Isaya 3
3
Shukulu Kalunga akasompesa Yelusalema na Yunda
1Shukulu Kalunga, Muka-nzili yoshe, natundisa vyuma vyoshe na vanu voshe vaje vavakulaela mu Yelusalema na mu Yunda. Ikeye akavanyeka vyakulya vyavo na mema avo, 2na vingenyenye vavo, na mashwalale vavo na maako vavo, na vaka-kwimanena vavo, na vaka-kutaa vavo, na vamyata vavo, 3na vamyata va nzita, na vaka-kunangula, na vaka-kushwana, na voshe vaje vaka-kupangesa manseno akulukiya vyuma vya kulutwe. 4Shukulu Kalunga akatava vanu ngeci vavashwane ku vanike. 5Co vanu vakakala na muuka ku umo na mukwavo. Vakwenje kuvakasingimika vakulunu vavo, co vikolokomba kuvakasingimika vantwama vavo embwe.
6Simbu ikaija omo vanu mu cikota cavo vakaangula umo wavo, co vakendeka kuli ikeye ngwavo, “Yove uli na vuzalo, ngecivene, pwa ntwama yetu a simbu eyi ya tuyando.”
7Oloni ikeye akakumbulula ngwendi, “Yange shange! Yange kunjasa kumikwasa. Kunjesi na vyakulya nambe vyakuzala. Kesi munjipwise ntwama yeni embwe!”
8Eyo, Yelusalema inanyongo! Co Yunda inau! Vyuma vyoshe valinakwendeka nevi valinakulinga vilinakulwisa Shukulu Kalunga, valinakushaula Njambi citona-mesho. 9Vilinga vyavo vyavivi vikavelukila vakevo vavenya nakuvalwisa. Vakalingi vuvi citona-mesho ngwe muvalingile vaka-Sondoma. Vananyongo, co vanalikokela vukalu vakevo vavenya.
10Vaka-vushunga vakavwaelela, co vyuma vyoshe vikenda mwamuvwa kuli vakevo. Vakavwaelela na vije vivanapangela. 11Oloni vaka-vuvi vananyongo, muje muvalingile kuli vakwavo mukemwo vakalinga lalo kuli vakevo.
12Vaka-kukumwisa vimbongo valinakuyandesa vanu vange, co vaje vavakumwisa valinakuvakwisa.
Vanu vange, vantwama veni valinakumyungumwisa, ngeci mujeneke kuzivuka mu ngila ikajo mumunapande kuya.
Shukulu Kalunga asompa vanu vendi
13Shukulu Kalunga nakatuka ngeci asompe vanu. Nemana mukusompesa miyati. 14Shukulu Kalunga akasompesa vakulunu na vantwama va vanu vendi. Avasompesa ngwendi, “Munapukula mikolovozi ya vushuka vwa vinyu, co mu vinjuvo vyeni munashulu na vyuma vimunambata ku tuutu. 15Kumwesi na moko yakuyandesa vanu vange nakwambata vya tuutu. Yange Kalunga wa Akamwa ya Vyoshe Muka-nzili yoshe njinendekamo.”
Kunangula vanakazi va mu Yelusalema
16Shukulu Kalunga nendeka ngwendi, “Kengeni kulyalesa kwa vanakazi va mu Yelusalema! Venda nakukezima na tumanambo twatundondo, oku makai a ku mendi avo oya ca, ca. 17Oloni njikavahisa, njikakongovola mitwe yavo nakuyipwisa ya mandya!”
18Litangwa lilinakwija omo Shukulu Kalunga akanyeka vanakazi va mu Yelusalema vyuma vyoshe vije vivalinakulyalesela navyo manene, vyakuzala vya senga vije vili ku tusendengele twavo, na ku mitwe yavo, na ku mikoshi yavo, 19na ku mavoko avo. Akatundisa vinanga vyavo vya ku mitwe, 20na vitepa vyavo na mikalo ya vyemba vya manseno vivanazala a mavoko avo na mu vimbunda vyavo, 21na tunzeya tuje vanazala ku milavo yavo, na ku majulu avo, 22na vikoveyo vyavo vyoshe vyavivwa vyavilaja mavoko, na vuzalo vwa vulaja, na tuzaku, na mapakumuna, 23na vuzalo vwavo vwakupepuka, na vinanga vyavo vya linyu vya ku mavoko, na vinanga vyakuzenga mu mikoshi, na malesu a ku mitwe yavo.
24Mu mwela wa mazi akunika lwengo lwaluvwa, mukakala mazi akunika mwamuvi. Mu mwela wa miva yaivwa, vakazalelamo mikole yakuvola. Mitwe yavo kuyikakala na vin̄ambu vyavivwa, ikakala na mandya. Kuvakakala na vuzalo vwavuvwa, vakazala vuzalo vwakutavozoka. Vuvwa vwavo vukemuka shwamwa!
25Vanalume va mu Yelusalema, eyo, nameme vanalume va nzili yakama, vakavatsiila mu nzita. 26Co vikolo vya nganda vikalinyenga nakulila ngwe vanu, co nganda nayo ikapwa ngwe munakazi natumbama asi mushelengwa.
The Bible in Mbunda ©The Bible Society of Zambia, 2006