mwanyanyama manene.
22Ngongo yeni! Vingenyenye va vingalafwa vya vinyu! Mwapwa vaka-kusimpa nakujeneka lyova omo mutsingasana vyakunwa! 23Oloni a lizika-kanwa ni, mukasambesa vaka-milonga, oloni vaje kuvesi na milonga kumwesi kuvasompa mwa vushunga. 24Ngecivene, ngwe muvikenye vishati na mwila wakuma mu tuhya, ngecivene, mizi yeni ikavola, na vishani vyeni vikominina nakupekumuka, omwo munavyana vije vyatulongesele Shukulu Kalunga Muka-nzili yoshe, Njambi wakujela wa Isalele. 25Shukulu Kalunga naluvala na vanu vendi, co nolola livoko lyendi nakuvahisa. Minkinda ikajaja, co mivila ya vanu va kutsa ikalala mu vitapalo ngwe vyuma vya mazilo. Nameme ngoco, vukalu vwa Shukulu Kalunga kuvukahwilao embwe, oloni anga akolola livoko lyendi mukuvahisa.
26Shukulu Kalunga akalinga cizivukiso cakusana miyati yeka yakulyala. Navasana na mulozi, co kengeni, valinakwija lumbisi! 27Naumo wai wavo akajuka, co naumo wai akatanuka. Naumo wai akanenguka nambe kulala. Naumo wai akashengenyesa mwiva wendi, naumo wai akavatwisa mwiva wa n̄aku yendi. 28Mikili yavo yapwa ya vutwesi, mata avo a lusipa akunanela cimweja. Vimbemba vya tuvalu twavo vyapwa vyakukola ngwe vutale, co mavalo a ku matemba avo akalizenge ngwe kankumba. 29Mashwalale vavo vakaana ngwe vindumba vaje vanatsii kasitu, co vamukokela kulyala kuje naumo wai avatambulaye. 30Omo litangwa lije likaija, vakakuma a Isalele ngwe mema a kalunga. Kengeni a lifuti eli! Lisusulungu na tuyando! Ceke cinatenguluka kupwa lisusulungu.
The Bible in Mbunda ©The Bible Society of Zambia, 2006