Muka-kwambulula 6
6
1Kuli cuma cimo cacivi cinjinamono ano asi, co cinaama manene ku vanu. 2Njambi naana kuli munu vufuko, na kasingimiko, na vivala, na vyuma vyoshe vije vyashaka munu mukuyoya kwendi, oloni Njambi katavesele munu kuvilya, weka ikeye akavilya, eci cinapu cangoco, co lalo cinaviya manene. 3Nga munu akita vana 100 nakuyoya myaka yaingi, co myaka yendi ituma, oloni kesi kuvwaelela nambe kumutsinda mwamuvwa, co njendeka ngwange, mwana wakujombwesa limbo ali na seo kutuvakana uje munu. 4Omwo uje mwana aija ngoco, co aya mu lisusulungu, co muje mu lisusulungu vasa kumwivalelamo. 5Kasa kumona litangwa nambe kuzivuka cuma, oloni nameme ngoco, nawana kuhwima kutuvakana yove. 6Nameme uyoya myaka 2,000 kuvwaelela na vyuma vyavivwa. Ngwe muwazivukile laja, yetu voshe tuya ku mutambela umolika.
7Vipangi vyoshe vyakapanga munu akapangela kulya, oloni lishungu lyakulya kulyesi kuhwa. 8Muka-mana natuvakana vatijo cilema? Vuvwa mukajo vuli ali kautu ngeci awane mwakuyoyela? 9Cinapu cangoco, eci cinapu lika ngwe kusheka lihunzi. Mwamuvwa kupwisamo nevi ulinavyo kutuvakana kushakezeka vyuma vyeka simbu yoshe.
10Vyuma vyoshe vije vilingiwa lelo vavimangele laja ku san̄ulu, co yetu voshe tuzivuka ngeci munu kasa kulinga vimata na uje namutuvakana nzili.#6:10 KULINGA VIMATA NA UJE NAMUTUVAKANA NZILI: Nambe, kulinga vimata na Njambi. 11Omo twendeka manene, mukemwo musholokela vulema, cikwasa vikajo nga twendeka manene? 12Vatijo munu azivuka vije vinapu vyavivwa ku munu simbu eyi yaindondo ya mwonyo wendi wangoco, mwonyo uje ulinakwita ngwe munzinze? Vatijo munu akasa kuzivuka vyuma vije vikalingiwa mu kaye omo ikeye natsi laja?
The Bible in Mbunda ©The Bible Society of Zambia, 2006