Isaya 18
18
Njambi akahisa Sundane
1Musambwa ya vindonga vya Sundane, kuli lifuti tulinakuziva cilumo ca mambava. 2Ku lifuti lije kwezile miluwa vezile na Ndonga ya Nailo mu mato akutunga na mahongo. Yeni miluwa, ilukeni kwimbo lyeni! Twaleni majwi ku lifuti lyeni kuje kushango ya vindonga, ku muyati weni wa nzili na muuka, vanu vaje vavalaja va cikonde cakuseneta, vaje vavatewa mu kaye mwoshe.
3Tolilileni, yeni vanu voshe muli ano asi! Kengeleleni cimweso ca pandelo vaimika akamwa ya minkinda! Tolilileni lupembo lwimba! 4Shukulu Kalunga wendekele kuli yange ngwendi, “Njikakenga asi na kwoloka kuluu oku njili mwilu, ngwe lime lilinakuwila asi vutsiki omo kuli ntwima a simbu ya kuteja, ngwe misha ya litangwa a simbu ya mutanya. 5Omo kanda vacikungulule vushuka, omo vishani vyoshe vinatotomoka, co vushuka omwo vuhya, Shukulu Kalunga akanyongesa vaSundane ngwe moko ivatozola minango ya mikolovozi ya vushuka vwa vinyu. 6Mivila ya mashwalale vaSundane vakaisezela tuzila na vikashama. Tuzila vakalya mivila yavo a ndombo, co tusitu vakalya mivila yavo a cisika.”
7 #
Zef 2:12
Simbu ilinakwija omo Shukulu Kalunga Muka-nzili yoshe akatambula milambu yakutunda ku lifuti lije lya kushango ya vindonga, ku muyati uje wa nzili na muuka, ku vanu vaje vavalaja va cikonde cakuseneta, vanu vaje vavatewa mu kaye mwoshe. Vakaija ku Munkinda wa Siyone, kuje kuvakalemesela Shukulu Kalunga Muka-nzili yoshe.
The Bible in Mbunda ©The Bible Society of Zambia, 2006