Isaya 32
32
Mwene wa vushunga
1Kengeni, mwene akashwana mu vushunga, na vantwama va lifuti vakashika mwa kulongwa. 2Umo na umo wavo akapwa ngwe mwela mwakuvanda lihunzi, na cimpaka mwakuvanda lihunzi lyakama. Vakapwa ngwe vana va vindonga vya mema mu mambo, ngwe limanya lyakama lije lyana munzinze omo kuli ntwima. 3Asinoni mesho a vaje vamona kuwakatsitsivala, na matwi a vaje vaziva akatolilila. 4Vaka-vimbunge vya vwasi-vwasi vakazivuka nakuzivisisa, co ndaka ya vaka-cikukuma ikalivwaesela kwendeka mwamuvwa. 5Kukwesi munu akayongola ngeci vilema vakavasingimika, nambe kwendeka ngeci vaka-muuka vakapwa vanu va kulongwa. 6Cilema akendeka vya vulema lika, nakuyongola kulinga vyuma vyavivi. Vije vyakalingi na vije endeka vinapu vyakushaula Shukulu Kalunga, co kesi kulisa muka-njala nambe kwana mema kuli vaje vali na lihwila. 7Cilema napu muka-vuvi, muka-kulinga vyuma vyavivi, atumba matumbe a makuli akuviisa tuutu nakuvavindika ngeci kesi vawane vushunga. 8Oloni munu wa kasingimiko wapwa wa kulongwa mu vilinga, nakwimana mbe a vije vya vushunga.
Cihiso ca vanakazi va Yelusalema
9Yeni vanakazi vaje valinakuyoya mwamuvwa, kumwesi nevi vyakulishoshomwena, tolilileni ku vije njilinakwendeka. 10Mwasa kukala mwamuvwa, oloni a simbu ino vene mungolosika, vukalu vukaija omwo kumukalala na mikolovozi ya vushuka vwa vinyu vumukakungulula. 11Munakele nakuyoya mwamuvwa kujeneka kulishoshomwena, oloni ololo, jajeni na lyova! Shululeni vuzalo vweni, co zaleni vikeleya. 12Lipupeni a vinulo vyeni na vusiwa omwo mahya a vwilo na vitungu vya miti ya vinyu vanavinyongesa, 13co mambimbo na mishwena vili mu lifuti lya vanu vange. Lilileni vinjuvo vyoshe muje muvanakele vanu vakuvwaelela, na nganda ije mwakele nakuyoya mwamuvwa. 14Nameme mu lipela vakatewamo, na nganda ikapwa ngundu. Membo na tuposhi vikapwa vingundu ku myaka yoshe. Vimulu vakalilamo mwila, co vimanga vakawana kwakulila mwila wauvwa.
15Oloni Njambi lalo akatutumina munzinzime wendi. Lifuti lya vwilo likakala na vwilo, co mu mahya mukamena vimbuto vyavivwa. 16Mu lifuti mwoshe vushunga na kulongwa vikalingiwa. 17Omwo vanu voshe vakalinga vije vya vushunga, co kukakala kwoloka na vuvwa ku myaka yoshe. 18Vanu va Njambi kuvakalishoshomwena, co membo avo akakala mwamuvwa na kwoloka, 19Nameme nyonzi ya mamanya ikawisa miti mu shwata na vinganda vikasiwuka. 20Vanu voshe vakavwaelela akukala na mema amangi a ku vimbuto vivanalimi, na mwila wauvwa kwakulila vimulu na vingombe.
The Bible in Mbunda ©The Bible Society of Zambia, 2006