Isaya 14
14
Kwiluka kutunda ku vunzinda
1Shukulu Kalunga akatetela vanu vendi va Isalele, akavaangula lalo nakuvaka mu lifuti lyavo, co vaka-kwija vakaija nakukala amo navo. 2Miyati yaingi vakakwasa vanu va Isalele kwiluka mu lifuti lyavo lije lyavanene Shukulu Kalunga, miyati ya vanu vakapangela Isalele ngwe vindungo. Vaje a simbu imo vafungulwile Isalele vakafunguluka kuli Isalele, co vanu va Isalele vakashwana vaje vavayandesele.
Kutsa kwa mwene wa Mbambilone
3Shukulu Kalunga akahwimisa vanu va Isalele kukukemanga kwavo, na ku tuyando twavo, na ku vipangi vyakukaluwa vije vivavasindiiye kupanga. 4Mukashendumuna mwene wa Mbambilone ngweni, “Mwene wa vukalu nau! Kakayandesa lalo munu!
5“Shukulu Kalunga namanesa nzili ya vaka-kushwana vavavi, 6vaje vayandesele mwamuvi vanu, co kuvalikelele kupakesa vanu va miyati yeka. 7Akukotoka kaye koshe kakakala mu kwoloka, co munu woshe akaimba nakujolela. 8Co miti ya Sipelese na miti ya kendale ya ku Lembanone ikavwaelela ngwe vanu akuwa kwa mwene, omwo kukwesi weka lalo akaishinja.
9“Lifuti lya vatsi linalivwaesela cimweja kutambula mwene wa Mbambilone. Minzinzime ya vaje vakele na nzili ano asi inazivi akwija kwendi. 10Voshe vakatambeka kuli ikeye ngwavo, ‘Kuma nove lalo unazeye ngwe yetu? Unapu umo wetu! 11Vakele nakukusingimika na myaso ya tulyalya, oloni uli muno mu lifuti lya vatsi. Unalala a vulili ali mainyo, co unalifwiki kambilititi ka mainyo!’
12 #
Kuj 8:10; 9:1 “Mwene wa Mbambilone, yove litota lya ku mutondo, unau kutunda mwilu! Ku san̄ulu wafungulwile miyati ya vanu, oloni ololo vanakumbila asi. 13#Mat 11:23; Luk 10:15 Wakele na cizango cakuya mwilu nakwaka litanda lyove akamwa ya vingongonosi vya akamwa. Wayongwele ngwove ukatumbama ngwe mwene a munkinda wa ku kunto kuje kuvakalikungulwila vinjambi. 14Wendekele ngwove ukalonda mwilu aje asikisila mashelwa, co ukapwa ngwe Muka-nzili yoshe. 15Oloni ololo, vanakushulwisila asi ku mutambela wa kulova manene wa vukalo vwa vatsi.
16“Voshe vaje vakumona vakalikomokela. Co vakehula ngwavo, ‘Kuma ou ikeye uje munalume waningangesele kaye nakujajesa vumwene ndi? 17Kuma ou ikeye uje munalume wanyongesele vinganda nakutengulula kaye kupwa vimambo ndi? Kuma ou ikeye uje munalume katavele kwecela vinzinda vendi ngeci vaye ku membo avo ndi? 18Omo vimyene va ano asi vatsa, vakavatsinda mu vimbumbo vyavo vyavivwa, 19oloni yove kuwesi na mbumbo, oloni muvila wove vanaumbila ngeci uvole. Vanaufwiki na mivila ya mashwalale vaje vanatsililile mu nzita, vanaumbila amolika na mivila yavo mu mbulu ya mamanya, nakuulyatangela. 20Omwo wanyongesele lifuti lyove nakutsiya vanu vove, kuvakakutsindi ngwe vakweni vimyene. Naumo wai akasalao ku naanga yove yaivi. 21Tukatsiya vana vove va vanalume mukufweta vuvi vwa vakukulwila vavo. Naumo wai akashwana ano asi, nambe kutunga vinganda ano asi.’ ”
Njambi akanyongesa Mbambilone
22Shukulu Kalunga Muka-nzili yoshe nendeka ngwendi, “Njikalwisa Mbambilone nakuyinyongesa. Nacimo cai njikasezamo, nambe vanike, naumo wai akayoyao. Yange Kalunga njinendekamo. 23Njikatengulula Mbambilone kupwa n̄ondo, co makun̄ulu vakakalamo. Njikakomba Mbambilone na cikombeso cije cikombela vyuma vyoshe kulyala. Yange Kalunga Muka-nzili yoshe, njinendekamo.”
Njambi akanyongesa vaAsilya
24Shukulu Kalunga Muka-nzili yoshe nalisingi cisingo ngwendi, “Vije vinjinayongola vikalingiwa, ngwe vene muje njinendeka. 25Njikanyongesa vaAsilya mu lifuti lyange lya Isalele nakuvalyatangela a minkinda yange. Njikapatula vanu vange ku vunzinda vwa vaAsilya. 26Ovu vukevwo vutumbe vwange a kaye koshe, co livoko lyange lya nzili njinalyolola mukuhisa miyati ya vanu.” 27#Isa 10:5-34; Nah 1:1—3:19; Zef 2:13-15 Shukulu Kalunga Muka-nzili yoshe nalivwaesela cimweja, nolola livoko lyendi mukuhisa, co naumo wai asa kumuvindika.
Njambi akanyongesa vaFilisitiya
28 #
2 Vim 16:20; 2 Miz 28:27 Awa akewo majwi atundile kuli Shukulu Kalunga mu mwaka uje watsile Mwene Ahaze.#14:28 MU MWAKA UJE WATSILE MWENE AHAZE: Mu 715 BC.
29 #
Njele 47:1-7; Ezek 25:15-17; Njwe 3:4-8; Amo 1:6-8; Zef 2:4-7; Zak 9:5-7 Vanu va mu Filisitiya, mulamu uje vamipupisile unapokoka, oloni kumwesi na cuma cakumivwaelelesa cai. Mulamu uje vene ukemuka wa vushungu, nakwimuka lalo linyoka ntoka wakupulula. 30Shukulu Kalunga akapwa kanyungi ka vanu vendi vakuutwa nakuvecela ngeci vakale mwamuvwa. Oloni akatuma njala yakukomokesa ya lyangengela ali vamo veni va vaFilisitiya, co vakwavo vakavatsiya.
31Lileni nakukangoka mu vinganda vyeni ngeci vamikwase, yeni vaFilisitiya. Lijajeleni nakulikomokela, muvavoshe! Lishelwa lyakukakumuka ngwe vwisi lilinakwija kutunda ku kunto,#14:31 KU KUNTO: Nzita ya vaAsilya na vaMbambilone ikatundilila ku kunto. mbunga ya mashwalale vakujeneka lyova.
32Vatijo twasa kukumbulula miluwa vaje vatunda ku Filisitiya? Tukavaleka ngwetu Shukulu Kalunga ikeye watungile Siyone, nameme vanu vendi vaka-kuyanda vakawana kwoloka.
The Bible in Mbunda ©The Bible Society of Zambia, 2006