Isaya 16
16
Kalesi yaivi ya Mowavi
1Mu nganda ya Sela#16:1 SELA: Nganda ya mu Mowavi. mu mambo vanu va ku Mowavi, vatume vwana vwa vana va vimanga kuli muka-kushwana mu Yelusalema. 2Co vavandamene ku ngenge ya Ndonga ya Alenone nakwendangana noku-noku, ngwe tuzila vaje vavanasheke a mashwa avo.
3Miluwa va Mowavi vendekele ku vanu va ku Yunda ngwavo, “Tulingeni mwamuvwa nakutukwasa. Tunyungeni, ngwe munzinze wa muti wakutonola a simbu ya litanya, tuhwimine mu munzinze weni. Tunapu tu vaka-kwija, tushwekeni kuje naumo wai asa kutuwanako. 4Tutaveni ngeci tukale mu lifuti lyeni. Tunyungeni kuli vaje vashaka kutunyongesa.”
(Kuyandesa na mapakeso vikahwa, na vaje valinakuviisa lifuti vakaya. 5Asinoni umo wa ku vatekulwila va Ndaviti akapwa mwene, akashwana vanu na kulongwa na cizemo. Co ikeye akalinga vyuma vije vya vushunga, akamona ngeci vushunga vulinakulingiwa vwasi-vwasi).
6Vanu va Yunda vendeka ngwavo, “Tunazivi kulyalesa kwa vanu va Mowavi. Tunazivuka ngeci vakevo vaka-kulishasha, oloni kulishasha kwavo kunapu kwangoco.”
7Vanu va Mowavi vakalila omwo tuyando tuje valinatwo. Voshe vakalisimoka omo vakanuka vyakulya vije valile mu nganda ya Kile Helese. Co vakavasheka kujeneka cinyangavili.
8Mahya a muyehi na Heshevone na vitungu vya mikolovozi ya vushuka vwa vinyu ya ku Simbema vanainyongesa, vitungu vya mikolovozi ya vushuka vwa vinyu vene ije vinyu vyayo vyakele nakupendesa vaka-kushwana mafuti. A simbu imo mikolovozi ya vushuka vwa vinyu yashalavelele nakweta ku nganda ya Njazele, co yetele na mu ngangela mu mambo, na mu kangombe ka yambi ku mutambela ukwavo wa Mema a Kalunga a Kutsa. 9Njililila mikolovozi ya vushuka vwa vinyu ya ku Simbema ngwe munjililila ya ku Njazele. Njililila Heshevone na Elyale, omwo vanu kuvakateje nakujolela. 10Naumo wai alinakuvwaelela mu mahya a vwilo. Naumo wai alinakutambeka nambe kwimba myaso mu vitungu vya mikolovozi ya vushuka vwa vinyu, naumo wai alinakulyatangela vushuka vwakulivanga vwa vinyu, Njambi namanesa mitambi yakujolela yoshe. 11Ngecivene, mbunge yange ilinakulinyenga a Mowavi, nakulinyenga a Kile Helese. 12Vanu va Mowavi valinakulijukisa ngoco kuya ku munkinda wavo wa tuzangu na ku vinjuvo vyakulemesela vinjambi vavo nakulombela, oloni nacimo cai civakwasa. 13Eli likelyo lijwi lije Shukulu Kalunga wendekele a Mowavi. 14Co Shukulu Kalunga nendeka ngwendi, “Mwa vushunga vene a myaka itatu vufuko vwavungi vwa Mowavi vukahwa. Akati ka vanu vamwo vavangi, vavandondo lika vakasalao, vakapwa va seo.”
The Bible in Mbunda ©The Bible Society of Zambia, 2006