Isaya 24
24
Shukulu Kalunga akahisa kaye
1Shukulu Kalunga akanyongesa ano asi, co akapwa amupulungwa. Akafulumika kaye nakushandola vanu vao. 2Cikafwa mumolika ku voshe, ku vaka-kukombelela na vanu vangoco, vindungo na vashukulu vavo, vaka-kulanda nakulandulula, na vaka-kukumwisa, na vaka-kukumuna, vaka-kufuka na tuutu. 3Ano a kaye akakala amupulungwa, kwakakala cuma cimo. Shukulu Kalunga nendekamo, co cikalingiwa.
4Kaye kauma nakujujwama, nakuzeya, kaye na lilu vikanyongolokota. 5Vanu vanajwalesa kaye omwo vanapokola mashiko a Njambi, nakupokola cikumiiyo cije calikumiiye navo ca ku myaka yoshe. 6Ngecivene, Njambi natumbwila kaye cisingo. Co vanu vao valinakutsa omwo vuvi vwavo. Vavandondo-ndondo lika vanasalao vaciyoya. 7Mikolovozi ya vushuka vwa vinyu inajujwama, co vinyu vinapu vyavindondo, munu woshe uje wakele nakuvwaelela ololo naviilila, 8na myaso yavo yakujolela ya a tulyalya na a vingoma inahu. 9Kukwesi kwimba nakuvwaelela lalo omo vanwa vinyu, naumo wai avwaelela akumakela vinyu. 10Vyuma vyoshe mu nganda vili mu citanga, co vanu valinakulishokeyeya mu vinjuvo vyavo ngeci vakale mwamuvwa. 11Vanu vatambeka mu vitapalo omwo kukwesi lalo vinyu. Kujolela kunahu, kuvwaelela kwaimo mu lifuti. 12Nganda inasala yamupulungwa, co vikolo vyayo vanavisiwula. 13Miyati ya vanu vanavanyeka vyuma vyavo vyoshe, vanapu ngwe miti ya olive nambe mikolovozi ya vushuka vwa vinyu a simbu yakumanesa kuteja.
14Vaje vakasalao vakaimba nakujolela. Vaje vali mu kangombe ka yambi vakambulula vukama vwa Shukulu Kalunga, 15co vaje vali mu ngangela vakamushangazala. Vanu vaje vakala a man̄anda a mu mema a kalunga vakashangazala Shukulu Kalunga, Njambi ya Isalele. 16Tukaziva myaso yakutunda ku mitambela yakulyala ya ano asi yakushangazala Isalele,#24:16 YAKUSHANGAZALA ISALELE: Nambe, yakushangazala Njambi wa vushunga. muyati wa vushunga.
Oloni kunjesimo na cinyangavili! Njinanyongo! Vaka-makuli valinakulinga vungungu, co makuli avo anaama manene. 17Munu woshe atolilile kuli yange! Kuli lyova, na viteke, na myeto vije vinavandamena munu woshe. 18Munu woshe uje atewa lyova akawila mu citeke, co munu woshe uje atewa citeke akatsa mu mweto, omwo vinjanena vya mwilu vyashokoloka, co luvula lwa kaye lujaja. 19Kaye kakatavuka nakushokoloka. 20Kaye kakatalyangela ngwe muka-kupenda vwala, nakuninganga ngwe kanjuvo kaninganga na lihunzi lyakama. Kaye kanalemuwa na vuvi vwako, kakawa, co kukakenduka lalo.
21Simbu ilinakwija omo Shukulu Kalunga akahisa vaka-nzili ya a mukambwila na vaka-kushwana va ano asi. 22Njambi akaka mbunga ya vimyene mu citeke ngwe vinzinda. Akavashokela mu kamenga noo simbu ya kusompa kwove inete. 23Ngonde ikatsitsivala, co litangwa kulikatu ceke, Shukulu Kalunga Muka-nzili yoshe ikeye akapwa mwene. Akashwana mu Yelusalema a Munkinda wa Siyone, co vantwama va vanu vakamona vumpau vwendi.
The Bible in Mbunda ©The Bible Society of Zambia, 2006