Isaya 10
10
1Ngongo yeni! Mukalingi mashiko aje kesi a vushunga, aje ayandesa vanu vange. 2Omu mukemwo mumuli nakuyandesela tuutu, nakuvavindika kulinga vushunga. Omu mukemwo mumukambatela vufuko vuje vwakundama ku vifwile na visiwa. 3Vatijo mukalinga omo Njambi akamihisa? Vatijo mukalinga omo ikeye akanena miyati yeka ngeci vamilwise nakumihisa? Kulijo kumukatewela ngeci mukawaneko vukwasi? Vufuko vweni mukavutewesela kuli? 4Vakamitsiila mu nzita, nambe kumikokangeya ngwe vinzinda. Oloni nameme ngoco vukalu vwa Shukulu Kalunga kuvukahu, anga akolola livoko lyendi mukuhisa.
Mwene wa Asilya napu ngwe cipangeso ca Njambi
5 #
Isa 14:24-27; Nah 1:1—3:19; Zef 2:13-15 Shukulu Kalunga wendekele ngwendi, “Njipangesa Asilya kupwa mulamu wakupupisa vaje vanjinaluvalela. 6Njatumine Asilya nakulwisa muyati wa vaka-kujeneka kunjikulaela, vanu vaje vananjiluvalesa. Njavatumine mukupukula nakwiva nakulyatangela vanu ngwe mazilo a mu vitapalo.”
7Oloni mwene wa vaAsilya ali na matumbe endi a lwozi mu mbunge. Nalivwaesela cimweja kunyongesa miyati yaingi. 8Alishasha ngwendi, “Muka-kushika wange woshe napu mwene! 9Njafungulwile vinganda vya Kaleno na Kalekemishe, na vinganda vya Hamate na Alepande. Njafungulwile Samaliya na Ndamasiku. 10Njolwele livoko lyange nakuhisa vumwene vwoshe vuje vulinakulemesa tumponya, tumponya twatungi manene kutuvakana tuje twa mu Yelusalema na mu Samaliya. 11Njinanyongesa Samaliya na tumponya twamwo twoshe, co njikalinga cuma cimo lalo na Yelusalema na tumponya tuje valinakulemeselamo.”
12Oloni Shukulu Kalunga endeka ngwendi, “Omo njimanesa kupanga vipangi vyange vyoshe a Munkinda wa Siyone na mu Yelusalema, co njikahisa mwene wa Asilya omwo akulishasha na a kulyalesa kwendi kwoshe.”
13Mwene wa Asilya alinakulishasha ngwendi, “Vyoshe evi njavilingi ange lika. Njili na nzili na mana nakunyanyama. Njinazimangana vinginga akati ka miyati, co njinambata vufuko vuje vatulikile. Ngwe ngombe wa nkomba, njalyatangela vanu vaje vakele muje. 14Miyati ya mu kaye vafwile ngwe lishwa lya kazila, co njakungulwile vufuko vwavo mukwasiwa ngwe muvakakungulula mavunda. Kukwakele limbava lyendele nakunjizivisa lyova, kukwakele lalo kazila weshamesele kanwa kendi nakunjinyangumuna!”
15Oloni Shukulu Kalunga endeka ngwendi, “Kuma njaviti yasa kukala na nzili kutuvakana uje munu alinakuyipangesa ndi? Kuma saha yasa kupwa ya vulemu kutuvakana munu uje alinakuyisaesa ndi? Mulamu kuwesi kujundula munu, oloni munu ikeye akajundula mulamu.”
16Shukulu Kalunga Muka-nzili yoshe akatuma mushongo nakuhisa vaje valinakulya mwamuvwa. Mu mivila yavo mukakala tuhya tuje tukashukuma-shukuma. 17Njambi, ceke ca Isalele, akemuka tuhya. Njambi wakujela wa Isalele, akemuka mulangi wa tuhya, uje ukenyeka vyuma vyoshe a litangwa lyangongo, nameme mambimbo na mishwena. 18Shwata ya vwilo na shwata yakulima mahya vikanyonga, ngwe mu cifwa cije cakatsi munu ku mushongo wauvi. 19Miti yaindondo lika ikasalao ije nameme mwanike asa kuyilava.
Vavandondo lika vakeluka
20Simbu ilinakwija omo va Isalele vaje vanasalao kuyoya kuvakakulaela a muyati uje wavayandesele. Oloni mwa vushunga vakakulaela lika kuli Shukulu Kalunga, Njambi wakujela wa Isalele. 21Vanu va Isalele vavandondo likae vakeluka kuli Njambi yavo Muka-nzili yoshe. 22Nameme ngoco ololo vanu va Isalele vanatumu manene ngwe lishen̄avu lya ku cikuma ca mema a kalunga, oloni vavandondo lika vakeluka. Kunyonga vanacitulikila vanu, co mwamuvwa vene cavapande. 23#Lom 9:27 Eyo, mu kaye koshe Shukulu Kalunga Muka-nzili yoshe wa Akamwa ya Vyoshe, akanena kunyonga ngwe mwendekele ngwendi akalingamo.
Shukulu Kalunga akahisa Asilya
24Shukulu Kalunga Muka-nzili yoshe wa Akamwa ya Vyoshe endeka ku vanu vendi vaje vakala mu Siyone ngwendi, “Kesi muzive lyova lya vaAsilya, nameme vamiyandesa ngwe muvamiyandesele va Ingito. 25Mu kasimbu kakandondo lika, njikalikela kumihisa, asinoni njikavanyongesa. 26Yange Kalunga Muka-nzili yoshe njikavapupa na likote lyange ngwe munjapupile vanu va ku Mindyani ku Limanya lya Oleve. Njikahisa Asilya ngwe munjahisile Ingito. 27Omo simbu ije iketa, njikamipatula ku nzili ya Asilya, co mandauluwa yavo kuyikaleme lalo a vitsili vyeni.”
Muka-kulwisa aija
28Mbunga ya mashwalale va vitozi vanafungulula nganda ya Ai!#10:28 AI: Nganda eyi, na mitambela ikwavo vanatumbula mu 28-32 yakele kuyehi na Yelusalema. Vaneti ku Mingelone! Co vanaseza vivala vyavo ku Mikemashe! 29Vanajomboka ngila, co vanakalalela ku Ngemba! Vanu va mu nganda ya Lama vali na lyova, co vanu va mu nganda ya Ngimbeya ya Mwene Saulu vanatewe. 30Tambekeni, yeni vanu va Ngalime! Tolilileni, yeni vanu va Laisha! Kumbululeni, yeni vanu va Anatote! 31Vanu va ku Mandimena na ava va ku Ngembime valinakutewa ngeci vovoke. 32Ku litangwa lya lelo vitozi vali mu limbo lya Nombe, co kuje valinakwinazeka vin̄ome ku Munkinda wa Siyone, ku nganda ya Yelusalema.
33Shukulu Kalunga Muka-nzili yoshe akavawisila asi ngwe minango yakushaja ku muti. Co vaka-kulyalesa na vaka-kulijundula vakevo vavenya vakavashinjila asi nakuvazivisa shwamwa. 34Shukulu Kalunga akavashinjila asi ngwe muvakashinji na njaviti miti ya mukati-kati ka shwata, ngwe muyikau miti yaivwa ya Lembanone.
The Bible in Mbunda ©The Bible Society of Zambia, 2006