Muka-kwambulula 7
7
Viyongola vya a mwonyo
1 #
Vis 22:1
Lizina lyalivwa lyatuvakana mazi a seo yakama, co litangwa lya kutsa lyatuvakana litangwa lyakusemuka.
2Mwamuvwa kuya ku njuvo kuje kuli vusiwa, kutuvakana kuya ku njuvo kuje kuli ciwano, omwo vaje valinakuyoya vanapande kulyanukisa ngeci kutsa catuvandamena yetu voshe.
3Vusiwa vunapu vwavuvwa kutuvakana kujola, vusiwa vwasa kusholoka ku cihanga cove, oloni mbunge ivwaelela.
4Munu uje alinakuyongola kuvwaelela simbu yoshe napu cilema, oloni muka-mana akayongola a kutsa.
5Mwamuvwa kukala na vanu vaka-mana ngeci vakunangule, kutuvakana kukala na vilema vaimbe vyakukushangazala.
6Tujolo twa cilema, tunafu ngwe muwakambongozoka mambimbo a liko, vyoshe vinapu vyangoco.
7Omo muka-mana akwisa umo nafu ngwe cilema, nga utambula lizika-kanwa uviisa mana ove.
8Mamaneselelo a cuma anatuvakana vushangumukilo vwaco. Lukakateya lunapu lwaluvwa, kutuvakana kulyalesa.
9 #
Yak 1:19
Kesi uluvale vwasi embwe, omwo vukalu vwakala mu vimbunge vya vilema.
10Kesi wihule ngwove, “Omwo vikajo vyuma vyavwaele manene a matangwa a kunima?” Cihula eci kesi ca mana embwe.
11Munu woshe ayoya napande kupwa muka-mana, co cinapu cacivwa ngwe uje atambula vushwana.
12Omwo mana akwasa vanu, co vimbongo lalo vivakwasa, oloni mana anatuvakana vimbongo omwo mana anyunga mwonyo wa uje alinawo. 13Yongola vipangi vya Njambi. Iyajo asa kushungamesa vije vyanapengesa-pengesa Njambi? 14A litangwa limo omo umona vyavivwa vwaelela, co omo tuyando twija anuka ngeci, Njambi ikeye natumu vyoshe kuvwaelela na tuyando, kuuzivuka vika vikalingiwa ku simbu ya kulutwe.
15Mukuyoya kwange kwangoco njinamono vyoshe, muka-vushunga anyonga na vushunga vwendi, co muka-vuvi ayoya myaka yaingi na vuvi vwendi. 16Ngecivene, kesi upwe u muka-vushunga manene, nambe kupwa u muka-kunyanyama manene, omwo vikajo ulinyongesela yove vavenya? 17Kesi upwe u muka-vuvi manene, nambe kesi upwe u cilema, omwo vikajo utsila simbu yove kanda yete? 18Kesi ukavangeye vyoshe vivali. Nga usingimika Njambi, ukapwa muka-kuhyana mu vyoshe.
19Mana aana nzili kuli munu muka-mana, co natuvakana vaka-kushwana likumi va mu nganda.
20Kukwesi umo ano asi muka-kulinga vya vushunga simbu yoshe uje kesi kulinga vuvi.
21Kesi utolilile ku vyuma vyoshe vije vivendeka vanu, amo ukaziva ngamba yove akushaula, 22omwo wazivuka mu mbunge yove ngeci nove lalo unakala nakushaula vakweni visimbu vyavingi.
23Njapangesele mana ange akwilula vyoshe evi, co njendekele ngwange, “Njikapwa muka-mana,” oloni njonwele. 24Vatijo munu asa kuwana muwanungulukila mwonyo? Capwa cacikalu manene kucizivisisa. 25Njalikundikile ku mana nakulilongesa, co njashakele kuwana mana, nakukumbulula ku vihula vyange, nakulilongesa muvwafwa vuvi, na vulema.
26Co njawanene cuma cimo cakulula manene kutuvakana kutsa cinapu munakazi, cizemo cendi cinapu ngwe nganjo na mavoko endi anapu ngwe malyenge. Oloni uje munu ononoka Njambi asa kucakunukamo, oloni munu uje kononoka atsa mu nganjo eyi. 27Eyo, muka-kwambulula wendekele ngwendi, “Njawana eci kamandondo-kamandondo simbu njakele nakuvandamena kukumbulula. 28Eci cikeco cuma ciyashakele mbunge yange manene, oloni kunjaciwanene embwe. Njawanene munalume umo muka-vushunga akati ka vanalume 1,000, oloni akati ka vanu 1,000, kunjawaneneo munakazi umo muka-vushunga. 29Kenga, njinawana cuma cimo cakupwa ngeci, Njambi watangele yetu vanu kupwa vaka-vushunga, oloni yetu omwo muuka wetu tunashakezeka vingila vyeka vyavivi.”
The Bible in Mbunda ©The Bible Society of Zambia, 2006