Isaya 13
13
Njambi akahisa Mbambilone
1 #
Isa 47:1-15; Njele 50:1—51:64 Awa akewo majwi aa Mbambilone, aje atambwile Isaya muna Amoze kuli Njambi.
2Jundula pandelo ya nzita a lilundu lya miti! Tambekeni ku mashwalale, co vashovweyeni na livoko ngeci valwise vikolo vya nganda ya vanu va kulyalesa. 3Shukulu Kalunga nashiki mashwalale vendi vakwanguka nakusimpa kulwa nzita yakujela nakuhisa vanu vaje vanaluvalela.
4Tolilileni muyoyo a minkinda, muyoyo wa mbunga yakama ya vanu, muyoyo wa miyati na vumwene vanakunguluka. Shukulu Kalunga Muka-nzili yoshe alinakukungulula mashwalale vendi va nzita. 5Valinakutunda ku mafuti a kulyala a ku shongo ya asi. Co Shukulu Kalunga akamwesa vukalu vwendi mukunyongesa lifuti.
6 #
Njwe 1:15
Lileni, nakukangoka! Litangwa lili muyehi, omo Shukulu Kalunga Muka-nzili yoshe akaija mukunyongesa. 7Mavoko a vanu akazeya, nakusimpa kwavo kukahwa. 8Vanu voshe vakalijujukila, vakakemanga ngwe munakazi akita mwana. Vakalikenga shwii umo na umo na lyova, co vihanga vyavo vikakala na shwamwa. 9Kenga, litangwa lya Shukulu Kalunga lilinakwija, litangwa lya vukalu vwendi vwakama nakuluvala kwendi. Mukuluvala kwendi Shukulu Kalunga akapwisa lifuti mupulungwa, nakunyongesa vaka-vuvi vamwo. 10#Ezek 32:7; Mat 24:29; Mak 13:24-25; Luk 21:25; Kuj 6:12-13 Vingongonosi na mulalavizi wavyo kuvikatu ceke, litangwa likatsitsivala omo lituuka, co ngonde lalo kuyikatu ceke.
11Shukulu Kalunga endeka ngwendi, “Njikahisa kaye omwo vuvi vwako, nakuhisa lalo vaka-vuvi omwo vuvi vwavo. Njikanyongesa kulyalesa kwa vaka-muuka. 12Vaje voshe vakasalao vakakaluwa kuvawana kutuvakana ngolinde yakujela. 13Ngecivene, njikajajesa melu, na asi lalo akajaja, co akatunda a mitambela yao a litangwa lije omo yange Kalunga Muka-nzili yoshe njikamwesa vukalu vwange.
14“Vaka-kwija vaje vali mu Mbambilone vakatewela kulyala ku mafuti avo, nakulishandoka ngwe vishonge vatewa ciyambi, ngwe vimanga vakujeneka kanyungi. 15Woshe uje ivakafungulula vakamutsiya na moko ya mukwale. 16Vakamonako omo vakatsena vimbututu vavo a mamanya, vinjuvo vyavo vakavipukula, co vanakazi vavo vakavalinga vyuma vya shwamwa.”
17“Njilinakushangumuna vaMende kulwisa Mbambilone, VaMende vaje kuvesi kuvalanda na siliva, nambe na ngolinde. 18VaMende vakatsiya vakwenje na mata avo a lusipa. Kuvakazivila vimbututu mema ku mbunge, nambe kuzivila vanike lalo mema ku mbunge. 19#Kus 19:24 Vumwene vwa Mbambilone vwapwa vwavuvwa manene na nzili kutuvakana vumwene vwoshe, vavenya vumwene valyaleselavwo. Oloni yange Kalunga, njikanyongesa Mbambilone ngwe munjanyongesele Sondoma na Ngomola! 20Naumo wai akakalamo lalo. Kukwesi kaAlavya muka-kwendangana akashimbikamo mbalaka yendi, nambe kanyungi kakanyungilamo vutanga vwendi vwa vimanga. 21#Isa 34:14; Zef 2:14; Kuj 18:2 Ukapwa mutambela wa tusitu va mu mambo, muje muvakatungila makun̄ulu mashwa avo. Vainavilanda vakakalamo, na makunda vakeela mu vingundu. 22Minguli vakohyela mu tuposhi twavo, co vimbanje vakavwozela mu mapela amavwa. Simbu ya Mbambilone inete! Matangwa ayo anahu laja.”
The Bible in Mbunda ©The Bible Society of Zambia, 2006