Isaya 17
17
Njambi akahisa Silya na Isalele
1Shukulu Kalunga wendekele ngwendi, “Ndamasiku kuyikapu lalo nganda, oloni ikapwa nganda yakusiwuka. 2Vinganda vya Silya vikapwa vingundu vya myaka yoshe.#17:2 VINGANDA...MYAKA YOSHE: Nambe, vinganda vya Aloele vikapwa vingundu. Vikapwa vulilo vwa vimanga na vingombe, co naumo wai akavashekamo. 3#Njele 49:23-27; Amo 1:3-5; Zak 9:1 Isalele kuyikakala na cimpaka cakuyinyunga, co Ndamasiku vakainyongesa. Va Asilya vaje vakasalao vakaziva shwamwa ngwe vanu va Isalele. Yange Kalunga Muka-nzili yoshe, njinendekamo.”
4Shukulu Kalunga wendekele ngwendi, “Litangwa lilinakwija omo vukama vwa Isalele vukahwa, mu vufuko vwendi vakengisamo vuutu. 5Isalele ikapwa ngwe lihya lya mu cimbongo ca Lefaime lije vateje laja vimbuto. 6Kuvanga vanu vavandondo lika vakasalao, co Isalele ikapwa ngwe muti wa olive uje uvanavuyu vushuka vwoshe kuvanga vuvali nambe vutatu lika vwa ku shongo-shongo vunasalako, nambe vwavundondo lika vunasala kwisi ya minango. Yange Kalunga Njambi ya Isalele, njinendekamo.”
7Omo litangwa lije likaija, vanu vakatenguluka nakukulaela Ishamatanga yavo, Njambi wakujela wa Isalele. 8Vanatungu mitula na mitambela yakwenyekela insense kuli Ashela njambi wa munakazi, vanashimbika vimanda vyakujela#17:8 VIMANDA VYAKUJELA: Nambe, miti mukupwa cimweso ca Ashela njambi wa munakazi. vya Ashela. Oloni vakalikela kulemesa ku mitambela eyi.
9Omo litangwa lije likaija, vinganda vije vakele nakunyunga mwamuvwa vikapwa vingundu, co vikasiwuka ngwe vinganda vije vivasezele vaHivi, na vaAmoli omo vatewele kuli vanu va Isalele.
10Isalele, munevala Njambi uje wamipatwile nakuminyunga, ikeye limanya lya nzili. Oloni mukuna mahya akujela#17:10 MAHYA AKUJELA: Kenga 1:29. ngeci mulemese njambi weka. 11Vimbuto vije mukuna vyasa kujovelela nakushamwina vishani mutondo uje vene muvikuna, oloni nacimo cai mukateja. Kukakala lika tuyando nakukemanga.
Mafuti a vitozi vaafungulula
12Miyati ya nzili yakama vali mu vukalu na muyoyo ngwe cikumo ca mema a kalunga, ngwe kungwanjanga kwakama kwa mankimba a mema a kalunga.
13Nameme miyati ya vanu valinakushwenya kulutwe ngwe livazi lyakujujwisa, oloni Njambi akashika ngeci veluke, vapekumukila kulyala ngwe likungu lya kumukulo wa munkinda, ngwe cishati cipekumuka na kankumba. 14A simbu ya cingwezi kulwa kwavo kuzivisa lyova, oloni ku mutondo voshe vavanyongesa. Eci cikeco cikalingiwa kuli vanu vaje vakatambula lifuti lyetu nakupukula vufuko vwetu.
The Bible in Mbunda ©The Bible Society of Zambia, 2006