Isaya 33
33
Lilombelo lyakukwasa
1Vitozi vetu vanavindama! Vanevi nakwenda vungungu, nameme kukwesi umo navevila nambe kuvenda vungungu. Oloni simbu yavo yakwiva nakwenda vungungu ikahwa, co navo lao vakavevila nakuvenda vungungu.
2Shukulu Kalunga, tuzivileko mema ku mbunge. Tunaka cinyangavili cetu muli yove. Tunyunge a litangwa na litangwa nakutwamena mu simbu ya tuyando. 3Omo utulwila, miyati ya vanu vatewa muyoyo wa nzita yove. 4Vufuko vwavo vakavupukula vwasi-vwasi nakuvwambata.
5Shukulu Kalunga wapwa wakama! Ikeye wakala mu melu. Akashulisa Yelusalema na vushunga na kulongwa, 6co akakolesa miyati ya vanu. Simbu yoshe akanyunga vanu vendi nakuvana mana nakuzivisisa. Vufuko vwavo vwakama manene vukapwa kasingimiko kuli Shukulu Kalunga.
7Mashwalale vakusimpa valinakutambeka ngeci vavakwase. Miluwa vaje vashakele kunena kwoloka ololo valinakulila manene. 8Vitapalo vyakama ololo vili na vushonde, co naumo wai alinakwendelamo. Lizivasano na cikumiiyo vinahu. Kukwesi lalo kalemeso ku munu uje anyunga cikulaeso. 9Lifuti lyasala ngoco mupulungwa. Shwata ya Lembanone yajujwama, na Cana ca Shalone ca vwilo cinalifu ngwe mambo, shwata ya Mbashane na Munkinda wa Kalemele maputa alinakutotomoka ku miti.
Shukulu Kalunga anangula vitozi vendi
10Shukulu Kalunga alinakwendeka ku miyati ya vanu ngwendi, “Ololo njipanga. Njikamwesa ayapwa nzili yange. 11Mulinakutumba matumbe angoco na vyuma vyoshe mulinakulinga kuvyesi na seo. Munzinzime wange unapu ngwe tuhya tuje tukaminyongesa. 12Mukatsenozola ngwe mamanya venyeka mukulinga memba, ngwe mambimbo enya kupwa lito. 13Vanu voshe vali muyehi nambe kulyala vazive vije vinjinalingi nakuzivisisa nzili yange.”
14Vanu vaka-vuvi vaka-Siyone valinakulijajela na lyova. Vendeka ngwavo, “Kusompa kwa Njambi kunapu ngwe tuhya tuje kutwesi kuzima. Kuma ali yetu kuli umo akasalao a tuhya twakufwa ngacije ndi?” 15Mukasalao nga mwendeka nakulinga vije vya vushunga. Kesi mupangese nzili yeni na kunyanyamena tuutu, co kesi mutambule lizika-kanwa. Kesi mulipandakane na vaje vatumba matumbe akutsiya nambe kulinga vyuma vya vuvi. 16Asinoni mukakala mwamuvwa, ngwe muli mu cimpaka cakukola. Mukakala na vyakulya na mema akunwa.
Vumpau vwa kulutwe
17Mesho eni akamona vumpau vwa mwene, akamona lifuti mukujanjavala kwalyo kwoshe. 18Mukalihula yeni vavenya ngweni, “Vali kulijo vamyata vaje vatujujwisile nakutufwetesa lisimu lyakama?” 19Kumukamono lalo vaka-kwija va kulyalesa vaje vendekele muyati uje kumwasele kuzivisisa. 20Kengeni Siyone, nganda ije mutukalingila viwano vyetu vya vuNjambi. Kengeni Yelusalema! Ukapwa mutambela wauvwa kuli vaje vakakalamo! Ukapwa ngwe mbalaka ije kuvesi kushwenyesa na vipampalingo vyayo kuvyesi kushimbuka, na mukole wayo kuwesi kushutuka. 21Shukulu Kalunga akatumwesa vumpau vwendi. Co tukakala ku ngenge ya vindonga vyakama na vana va vindonga vyavindondo, oloni mato a vitozi kuwakasa kujavukamo. 22Shukulu Kalunga wapwa lyaako lyetu na mwene yetu, akatunyungu mwamuvwa. 23Oloni lifuti lyeni linapu vwato vwakama vuje mikole yavwo inazeye, co nanga ije ikavwendesa na lihunzi kuyasa kushangumuka ngeci vwato vwende. Litangwa limo nameme yeni vilema mukambata vyuma vyakupukula ku vitozi veni. 24Naumo wai lalo uje akayoyela mu lifuti lyetu akalinyenga a kuvinja, co vuvi vwoshe vakavusambesa.
The Bible in Mbunda ©The Bible Society of Zambia, 2006