Isaya 12
12
Mwaso wakushangazala
1Litangwa lilinakwija
omo vanu vakaimba ngwavo,
“Njikushangazala yove
Shukulu Kalunga!
Yove waluvalele nange,
oloni unanjizembeleka,
co kuwaluvalele lalo.
2 #
Kut 15:2; Mya 118:14 Njambi ikeye muyoyesi wange,
njikamukulaela kunjikazivi lyova.
Omwo Shukulu Kalunga
ikeye nzili yange, na mwaso wange.
Co napu muyoyesi wange.
3Ngwe omo mema akutonola akanene kujolela
kuli uje ali na lihwila,
ngecivene, vanu va Njambi vajolela omo avamena.”
4Litangwa lilinakwija
omo vanu vakaimba ngwavo,
“Kandeleleni kuli Shukulu Kalunga!
Lemeseni ikeye lika!
Ambululeni vilinga vyendi akati ka vanu!
Valekeni vukama vwa vumpau vwendi.
5Imbileni kuli Shukulu Kalunga
omwo nalingi vyuma vyakukomokesa.
Imbeni nakumushangazala ano asi oshe.
6Munu woshe wakala mu Siyone atambeke nakwimba!
Njambi ya Isalele wakujela napu wakama,
ikeye wakala akati ka vanu vendi.”
The Bible in Mbunda ©The Bible Society of Zambia, 2006