Isaya 19
19
Njambi akahisa Ingito
1 #
Njele 46:2-26; Ezek 29:1—32:32 Awa akewo majwi aa Ingito.
Shukulu Kalunga aija ku Ingito, nalondo a lishelwa aija lumbisi. Vanu vanazeye omwo lyova. Co tumponya twavo vanalijujukila. 2Shukulu Kalunga endeka ngwendi, “Njikashangumuna nzita mu Ingito, co vakalitengulukile nakulilwisa ndolome na ndolome, mundambo na mundambo. Nganda na nganda ikalilwisa imo na ikwavo, co vumwene vukalilwisa na vukwavo. 3Njikatanganesa matumbe na viyongola vya vaka-Ingito, Vakehula tumponya twavo ngeci vavakwase, vakaya nakwihula kuli vaka-kwendeka na vakulu, nakwihula lalo ku minzinzime ya vatsi ngeci ivanangule. 4Njikana vaka-Ingito ku mavoko a mwene wa vukalu na muuka, Yange Kalunga Muka-nzili yoshe, njinendekamo.”
5Mema akatepuluka mu Ndonga ya Nailo, co ndonga ikauma cau. 6Vana vavindonga vakanika omo vakauma. Co mahongo na mateve akajujwama, 7vimbuto vyoshe vije vakunine ku ngenge ya Nailo vikauma cau, co vikapekumuka. 8Munu woshe uje wayoyela akulovela visi mu Nailo, akakemanga nakulila, tulovo twavo na manda avo vikapwa vyangoco. 9Vaka-kutonga vinanga vyavivwa vya linyu vakajeneka vyakulinga. 10Vaka-kwosha na vanu vaka-kupanga vya vutongwe vakapokoka vimbunge.
11Vantwama va mu nganda ya Zoane vanapu vilema! Vanalume vakamana va mu Ingito vakanangula vya vukolokomba! Vatijo valeka mwene wa Ingito ngwavo, vakevo vapwa vanu va mana manene, co naanga yavo yapwa naanga ya vimyene va ku san̄ulu? 12Mwene wa Ingito, vali kulijo vaje vaka-kunangula vove vakunyanyama? Amo vasa kukulekako vutumbe vwalinavwo Shukulu Kalunga Muka-nzili yoshe a Ingito. 13Vantwama va Zoane na Mefise vanapu vikolokomba. Vanapandele kutwamenena lifuti mwamuvwa, oloni vanalisevwisa. 14Shukulu Kalunga naaka muli vakevo munzinzime wakuvatanganesa. Vantwama va Ingito vanalingisa lifuti eli ngeci lipelyangele nakulishanjela ngwe muka-kupenda. 15Naumo wai mu Ingito asa kulinga cuma, nambe muka-kufuka nambe kautu, nambe muka-vulemu, nambe munu uje kuvamuzivuka.
Ingito vakalemesa Shukulu Kalunga
16Omo Shukulu Kalunga Muka-nzili yoshe akolola livoko lyendi lya nzili mukuhisa Ingito, vaka-Ingito vakazeya manene-nene nakulijajela na lyova. 17Vanu va mu Ingito vakaziva lyova lya Yunda visimbu vyoshe omo vakanuka luvinda luje lwanenele Shukulu Kalunga Muka-nzili yoshe ali vakevo.
18Omo simbu ije iketa, kukakala vinganda vitanu mu Ingito vakendeka ndaka ya ciHevelu. Co vanu va muje vakakavangeya Shukulu Kalunga Muka-nzili yoshe. Nganda imo ku vinganda vije vakaitumbula ngwavo, “Nganda ya Litangwa.”
19Omo simbu ije iketa, kukakala mutula wa Shukulu Kalunga mu lifuti lya Ingito, co na manda ya limanya vakaikundika kuli ikeye ku nginga ya vaka-Ingito mukusingimika Shukulu Kalunga. 20Vyuma evi vikapwa vimweso kuli vanu va mu Ingito ngeci Shukulu Kalunga Muka-nzili yoshe ali amo navo. Omo vanu vaIngito vakakala mu vukalu, co vakatambeka kuli Shukulu Kalunga ngeci avakwase, co ikeye akatuma umo mukuvapatula ku vitozi vavo. 21Shukulu Kalunga akalisholola ikeye vavenya kuli vaka-Ingito, co vakamuzivuka nakumulemesa, vakamukombelela nakumulambwila. Vakalisinga cikulaeso ca cikumiiyo kuli ikeye nakulinga vije vivanakulaesa. 22Omo Shukulu Kalunga namanesa kunyanyamesa vaka-Ingito, co vakatengulukila kuli ikeye. Akaziva malombelo avo, nakuvakangwisa.
23Omo simbu ije iketa, kukakala tapalo yakama mukati ka Ingito na Asilya. Vaka-Ingito na vaAsilya vakalyendela, co vakalemesela amolika. 24Lifuti lya Isalele likalipandakana na Ingito na Asilya, co mafuti awa atatu akapwa civezikiso mu kaye mwoshe. 25Asinoni Shukulu Kalunga Muka-nzili yoshe akavavezikisa nakwendeka ngwendi, “Njikamivezikisa vanu vange vaka-Ingito, yeni vaAsilya vaje njatangele, neni vaIsalele vanu vange vakwangula.”
The Bible in Mbunda ©The Bible Society of Zambia, 2006