Isaya 26
26
Njambi akahyanesa vanu vendi
1Litangwa lilinakwija
omo vanu va mu Yunda vakaimba mwaso ou ngwavo,
Nganda yetu yapwa yakukola!
Njambi ikeye wanyunga vivumbe vyayo!
2Shokololeni vikolo vya nganda
ngeci muyati wa vanu va kulongwa vakovele,
muyati wa vanu vaje
vaka-kulinga mwa vushunga.
3Shukulu Kalunga akana kwoloka,
kuli vaje vakolesa kukulaela kwavo mbe,
vaje vakulaela kuli yove.
4Kulaela kuli Shukulu Kalunga myaka yoshe,
akatunyunga simbu yoshe.
5Ikeye nakeesa vaje valyalesele,
nanyongesa vinganda vyavo vyakukola
muje vayoyelele, nakusiwila vivumbe vyavo asi.
6Vaje vavayandesele valinakwenda akamwa yavyo
nakuvilyatangela na mendi avo.
7Shukulu Kalunga,
ukavwaesela vaka-vushunga ngila yakushalama
ngeci vendelemo.
8Tulinakukavangeya cizango cove
nakwaka cinyangavili cetu muli yove,
yove lika itushungwiya.
9Mbunge yange ilinakukushaka
a simbu ya vutsiki,
omwo viyongola vyove vimwesa vanu voshe ano asi
muje muvanapande kuyoya mwa vushunga.
10Nameme umwesa ngozi kuli vaka-vuvi,
kuvesi kulilongesa kulinga vushunga.
Nameme mu lifuti muli vaka-vushunga,
oloni vaka-vuvi anga vatwalelelao kulinga vuvi,
kuvesi kumona vukama vwove.
11 #
VaHe 10:27
Vitozi vove kuvazivuka ngeci ukavahisa.
Shukulu Kalunga, vazivise shwamwa,
mwesa cizemo cove kuli yetu,
co vombile mu tuhya tuje tuwavwaeselele vitozi vove.
12Shukulu Kalunga, ukatwana kuhwima,
vyuma vyoshe vije tuwana,
yove unatulingilavyo.
13Shukulu Kalunga Njambi yetu,
vanakala nakutushwana kuli vanu veka,
oloni yetu twononoka lika yove
Shukulu Kalunga.
14Vaje vitozi vanatsi voshe,
vanatsi kuvakasanguka lalo,
unavahisa, co vananyongo,
naumo wai lalo akavanuka.
15Shukulu Kalunga,
yove unaamesa muyati wetu,
unaamesa vinginga vyoshe vya lifuti lyetu,
co eci cinanena ngeci tukusingimike.
16Shukulu Kalunga,
omo wahisile vanu vove,
mu tuyando twavo valombelele kuli yove.
17Ngecivene, yove Shukulu Kalunga,
twafwile ngwe munakazi
uje akemanga akukita mwana.
18Twazivile mushongo nakukemanga,
oloni nacimo cai twakitile.
Kutwahyanene nzita mu lifuti lyetu,
kutwesi na vatekulwila ngeci vakale ano asi.
19 #
Ndan 12:2
Vanu vetu vaje vanatsi vakayoya lalo!
Mivila yavo ikasangukila lalo ku mwonyo.
Voshe vaje vali mu vimbumbo,
vakenduka nakwimba nakujolela.
Ngwe lime litonolwela asi,
ngecivene, Shukulu Kalunga akasangula lalo
vanu vaje vatsile laja.
Kusompa nakwilwisa
20Vanu vange, koveleni mu vinjuvo vyeni, co lishokeyeyenimo. Vandeni kasimbu kakandondo lika, noo vukalu vwa Njambi vunahu. 21Shukulu Kalunga alinakwija kutunda mwilu muje mwakala mukuhisa vanu va ano asi omwo a vuvi vwavo. Kulitsiya kuje kwalingiwile mu vushweke ano asi kukajomboloka, co livu kulikashweke vanu vaje vavatsiile.
The Bible in Mbunda ©The Bible Society of Zambia, 2006