Isaya 20
20
Vuka-kwimanena vwakulwisa Ingito na Sundane
1Akushika kwa Mwene Salengoni wa Asilya, mukulunu muka-kushika mbunga ya mashwalale va Asilya walwisile Ashendonde nganda ya Filisitiya. 2A myaka itatu ya kunima Shukulu Kalunga walekele Isaya muna Amoze atundise vin̄aku vyendi na vuzalo vwa cikeleya vwazalele. Isaya wononokele, wendele mushelengwa, co kazalele vin̄aku ku mendi endi a myaka ije itatu. 3Omo Ashendonde vaifungulwile, co Shukulu Kalunga wendekele ngwendi, “Ngamba yange Isaya nende mushelengwa, co kazalele vin̄aku ku mendi a myaka itatu. Eci cinapu cimweso ca vije vikalingiwa ku Ingito na Sundane. 4Munu woshe mu vinganda evi vitatu akenda mushelengwa, co kakazala vin̄aku omo mwene wa Asilya akavatwala mu vunzinda. Vakwenje na vakulunu vakenda mushelengwa, co kuvakazala vin̄aku ku mendi avo, shwamwa yavo ikasholoka, mukuzivisa shwamwa Ingito. 5Vaje vakulaelele Sundane nakulishashela Ingito vakapwa vaka-kupaya, cinyangavili cavo cikahwa. 6Omo vyuma evi vikalingiwa, vanu vaje vatungila ku ngenge ya ndonga ya mema a kalunga ya Filisitiya vakendeka ngwavo, ‘Kengeni vije vinalingiwa ku vanu vaje twajendamenene ngeci vatunyunge kuli mwene wa Asilya! Twasa kuyoya vatijo?’ ”
The Bible in Mbunda ©The Bible Society of Zambia, 2006