Isaya 21
21
Cimona cakuwa kwa Mbambilone
1Awa akewo majwi aa Mbambilone.
Ngwe kankumba akomba mu mambo, tuyando tukaija ngacije vene kutunda mu lifuti lyakutewesa. 2Vanjimwesele cimona cakutewesa, cimona ca vungungu na kunyongesa.
Mbunga ya mashwalale va Elame, na mbunga ya mashwalale va Mendiya, vazengelekeni nakulwisa vaMbambilone. Njambi akamanesa tuyando tuje tuvalingile vaMbambilone.
3Vije vinjamwene nakuziva mu cimona vyanjizivisile lyova nakuvinja, ngwe munakazi alinakukita. 4Mutwe wange wavinjile, co njajajele nakuziva lyova. Cingwezi cinjashungwiiye cinanjizivisa lyova.
5Mu cimona, njamwene ciwano cakuvwaesela cimweja, vanajala tumbilititi ngeci vangenzi vatumbameo. Co vakele nakulya nakunwa. Vwasi-vwasi kwezile lishiko ngwavo, “Vamyata ambateni vintelo vyeni vwasi!”
6Asinoni Shukulu Kalunga wendekele kuli yange ngwendi, “Ya ukaake muka-kunyunga, muleke ambulule vyoshe vije vyamona. 7Nga amona vanalume vanalondo a tuvalu valinakwija, vavali-vavali, na vanalume vanalondo a vimulu na a tumelo, napande kulivwaesela cimweja.”
8Muka-kunyunga wendekele ngwendi, “Mwane, njinemana simbu yoshe nakunyunga mutanya na vutsiki.”
9 #
Kuj 14:8; 8:2 Kengeni, vaka-kulonda a tuvalu valinakwija! Vavali-vavali. Co muka-kunyunga watambekele ngwendi, “Mbambilone inau! Na tumponya twoshe tuje vakele nakulemesa vanashandokela mu livu.”
10Vanu vange va Isalele, munayanda manene-nene, oloni ololo njimileka muzimbu wauvwa uje unatundu kuli Shukulu Kalunga Muka-nzili yoshe, Njambi wa Isalele.
Majwi aa Endome
11Awa akewo majwi aa Endome.
Kuli munu umo alinakutambeka kuli yange mu Endome ngwendi, “Muka-kunyunga, simbu mukajo kukya? Njileke nga kukya vwasi.”
12Njamukumbulwile ngwange, “Kulinakukya, oloni vutsiki vukaija lalo. Nga ushaka kwihula lalo, yokeluke nakwihula.”
Majwi aa Alambiya
13Awa akewo majwi aa Alambiya.
Yeni vanu va mu Ndendane, vaje va matemba avo akatulila mu cilombo calaja mu lifuti lya Alambiya, 14aneni mema kuli vanu vaje vali na lihwila. Yeni vanu va mu lifuti lya Tema, aneni vyakulya kuli vaka-kwija vaje vali na njala. 15Vanu ava vanajuka mukutewa ku mikwale, na ku mata a lusipa a vitozi vavo vaje valinakuvasheka.
16Asinoni Shukulu Kalunga wendekele kuli yange ngwendi, “Mwa vushunga vene a mwaka umolika vukama vwa muyati wa Kendale vukahwa. 17Vanalume vaka-mata a lusipa va mu Kendale vakasalao lika vavandondo. Yange Kalunga Njambi ya Isalele, njinendekamo.”
The Bible in Mbunda ©The Bible Society of Zambia, 2006