Isaya 31
31
Njambi akanyunga Yelusalema
1Ngongo yavo vaje vaya ku Ingito mukuvakwasa! Vaje vanakulaela a tuvalu, na matemba amangi na mashwalale. Oloni kuvakulaelele kuli Shukulu Kalunga, Njambi wakujela wa Isalele, nambe kumulomba ngeci avakwase. 2Shukulu Kalunga azivuka vije vyalinakulinga! Atuma tuyando. Ikeye akahisa vaka-vuvi na vaka-kuvanyunga. 3Vaka-Ingito kesi vinjambi embwe, vanapu lika vanu. Co tuvalu twavo vapwa situ lika kesi minzinzime. Omo Shukulu Kalunga amwesa vukalu vwendi, co anyongesa vaka-Ingito na voshe vaje vajendamenene ali vakevo. Co voshe vakanyonga.
4Shukulu Kalunga wendekele kuli yange ngwendi, “Njikana nakulwa ngwe ndumba wa vukalu uje kasa kutewa mitambi ya tunyungi vaje veseka kwamena vimanga vavo. Omu mukemwo yange Kalunga Muka-nzili yoshe njikashuluka nakulwa a Munkinda wa Siyone. 5Yange Kalunga Muka-nzili yoshe njikaamena Yelusalema ngwe kazila ajangumuna mambava endi a lishwa mukunyunga vana vendi.”
6Njambi nendeka ngwendi, “Vanu va Isalele, munalingi vuvi, co munanjikengesa nima. Oloni ololo, ilukeni kuli yange! 7Simbu ilinakwija, yeni voshe mukombila kuti tumponya tumwalingile twa siliva na ngolinde tumwalingile na mavoko eni a vuvi. 8VaAsilya vakavatsiila mu nzita, oloni kesi na mikwale ya vanu embwe. Vakwenje vavo vakeseka kuputumuka, oloni vakavakwata nakuvapwisa vindungo. 9Mwene yavo akatewa omwo lyova, na vamyata va nzita vakatewa ku nzita.” Shukulu Kalunga nendekamo, uje ivalemesela mu Yelusalema, uje tuhya twendi tukenyeka vin̄ombelo muje.
The Bible in Mbunda ©The Bible Society of Zambia, 2006