Isaya 25
25
Mwaso wakushangazala
1Yove Shukulu Kalunga,
yove wapwa u Njambi yange, njikakulemesa,
nakushangazala lizina lyove.
Omwo unalingi vyuma vyakukomokesa,
a kulongwa kwove unamanesa matumbe
awayongwele laja.
2Unatengulula vinganda vya vitozi vetu
kupwa vingundu,
nakunyongesa vimpaka vyavyo vyakukola.
Mapela avatungile vitozi vetu oshe ananyongo.
3Vanu vaka-mafuti a nzili vakakushangazala,
vakakukomoka mu vinganda
vya miyati ya vaka-muuka.
4Tuutu na vaka-kujeneka
vatewelele kuli yove,
co vanakala mwamuvwa
a simbu ya tuyando.
Wavanene mwakuvandela lihunzi,
na munzinze ngeci vavande
ntwima ya litanya.
Vaka-muuka vakalu ngwe lihunzi lya cisika,
5ngwe lilanga mu lifuti
lyakujeneka nyonzi.
Oloni yove Shukulu Kalunga,
unolwesa vitozi vetu,
ukolwesa mitambi ya vaka-muuka
ngwe lishelwa lije lifwika a litangwa.
Njambi avwaesa ciwano
6Aa vene a Munkinda wa Siyone, Shukulu Kalunga Muka-nzili yoshe akavwaeselao miyati yoshe ya mu kaye ciwano ca vyakulya vyavivwa na vinyu vyavivwa. 7A munkinda ou, Shukulu Kalunga akatundisa nanga ya vusiwa ije yafwikile miyati yoshe ya ano a kaye. 8#1 Koli 15:54; Kuj 7:17; 21:4 Shukulu Kalunga wa Akamwa ya Vyoshe akanyongesa nzili ya kutsa nakusikumuna misozi ku mesho a munu na munu, co vanu vendi kuvakazivi shwamwa kwoshe-ikwoshe muno mu kaye mwoshe. Shukulu Kalunga vavenya nendekamo.
9A litangwa lije vanu vakendeka ngwavo, “Mwa vushunga ou wapwa Njambi yetu! Twakulaela muli ikeye, co natwovola. Ou ikeye Shukulu Kalunga! Twakulaela muli ikeye, tujoleleni nakuvwaelela omwo ikeye natwovola.”
Njambi akahisa Mowavi
10 #
Isa 15:1—16:14; Njele 48:1-47; Ezek 25:8-11; Amo 2:1-3; Zef 2:8-11 Shukulu Kalunga akanyunga Munkinda wa Siyone, oloni vanu va Mowavi vakavalyatangela ngwe muje vakalyatangela vishati ngeci vipwe vwilo. 11Vakeseka na nzili yavo yoshe ngeci vaputumuke, oloni Njambi akavazivisa shwamwa, nameme vene veseka vati ngeci vaputumuke. 12Njambi akanyongesa vimpaka vya Mowavi vyakukola na vivumbe vyavyo vyavilaja, nakuvilundumwina asi.
The Bible in Mbunda ©The Bible Society of Zambia, 2006