Isaya 34
34
Njambi akahisa vitozi vendi
1Shwenyeni muyehi, yeni miyati ya vanu voshe na vaka-kaye voshe, na vyoshe vije vilinakuyoyao, ijeni kuno mwakutolilile. 2Shukulu Kalunga naluvala na miyati ya vanu voshe, na mashwalale vavo voshe. Ikeye navasompela kutsa. 3Mivila yavo kuvakaitsindi, oloni ikavolela nakunikila kuje vene, co minkinda ikavenga na maninga. 4#Mat 24:29; Mak 13:25; Luk 21:26; Kuj 6:13-14 Litangwa, na ngonde, na vingongonosi vikanyongolokota. Lilu vakalizenga ngwe livulu, co vingongonosi vikawa ngwe maputa atotomoka ku mukolovozi wa vushuka vwa vinyu nambe ku muti wa mukuyu.
5 #
Isa 63:1-6; Njele 49:7-22; Ezek 25:12-14; 35:1-15; Amo 1:11-12; Ova 1-14; Mal 1:2-5 Shukulu Kalunga navwaesa mukwale wendi, co ukatunda mwilu nakwija a Endome, ali vanu vaje vanasompela kutsa. 6Mukwale wendi ukashula na maninga na mazi avo, ngwe maninga na mazi a vana va vimanga na vimembe vakukombelela. Shukulu Kalunga akatsiya vanu vavangi nakuvapwisa n̄ombelo mu nganda ya Mbozile, na mu mitambela yeka ya mu lifuti lya Endome. 7Vanu vakawa ngwe vampakasha na vana va vingombe, co asi akavenga na maninga nakushula na mazi. 8Eyi ikeyo simbu omo Shukulu Kalunga akapatula Siyone na nakulinga shambandinga vitozi vendi.
9Vindonga vya Endome vikemuka lipombosiwa, co livu likemuka lilungu. Co lifuti lyoshe likenya ngwe lipombosiwa. 10#Kuj 14:11; 19:3 Likenya mutanya na vutsiki, co vwisi vukakakumuka myaka yoshe. Lifuti lya Endome likapwa lyamupulungwa ku myaka yoshe, naumo wai akaita mukati kalyo. 11Mu lifuti mukakala lika makun̄ulu na makololo. Shukulu Kalunga akalipwisa ngundu, ngwe mulyapwile laja. 12Naumo wai akashwanamo, na vatwama kuvakakalamo. 13Mambimbo na mishwena vikamena mu mapela mwoshe na mu vinganda, co mukakala vimbanje na makun̄ulu. 14Tusitu vakendanganamo, co minzinzime yakujwala ikalisanenamo umo na ukwavo. Cikashama wa vutsiki akaijamo mukushakezeka mutambela wakuhwimina. 15Makun̄ulu vakatungilamo mashwa avo, nakusemenamo mavunda, nakutetwilamo vana vavo, nakuvalelelamo lalo. Makuvi vakakungulukilamo.
16Shakezekeni mu livulu lya Shukulu Kalunga lya vikashama vakuyoya mulave vije vilyendeka. Nacimo cai cuma cakutanga cikajenekamo, co cuma cakutanga nacimo cai cikajeneka kukala na cikwavo. Shukulu Kalunga ikeye nashiki ngeci vifwemo, ikeye vavenya akavikungulwila amo. 17Shukulu Kalunga ikeye akaangununa lifuti akati kavo nakwana mutambela walyo ku umo na umo. Vakakalamo myaka yoshe, co likapwa lifuti lyavo ku myaka yoshe.
The Bible in Mbunda ©The Bible Society of Zambia, 2006