Isaya 22
22
Majwi aa Yelusalema
1Awa akewo majwi aa Cimbongo ca Vimona.
Vikajo vilinakulingiwa? Omwo vikajo vanu voshe va mu nganda valinakulisambela akamwa ya vinjuvo?#22:1 AKAMWA YA VINJUVO: Kenga 15:3. 2Nganda yoshe ilinakutambeka, inashulu na muyoyo nakutangalala.
Vanu vaje vanalala mu vitapalo omwo yakupenda kuvavatsiile mu nzita. 3Vantwama veni voshe vatewele, oloni vavafungulwile simbu kanda vacilwe nzita. 4Ngecivene, njisezeni ange lika njilile manene vanu vange voshe vaje vanatsi. Kesi munjizembeleke embwe. 5Eyi ikeyo simbu ya kuuya-uya nakufunguluka na vitanga vije vinashulu mu Cimbongo ca Vimona, co Shukulu Kalunga wa Akamwa ya Vyoshe Muka-nzili yoshe navitumu ali yetu. Vivumbe vya nganda yetu vanavisiwila asi, co mitambi yakutukwasa inete mukati ka malundu.
6Mashwalale va ku lifuti lya Elame vezile oku vanalondo a tuvalu, vambatele mata a lusipa na mikili. Co mashwalale va ku lifuti lya Kile valivwaeselele cimweja vintelo vyavo. 7Vimbongo vya vwilo vya mu Yunda vyashulile na matemba, co mashwalale vakulonda a tuvalu valitakalekele kulutwe lwa vikolo vya mu Yelusalema. 8Vimpaka vyoshe vya Yunda vaviwisilile asi.
A litangwa lije mwakulaelele vitwa vije vyakele mu njuvo yavutulikilo, 9co mwamwene ngeci civumbe ca Yelusalema cakele na myanzi. 10Mwalavele vinjuvo vyoshe vya mu Yelusalema, co mwavisiwile ngeci muwaneko mamanya akutungulwisa vivumbe, ngeci munyunge mema, 11mwapangele lishali mukati ka vivumbe vya nganda ngeci munyungilemo mema. Oloni kumwombile vimbunge vyeni kuli Njambi, uje watumbile vutumbe vwoshe ovu ku san̄ulu, co kumwasingimikile uje watavele ngeci vilingiwe.
12Shukulu Kalunga wa Akamwa ya Vyoshe Muka-nzili yoshe wamilekele ngeci mulile na kusikoka, nakuteula mitwe yeni nakuzala vikeleya. 13#1 Koli 15:32 Oloni yeni mwavwaelelele, co mwalisambele. Mwatsiile vimanga na vingombe, co mwalile nakunwa vinyu. Mwendekele ngweni, “Tunapande kulya nakunwa! Imene tutsa.”
14Shukulu Kalunga wa Akamwa ya Vyoshe Muka-nzili yoshe wendekele kuli yange ngwendi, “Mwa vushunga vuvi ovu kunjikavasambesavwo mukuyoya kwavo kwoshe. Yange Kalunga wa Akamwa ya Vyoshe Muka-nzili yoshe, njinendekamo.”
Kunangula Shembena
15Shukulu Kalunga wa Akamwa ya Vyoshe Muka-nzili yoshe wanjilekele kuya kuli Shembena, mukulunu wa ku njuvo ya mwene, njikendeke nendi ngwange, 16“Yove wayongola ngwove yove iyajo? Uli na moko mukajo yakulicokwela mbumbo kumukulo wa lilundu lya mamanya? 17Unasa kukala na nzili, oloni Shukulu Kalunga akakwambata nakukumbila kuti. 18Akakwambata ngwe mbunje, co akakumbila mu lifuti lyakama ngeci ukatsileko, co matemba ove aje awalyalesele nawo vakawanyongesa. Unalingisa shwamwa njuvo ya shukulu yove! 19Shukulu Kalunga akakunyeka vipangi vyove.”
20Shukulu Kalunga wendekele kuli Shembena ngwendi, “Omwo vyuma evi vilingiwa, co njikatuma ngamba yange Elyakime muna Hilikiya. 21Co njikamuzika cikoveyo cove cacilaja ca vukulunu nakumwana lalo nzili ya vipangi vyove. Ikeye akapwa cisemi ca vanu va mu Yelusalema na mu Yunda. 22#Kuj 3:7 Njikamwana sapi ya vumwene vuje vwakundama ku naanga ya Mwene Ndaviti. Naumo wai akashokolola cije cashoka, co lalo naumo wai akashoka cije ashokolola. 23Njikamukolesa mu mwela mbe ngwe pampalingo, co Elyakime akapwa nsina ya kasingimiko ku naanga yendi yoshe.
24“Vavushoko vwendi na vana vendi vakawana vukwasi kuli ikeye. Vakakakateya kuli ikeye ngwe vindeo na malonga akakateya ku pampalingo! 25Omo vije vikalingiwa, co ije pampalingo vakolesele mbe vakaishomona nakuyiwisa. Co vyoshe vije vyakakateyeyeko vikanyonga.” Shukulu Kalunga nendekamo.
The Bible in Mbunda ©The Bible Society of Zambia, 2006